KÛGWÛRÎRWA 5

1Ndacooka ndoona îbuku njaraani ya ûrîo ya ûra aakarîrîte gîtî gîku kîa ûnene. Îbuku rîru rîarî na maandîko mbarî irî ciîrî na rîatumanîîtue na mûûra maita mûgwanja. 2Ndoona mûraîka oonanagia naarî na inya înene aûria na kayû kaaraaya, "N'ûû aagîrîte ûntû arûmûra mûûra ûyû ûgwatithanîîtie îbuku rîrî akarîkûnjûra?" 3Îndî gûtooneka akîûmba kûrîkunûra kana arîcûûba gûku îgûrû, nthîgûrû, kana rungu rwa nthîgûrû. 4Gûgûtuîkîka gûtooneka aagîrîte wa kûrîkunûra kana wa kûrîcûûba ndeni, ndarîra mûno. 5Ûmwe wa akûrû bara aambîîra, "Tiga kûrîra! Cimba ya mwîrîga wa Njunda, ya rûrîîyo rwa Ndaundi naûmbanîîte. Kwoogu we nwa arûmûre mûûra ûyû ûrîgwatithanîîtie maita mûgwanja, akarîkunûra." 6Na ndacooka kaîrî ndoona kagondu karûngi gatîgatî ka bo bonthe, gakari taka kaarî kaûrage. Kaarî na ngoci mûgwanja na meetho mûgwanja. Na meetho mamu mûgwanja n'irundu mûgwanja bia Ngai bira biatûmirwe nthîgûrû yonthe. 7Ndoona Kagondu kaaya kaathûkia îbuku rîru rîarî njaraani ya ûrîo ya ûra aakarîrîte gîtî kîa ûnene. 8Gakûthûkia rîo, biûmbe bira bina na akûrû bara mîrongo îîrî na bana bagaturîria maru. Na wakîra ûmwe wa akûrû babu naarî na wandîndî ya ndigi inyingî, na mbakûri cia thaabu ciûyûri macoco. Macoco mamu moonanagia maromba ma antû ba Ngai. 9Akûrû babu na biûmbe bira bina bainîra Kagondu rwîmbo rûûgeni. Rwaugaga, "Nwagîrîte wa kûnenkerwa îbuku rîru na wa kûrûmûra mûûra, n'ûntû nwaûragirwe, watûkûûra na nthakame yaku twatuîka ba Ngai, tiû antû ba mîîrîga yonthe, nthiomi cionthe, rangi cionthe, na mîgongo yonthe. 10Ûtûtuîkithîîtie antû ba ûnene bwaku, tûrî athînjîri baaku, tûkaathana nthîgûrû." 11Ndacooka ndacûûba ndoona araîka baingî bathiûrûkîîrîîte gîtî kîra kîa ûnene, biûmbe bira bina na akûrû bara. Baarî araîka ngiri itatarîka. Ndeegua 12bauga na inya îra nene, "Kagondu kara kaûragirwe ikaagîrîte ga kwonwa karî ûûmbani, ûtonga, ûûme, na kaagîrîte ga gûtîîywa, kûgongwa na gûkumua." 13Bakuuga ûgu biûmbe bionthe bia gûku îgûrû, bia nthîgûrû, bia rungu rwa nthîgûrû na bia îria, ndeegua biauga, "Ûra akarîrîte gîtî kîa ûnene barî na Kagondu baroogongagwa, barootîîyagwa, barookumagua, na inya yao îroonekanaga bûra îgana tene na tene." 14Bakuuga ûgu, biûmbe bira bina biauga, "Aameni." Akûrû baaturîria maru ûyu aakarîrîte gîtî kîa ûnene na Kagondu, babagonga.

will be added

X\