KÛGWÛRÎRWA 17

1Ûmwe wa araîka babu mûgwanja, babu baarî na mbakûri mûgwanja aaya aaria naani. Aambîîra, "Ncû nkwonie îkaanûkia rîra rîkeewa îrwaya rîra rînene, rîra rîkari rûteere rwa rûûyî rwingî mûno. 2Anene ba nthîgûrû ibaamaamire na rîo, baaruta ngûgî ya ûmaramari na rîo. Antû nthîgûrû ibaatogoonu i ndibei ya ûmaraaya bwa rîo." 3Mûraîka ûyu aanthûkia na njîra ya gîîkîrundu, aambira rwanda. Akûmbira noogo, ndoona mûka akarîrîte nyamû întuune. Nyamû înu yaandîkîîtwe mariîtwa ma kûrumanga Ngai maûyûra mwîrî teke. Yarî na biongo mûgwanja na ngoci îkûmi. 4Mûka ûyu eekîrîte nguo cia rangi ya ûkûyû na întuune, eegemia na thaabu, twiga twa goro, na ruru. Aagwete gîkombe kîa thaabu kîûyûri mantû matakenia Ngai na marûko ma ûmaramari bwake. 5Na kûrî mariîtwa aandîkîîtwe ûthiû maarî kîriga. Îrwaya rîru rîandîkîîtwe, "Mbabironi, taûni îra nene, gina wa marwaya na wa mantû ma nthîgûrû matakenia Ngai." 6Mûka ûyu naatogooneete i kûnyua nthakame ya antû ba Ngai na ya bara barî eetîgua kîrî Yiesû. Nkwona mûka ûyu ndarigara mûno mûno. 7Mûraîka aambûûria, "I mbi îgûkûrigaria ûûgû? Ngakuumbûrîra kîriga kîra kîrî oogo îgûrû rîa mûka ûyû na nyamû îno atwete îrî na biongo mûgwanja na ngoci îkûmi. 8Nyamû îno nîarî mwoyo, îndî îtirî mwoyo îîndî. Îkaarîûka yume îrinyaani rîra rîorokeru mûno. Yariûka, bara batûîre nthîgûrû, bara mariîtwa maao mataandîkwa îbukuuni rîa mwoyo mbere ya kûûmbwa kwa nthîgûrû bakaarigara bamîona. Îndî îkaathirua. 9"Ûtarî mwe ûûme ûticiûkîrwa i mantû mama. Biongo mûgwanja n'irîma mûgwanja kûra mûka ûyû akaraga, na n'anene mûgwanja. 10Bataano ba anene babu ibaathirie. Ûmwe wa anene babu arî oogo, na ûyu ûngî atikûrî akuumîra. Rîra akaumîra, nwa mwanka agaakarakara kagiita gaakai. 11Nyamû îra yarî mwoyo îndî îtirî mwoyo îîndî, n'yo îkeegua îrî mûnene wa banaana, îndî nîkaathirua. Na nyamû înu n'ûmwe wa anene bara mûgwanja. 12"Ngoci îkûmi n'anene îkûmi. Bo batikûrî bakwewa inya ya wathani. Îndî bakeewa yo baathane na nyamû înu îthaa rîmwe. 13Na mworooto wao n'ûmwe. Bakaa nyamû înu inya yao ya kwathana. 14Bagaûkia ndûa barûe na Kagondu, îndî Kagondu nakaabacinda n'ûntû n'we Mwathani wa aathani na mûnene wa anene. Bara ûkeegua bakîgwatia Kagondu ndûa, i bara bathuurîîtwe, beetwa, bara barî eetîgua." 15Mûraîka aacooka aambîîra, "Rûûyî rûûra rîkari rûteere rwa ru, n'antû ba rangi cionthe, kîrîndî gîa antû, mîgongo yonthe, na antû ba nthiomi cionthe. 16Ngoci îkûmi na nyamû mbene ikaamena îrwaya rîrî. Bagaatiga îrwaya rîrî rîtarî gîntû, rîrî ûtheri, irîe nyama cia mwîrî wa rîo, irîbîîthie na mwanki. 17Ûkeegua ûrî mûbango wa Ngai ngoci kûrûtha ûgu ikaarûtha. N'we akeegua atûmîîte ciîtîganîîria kwaa nyamû înu inya ya cio ya kwathana mwanka rîra bûra Ngai augîîte bûûyûre. 18Mûka ûyû i taûni îra nene, îra yathaga anene ba nthîgûrû."

will be added

X\