AROOMA 10

1Aruayia na aarayia, ndombaga Ngai na nkoro yakwa yonthe Ayaundi boonokua. 2Nwa nkûûyîîre nkauga Ayaundi barî wîru bûûnene mûno kîrî Ngai, kîra baagaga n'ûmenyo bwa mma. 3Batiiyî bûra Ngai aagîrithagia antû. Bacûûgagia gûtua njîra ciao cia kwîbagîrithia, bakarega gwîtîgîîria kwagîrithua kûra Ngai aagîrithanagia. 4Kîrîstû we naingiirie watho. Kwoogu ûra amwîtîgagia naagîrithagua i Ngai. 5Musa aandîkire auga kwagîrithua kûra kûreetagwa i kûthingata watho, i gûkû, "Ûra akaathîkîra maathana magaatûma atûûra mwoyo." 6Îndî Maandîko Maatheru maugaga îgûrû rîa kwagîrithua kûra kuumanagia na wîtîgio, "Ûtikeebûûrie 'N'ûû akaathi îgûrû?' " (Athi akeere Kîrîstû aaye.) 7"Kana 'N'ûû akaathi kûra bara bakuû barî?' " (Akeere Kîrîstû aume kûra bara bakuû barî.) 8Maandîko Maatheru maugîîte, "Kiugo kîa Ngai kîrî agu ûrî. Kîrî kanyuani gaaku, na kîrî nkorooni yaku." Kiugo gîku i kîo tûtûmagîîria. I kîo gîtûmaga muntû oonokua agîîtîgia. 9Ûkauga na kanyua gaaku Kîrîstû i Mwathani, na ûgeetîgia nkorooni yaku Ngai naamûriûkiirie auma kîrî bara bakuû, ûkoonokua. 10Gwîtîgia kûra muntû eetîgagia na nkoro yake i ku gûtûmaga aagîrithua. Na mîgambo îra muntû augaga na kanyua gaake n'yo îtûmaga oonokua. 11Wata bûra Maandîko Maatheru maugîîte îgûrû rîa Kîrîstû arî ta iiga, "Ûra akaarîîtîgia rîtimwîkîrithia nthoni." 12Na ûgu i bu kûrî kîrî Ayaundi na kîrî bara batarî Ayaundi, n'ûntû Ngai ûyu ûmwe n'we Mwathani wa bonthe. Nathaarimaga na ithaarimo biingî bara bonthe bamwîtaga aboonokia. 13Wata bûra kwandîkîîtwe Maandîkooni Maatheru, "Ûra wonthe eetaga Mwathani amwonokia, Mwathani akamwonokia." 14Îndî n'ata antû baûmba kûmwîta aboonokia batamwîtîgîîtie? Na n'ata baûmba kûmwîtîgia bateegîîtue ntûmwa yake? Na n'ata baûmba kwîgua muntû akûmûgweta gûtarî na muntû wa kûbatûmîîria? 15Na n'ata muntû aûmba kûbatûmîîria Ngai atamûtûmîîte? Antû babu i bo Maandîko Maatheru maaragîîria îgûrû rîao ara maugîîte, "N'ata bara bareetaga ntheto îmbega bareetaga mantû maathongi?" 16T'antû bonthe beetîgîîtie ntheto îmbega. Kîroria Isaaya augîîte, "N'ûû eetîgîîtie ntûmwa yetû?" 17Kwoogu, muntû eetîgagia kuumania na kwîgua, na antû beegagua kûrî na muntû wa kûbatûmîîria Kîrîstû. 18Ka antû bateegua? I mma bareegua n'ûntû Maandîko Maatheru maugîîte, "Kayû ga tûnyua twao ikaîguîkîîte bantû onthe nthîgûrû. Mîgambo yao nîkinyîîte gûntû kunthe." 19Ka Aciraeri bo bataamenya? I mma ibaiyî. Mbere Musa aandîkire auga, Mwathani augîîte, "Ngaatûma bwîgua rûriitho na mûgongo ûtarî na gîtûmi, ngaatûma bûthûûra na antû batarî na ûmenyo." 20Na Isaaya n'we augîîte atakwitha, Mwathani augîîte, "Bara baambonire i bara bataancûaga, ndeebonaniirie kîrî bara bataûranagia naani." 21Îndî îgûrû rîa Isiraeri, Ngai augîîte, "Rîonthe nthagaanaga antû batakwathîka, antû baûmo biongo."

will be added

X\