KÛGWÛRÎRWA 7

1Nyuma ya kwona mantû mamu, ndacooka ndoona araîka bana barûngi nteere irî inya cia nthîgûrû, barigîîrîîtie ruuo rûtikaume nteere irî inya rûbuutana nthîgûrû, kana îriani, kana rwenyenyia mûtî. 2Ndacooka ndoona mûraîka ûngî auma bwa uumîîro bwa riûa arî na mûûri wa Ngai, mûtûûra mwoyo. Eera na kayû kaaraaya araîka babu bana, bara Ngai eete inya ya kwînyangia nthîgûrû na îria, 3"Bûtikeenyangie nthîgûrû, kana îria, kana mîtî twambe twîkîre bara batûmîkagîra Ngai wetû rwano ûthiû." 4Ndathikîîria ndeegua kwaugwa ûtari bwa antû bara beekîîrwe rwano. Baarî antû ngiri îgana rîmwe, mîrongo îna na bana (144,000), bonthe kuuma kîrî wakîra mwîrîga wa Isiraeri. 5Baba i bo beekîîrwe rwano: Kuuma kîrî mwîrîga wa Njunda, antû ngiri îkûmi na ciîrî. Kuuma kîrî mwîrîga wa Rubeni, antû ngiri îkûmi na ciîrî. Kuuma kîrî mwîrîga wa Ngandi, antû ngiri îkûmi na ciîrî. 6Kuuma kîrî mwîrîga wa Aceri, antû ngiri îkûmi na ciîrî. Kuuma kîrî mwîrîga wa Nabutaari, antû ngiri îkûmi na ciîrî. Kuuma kîrî mwîrîga wa Manase, antû ngiri îkûmi na ciîrî. 7Kuuma kîrî mwîrîga wa Simioni, antû ngiri îkûmi na ciîrî. Kuuma kîrî mwîrîga wa Raawî, antû ngiri îkûmi na ciîrî. Kuuma kîrî mwîrîga wa Isakaari, antû ngiri îkûmi na ciîrî. 8Kuuma kîrî mwîrîga wa Saburoni, antû ngiri îkûmi na ciîrî. Kuuma kîrî mwîrîga wa Njosebu, antû ngiri îkûmi na ciîrî. Kuuma kîrî mwîrîga wa Benjameni, antû ngiri îkûmi na ciîrî. 9Nyuma ya ûgu, ndacooka ndoona ntundu înene mûno ya antû batatarîka barûngi mbere ya gîtî kîa ûnene na mbere ya Kagondu. Baarî antû kuuma nthîgûrû cionthe, mîgongo yonthe, rangi cionthe, na nthiomi cionthe. Beekîrîte ndwambambio injerû bagwete nkîndû na njara. 10Baugaga na kayû kaaraaya, "Wonokio buumaga kîrî Ngai wetû ûra akarîrîte gîtî kîa ûnene, na kîrî Kagondu." 11Ndacooka kaîrî ndoona araîka bonthe barûngi bathiûrûkîîrîîte gîtî gîku kîa ûnene, akûrû bara, na biûmbe bira bina. Ndoona baaturia maru beendamîîtie moothiû maao nthîgûrû barî agu mbere, baagonga Ngai 12bauga, "Tene na tene Ngai wetû aroogongagwa, arookumagua, ûûme bwake bûroonekanaga bûra bûgana, aroocookagîrua nkaatho, arootîîyagwa, na inya yake îroonekanaga bûra îgana. Aameni!" 13Ûmwe wa akûrû bara ambûûria, "I ba ûû baba beekîrîte ndwambambio injerû, na i kû baumîîte?" 14Ndamwîra, "I woû wiyî, mûnene." Mûkûrû ûyu aambîîra, "Baba n'antû bara baumîîte kînyamaaraani kîînene. Bathambîîtie ndwambambio ciao na nthakame ya Kagondu ciatuîka injerû. 15Na gîku i kîo n'ûntû barî aaga mbere ya gîtî kîa ûnene, kîa Ngai. Bamûgongagîra nyomba yake mûthenya na ûtugû. Ûra akarîrîte gîtî kîa ûnene agaatûûrania na bo akîbamenyagîîra. 16Batikooro beegua yûûra kaîrî kana bûûta. Batiibea i riûa kana beegua mwanki wa kûbathûûkia. 17Na gîtûmi i kwîgua Kagondu gaka karî aaga gîtîîni kîa ûnene i ko gakeegua karî mûrîîthi wao. Gakaabatongoragîîria gakabaira inyakaani bia rûûyî rûra rûtûûragia muntû mwoyo. Ngai akabagiria yethori rîonthe baaroîtûûra."

will be added

X\