AROOMA 1

1I niû Paûrû, mûruti ngûgî wa Yiesû Kîrîstû, nkûbwandîkîra. Ndeetirwe i Ngai ntuîka mûtûmwa wake, aanthuura ntûmîîria ntheto yake îmbega. 2Eeyanire wîrane bwa yo tene mûno gûkûrûkîîra kîrî iroria, wata bûra kwandîkîîtwe Maandîkooni Maatheru. 3Ntheto îno îmbega îkoneetie Mwana wa Ngai, ta we Mwathani wetû Yiesû Kîrîstû. Aaciarirwe arî muntû rûrîîyooni rwa Ndaundi. Îndî Kîrundu Ûmûtheru noonaniirie Yiesû i Mwana wa Ngai arî na inya ya mwanya kuumania na kûriûka gwake. 5Gûkûrûkîîra kîrî Kîrîstû, Ngai nampeere ngûgî ya mwanya mûno mmûrutîra, ta yo ngûgî ya ûtûmwa. Mbîtaga antû ba nthîgûrû cionthe baaya kîrî we bamwîtîgia, bamwathîkîra. Na i Kîrîstû ndutagîra ngûgî îno. 6Na wana biû bûrî bamwe ba bara beetîîtwe batuîka ba Yiesû Kîrîstû. 7Ndîbwandîkîra biû bwinthe bara bûtûîre Rooma, bara bwendeetwe i Ngai abwîta bûtuîka antû baake baatheru. Ngai Baaba wetû na Mwathani Yiesû Kîrîstû baroobwaa ûtugi na ûkiri. 8Mbere ingûcookeria Ngai nkaatho gûkûrûkîîra kîrî Yiesû Kîrîstû n'ûntû bwenu bwinthe. Eetîgîri nthîgûrû yonthe barîaria bûra bûrî na wîtîgio bûgana. 9Ngai ûra ntûmîkagîra na nkoro yakwa yonthe na njîra ya gûtûmîîria ntheto îmbega îgûrû rîa Mwana wake i mûkûûyî wakwa. Naiyî imbûririkanaga 10rîonthe rîra nkûmûromba. Mmûûragia atûme mbone kaanya ga kûûya kûbûriûngîra. Na wabu nkaaya weegua i kwenda gwake. 11Inkwenda mûno kûûya kûbwona. Nkaaya bwathaarimwa kuumania naani, wîtîgio bwenu bûkarika nkûrûki. 12I ta kwonania twateethania. Wîtîgio bwakwa bwabûteethia na bwenu bwanteethia. 13Aruayia na aarayia, ndeenda bûmenya i maita maingî mbangaga kûûya kûbûriûngîra, ka bûtaûmbîkaga. Mbendaga kûûya mbûrutana mbûteetheeria bûkûra gîîkîrundu mbona maumithio meega, ta bûra nteetheetie bara bangî batarî Ayaundi. 14Imbatîîrue ntûmîkîra antû bonthe--bara barî ba nthîgûrû ira ciiyî mantû mûno, na bara nthîgûrû ciao itaiyî mantû maingî mûno, bara bathoomu na bara batarî bathoomu. 15Na gîku i kîo gîgûtûma mbenda mûno kûûya gûtûmîîria ntheto îmbega naagu kwenu Rooma. 16Ntiîgagua ntheto îmbega igî n'ûntû n'yo inya ya Ngai îra yonokagia muntû wonthe ûra eetîgagia. Mbere Ayaundi, rîru bara batarî Ayaundi. 17Ntheto îno îmbega n'yo yonanagia bûra Ngai aagîrithagia antû. Ngai aagîrithagia antû n'ûntû bwa wîtîgio bwao t'ûntû na kîngî. Wata bûra kwandîkîîtwe Maandîkooni Maatheru, "Ûra aagîrithagua n'ûntû bwa wîtîgio bûra arî na bu agaatûûra." 18Ngai oonagia antû mûthûûro wake kuuma îgûrû n'ûntû bwa wîyia kana ûntû bunthe bûûthûûku bûra antû barûthaga bagatûma ûmma bûrega kûmenyekana. 19Oonanagia mûthûûro wake n'ûntû bûra bwake bûûmba kûmenyekana bûtirî witho kîrî bo. Ngai nabwonanîîtie. 20Kîra gîtamenyeka n'ûntû gîtionagwa, n'inya ya Ngai îra îtakooro îthira, na bûra Ngai akarakari kaingo eetwa Ngai. Îndî wana bio, kuuma kûûmbwa kwa nthîgûrû Ngai noonanagia kuumania na bira bionthe aûmbîîte bûra mantû mamu makarakarangi. Kwoogu bara barûthaga mantû maathûûku ma meeyia batirî na bwa kwîgwatia. 21Ibaiyî Ngai, îndî amwe na ûgu bataamûtîîya ta Ngai, kana bamûcookeria nkaatho. Meeciiria maao maatuîkire ma ûtheri. Mathûgaania maao ma ûtaku maatuîka maathûûku. 22Baugaga ibarî baûme, îndî baatuîkire biaa. 23Bantû a bagonga Ngai mûtûûra mwoyo, ûra abatîîrue atîîyagwa, baagongaga ngai cia ûrongo irûthîîtwe ciakara ta muntû, kana nyoni, kana nyamû cia magûrû mana, kana ira irûthîîtwe ciakara ta nyamû ira ciîkururagia na nthî. 24Kwoogu Ngai akwona ûgu abatiganîria barûtha bûra mawîrirîîria mamu maao maathûûku maabeeraga barûthe. Baarûthire na mîîrî yao mantû mataagîrîte na ma îgi. 25Bantû a beetîgia bûra bwarî mma Ngai n'ûû, boonire beetîgie ûrongo. Baatua kûgonga na gûtûmîkîra bira Ngai aûmbîîte, bantû a batûmîkîra Mûûmbi wa bio, ûra aagîrîtwe akumagua tene na tene. Aameni. 26Bakûrûtha ûgu Ngai abatiganîria barûtha bûra mawîrirîîria mamu maao ma mantû ma îgi maabeeraga barûthe. Wana aka baatiga kûmaama na arûme ta bûra gûkaraga, baatua kûmaama na aka ta bo. 27Arûme na bo baatiga kûmaama na aka ta bûra gûkaraga, baatua gûkuyaga i bata ya antû arûme bara bangî. Baarûthanaga na arûme bara bangî mantû ma îgi. Ûntû bûbu bwatûma boona thîîna mîîrî yao, rîrî îkaanûkia rîra rîagîrîte kîrî bara barûthaga ûntû ta bûbu. 28Bagûkinyia a kûrega kinya kwenda kûmenya Ngai n'ûû, Ngai abatiganîria barûtha bûra mathûgaania mamu maao mataarî ara maarî maabeeraga barûthe. I kîo n'ûntû baarûthire mantû bataabatîîrue barûtha. 29Mantû monthe mara baarûthaga maarî wîyia bwa mûthemba unthe, ûthûûku, kuugîria ûtonga, na rûmena. Baatwîrie rûriitho, ûûragani, nkarari, wenania, kûthûgaananagîria ûthûûku, nguutû, 30kwaragia bara bangî na gûtuuyanagîîra. Batiendeete Ngai. N'arumani, n'eekumia na n'antû ba kwîbûkagîîria. Rîonthe bacûaga njîra ingî cia kûrûtha ûthûûku bakaburûtha na batiathîkagîra aciari baao. 31I baataku, batiingagia mawîrane maao, batirî bata n'antû, na batirî kîao na bo. 32Ibaiyî watho bwa Ngai buugîîte bara barûthaga mantû ta mamu baagîrîtwe bakua. Îndî amwe na ûgu batitiga kûmarûtha. Na tatiga ûgu, boonaga bara barûthaga mantû mamu ûtiîgagua bakîbîtia.

will be added

X\