AROOMA 12

1Kwoogu, aruayia na aarayia, n'ûntû bwa kîao kîa Ngai, inkûbûûria bwînenkanîre kîrî Ngai bûrî igongwana bîri mwoyo. Mûtûûrîre wenu nwîgue ûrî mûtûûrîre ûmûtheru na ûkûmûkenia. Înu n'yo njîra ya kûmûtûmîkîra bûra kwagîrîte. 2Bûtikaathingatîîre bûra bara barî ba nthîgûrû barûthaga. Îpaani Ngai kaanya abûgarûre abwe mathûgaanio mangî. Rîru i rîo bûkaûmba kûmenya bûra eendaga kûrûthwa, bûra bwega, bûra bûmûkenagia, na mûkarîre wa mwîtîgîri ûmûkûrû. 3N'ûntû bwa kîewa kîa mwanya kîra Ngai ampete ndî mûtûmwa, ndîbwîra muntû atikeethûkie taka arî gîtûmi mûno nkûrûki ya bûra arî. Muntû neethûkagie bûra kwagîrîte kûringana na bûra wîtîgio bûra Ngai amwete bûgana. 4Wata bûra mwîrî ûrî icuncî biingî na wakîra gîcuncî kîrî na ngûgî ya kîo, 5i ta bu gûkari kîrî mwîrî wa Kîrîstû, ta uu kanica. Amwe na kwîgua tûrî baingî, twinthe tûrî ba mwîrî ûmwe na tûgwatithanîîtue muntû na ûra ûngî. 6N'ûntû bwa ûtugi bwake, Ngai neete woora ûmwe wacietû kîewa kîa mwanya. Ûkaaya kwîgua kîewa kîra wetwe i kîa ûroria, ûbatîîrue ûgîtûmîra kûringana na bûra wetwe wîtîgio bûgana. 7Ûkaaya kwîgua wetwe kîewa gîa gûtûmîkîra bara bangî, îrute kûrû ûtûmîkage. Na ûkaaya kwîgua wetwe kîewa gîa kûrutana bara bangî, îrute kûrû ûrutanage. 8Ûkaaya kwîgua wetwe kîewa gîa gwîkîra bara bangî wîru, îrute kûrû wîkanagîre wîru. Na ûkaaya kwîgua wetwe kîewa gîa kweyana, eyanaga ûtagûtara. Ûkaaya kwîgua wetwe kîewa gîa ûtongoria, tongoria na wendi. Na ûkaaya kwîgua wetwe kîewa gîa kwîgagîîrua bara bangî kîao, kîonanagie ûrî na wîru. 9Endagaani bara bangî, na beendageeni kwenda kwa mma. Menagaani ûntû bûûthûûku. Rûmagîîraani ûntû bwega. 10Endanagaani ta antû ba mûciî ûmwe. Tîîyagaani bara bangî nkûrûki ya bûra bwîtîîyaga. 11Bûtikaathire wîru. Rutagaani ngûgî na inya, rutagîraani Ngai ngûgî na nkoro yenu yonthe. 12Kenagaani rîonthe n'ûntû bûrî na wîrîgîîro. Ûmagîîriani rîra bûrî thîînaani. Rombagaani rîonthe. 13Rûmagiani antû ba Ngai bara barî na thîîna bira bûrî na bio. Gwatanagaani ûgeni. 14Thaarimagaani bara babûthîînagia. Bathaarimageeni, bûtikaabarîrîke. 15Kenagaani amwe na bara bagûkena. Rîragaani amwe na bara bakûrîra. 16Tûûranagiani na ngwatanîro na bara bangî bacienu. Bûtigeekumagie, îgwatanagîraani na bara beenyiagia. Bûtikeethûkagie bûrî baûgî nkûrûki ya bûra bûrî. 17Muntû akaaya gûkûrûthîra ûntû bûûthûûku, ûtikaamûrûthîre ûthûûku. Geragiani kûrûthaga bûra antû bonthe bakoonaga bûrî bwega. 18Tûûranagiani na antû bonthe na ûkiri bûra kûûmbîkana. 19Eendwa, bûtikaarîagie ûthûûku bûrî biû. Rekagîriani Ngai oonagie muntû ta ûyu mûthûûro wake, n'ûntû kwandîkîîtwe Maandîkooni Maatheru, " 'I niû nkaabûrîagîria bara babûrûthagîra mantû maathûûku,' ûgu i bu Mwathani augîîte." 20Kwoogu bantû a kûrîithia, ta bûra Maandîko Maatheru maugîîte, "Weegua munthû waku narî na yûûra, mwe biakûrîa. Weegua narî na bûûta, mûkundie rûûyî. Ûkamûrûthîra ûgu nûkaamûûragithia nthoni n'ûntû bwa mantû mara akûrûthîrîte maathûûku." 21Bûtikaareke ûthûûku bûbûkîria inya. Bûkîrieni inya na kûrûthaga mantû meega.

will be added

X\