KÛGWÛRÎRWA 2

1Ûyu ndeene akari ta mwana wa muntû aambîîra, "Andîkîra mûraîka wa kanica ya Ebeeso ûmwîre mantû mama." Mwîre, "Ûra agwete nthata mûgwanja na njara yake ya ûrîo akîriûngariûngaga ara itugî mûgwanja bia thaabu birî bira bitûûgîîrîîtue taa, ariuga ûûgû. 2Imbiyî bûra ngûgî îra ûrutaga îkari. Na imbiyî ûrutaga ngûgî na inya mûno ûtagûkua nkoro. Imbiyî ûtiendaga kwona bara barûthaga mantû maathûûku. Na nûgereetie bara baugaga n'atûmwa na ti bo, woona ibarongoaga. 3Wonaga mathîîna maingî ûkaûmîîria n'ûntû bwakwa ûtakûnoga. 4"Îndî kûrî ûntû bûtagûnkenia. Ûtirî na wendo bûra warî na bu mbereeni. 5Kwoogu ririkana bûra wakari mbereeni. Îrire ûcooke kûrûtha bûra warûthaga mbereeni. Weegua ûtiîrira, nkaaya ndute taa agu îrî. 6Îndî kûrî bu ûkûrûtha bwagîrîte. Nûthûîre ûgu Anikoraitani babu bakûrûtha. Na kinya niû inthûîre ûgu. 7"Ûra arî na matû neegue bûra Kîrundu akwîra makanica. Ûra akaûmbana nkamwîtîgîîria kûrîa matunda ma mûtî wa mwoyo mûndaani wa Ngai. 8"Na andîkîra mûraîka wa kanica ya Simaana ûmwîre mantû mama." Mwîre, "Ûra eetagwa mbere na mûthia, ûra aakuire na acooka gûtûûra mwoyo kaîrî, ariuga ûûgû. 9Imbiyî nûkûnyamaarua na ûtirî gîtonga, îndî ûrî gîtonga gîîkîrundu! Imbiyî bûra bara beebîtaga Ayaundi baaragia mantû maathûûku îgûrû rîaku. Baugaga bo n'Ayaundi, îndî t'Ayaundi bongwa. Bo i sinagoogi ya Saitaani. 10Ûtikaamakue i mantû mara meengeerie gûkûûyîîra makûnyamaarie. Ga ngûkwîra, Nkoma îgaatûma bamwe beenu bûthaîkwa nceera îkîbûgeria. Kûnyamaarua kûra bûkaanyamaarua i gwa ntugû îkûmi. Îndî îthi na mbere kwîgua ûrî na wîtîgio wana weegua nûgaakua, naani ngakwa mwoyo ûrî kîewa. 11"Ûra arî na matû neegue bûra Kîrundu akwîra makanica. Ûra akaûmbana, gûtirî bu gîkuû kîa maîrî gîkaamûrûtha. 12"Na andîkîra mûraîka wa kanica ya Pagamamu mantû mama." Mwîre, "Ûra arî na rûyiû rûûgî mbarî cionthe ariuga ûûgû. 13Imbiyî bûra ara ûtûîre gûkari. Ara ûtûîre noogo Saitaani yandîîte nkunyû, îndî woû wîtîgio bwaku bûrî kîrî niû. Kinya îgiita rîra Antipas, mûkûûyî wakwa wa mma aûragîîrwe naagu, agu Saitaani îtûûraga, ûtankaana. 14"Îndî kûrî mantû matagûnkenia. Antû bamwe baaku bathingataga moorutani ma Mbaraamu. Kîroria gîku kîa ûrongo i kîo kîarutanire mûnene wa Moabu ûra eetagwa Mbaraki, bûra akaarûtha atûme Aisiraeri beeyia. Aatûmire beeyia na njîra ya kûrîa irio birutîrîtwe ngai cia ûrongo na njîra ya kûruta ngûgî cia ûmaramari. 15Na kûrî antû bangî baaku na bo bathingataga ûrutani bwa Anikoraitani. 16Kwoogu îrire. Weegua ûtiîrira inkûûya warîru ndûe na bo na rûyiû rûrû ndûmîîte na kanyua. 17"Ûra arî na matû neegue bûra Kîrundu akwîra makanica. Ûra akaûmbana nkamwaa irio bira biîtagwa mana, bira biithe na mmwe iiga rîîyerû rîandîkîîtwe riîtwa rîake rîîgeni. Na gûtirî ûngî akaamenya riîtwa rîru tatiga ûra akeewa rîo. 18"Na andîkîra mûraîka wa kanica ya Thiatira mantû mama." Mwîre, "Ûra arî na meetho magwakana ta mwanki na magûrû makari ta gîkama, ta we Mwana wa Ngai, ariuga ûûgû. 19Imbiyî bûra ngûgî îra ûrutaga îkari. Imbiyî bûra wendo bwaku bûgana, bûra wîtîgio bwaku bûgana, bûra ûndutagîra ngûgî bûgana, na bûra kûûmîîria gwaku kûgana. Na imbiyî mantû mara ûrûthaga îgiitaani rîrî imakûrûkîîte mara warûthaga mbereeni. 20"Îndî kûrî ûntû bûtagûnkenia. Nûrekeereetie Njecebeeri, mûka ûra eebîtaga kîroria, arutana aruti ngûgî baakwa ûrutani bwa ûrongo. Na kuumania na moorutaani maake, n'we atûmîîte antû baakwa beeyia wîyia bwa ûmaramari, na bwa kûrîa irio birutîrîtwe ngai cia ûrongo. 21Mmweete kaanya ga kwîrira, îndî atikwenda kwîrira wîyia bwake. 22Na kwoogu we na bara bonthe beeyagia ta we bakaanyamaara mûno. Na baarega kwîrira mantû mara barûthaga, ngaatûma bamaama batakuuma ûrîrî i kînyamaara kîra nkaabaa, 23na mbûrage athingati baake. Rîru i rîo makanica monthe makaamenya i niû ncûnkûûnaga nkoro na mathûgaania ma antû. Na nkaa wakîra ûmwe wenu kîewa kûringana na ngûgî ciake. 24Îndî kûrî bo bacienu, biû Athiatira, bara bûtathingataga moorutani mamu maake na bûteendeete kûmenya bûra bamwe beetaga mawitho ma Saitaani ma ndeni. Ga nkûbwîra biû gûtirî bu bûngî nkûbwîra bûrûthe, 25tatiga kûbwîra bûthi na mbere kwîrikia wîtîgioni bwenu mwanka rîra nkaaya. 26"Ûra akaûmbana athi na mbere kûmbathîkîra mwanka mûthia, nkamwaa watho bwa kwatha mîgongo yonthe 27atarî na mathee, na akeegua arî na inya ya kûmîthiria. Nkaamwaa inya na watho ta bûra Baaba aampeere. 28Na nkamwaa nthata îra yonekaga rûkîîrî gûgîkea. 29Ûra arî na matû neegue bûra Kîrundu akwîra makanica.

will be added

X\