KÛGWÛRÎRWA 13

1Ndacooka ndoona nyamû yatiibûka îriani. Nyamû înu yarî na ngoci îkûmi, na wakîra rûgoci irweekîrîtwe nthûmbî ya ûnene. Na yarî na biongo mûgwanja. Na wakîra kîongo kîandîkîîtwe riîtwa rîa kûruma Ngai. 2Nyamû înu ndoonire yakari ta ngo. Yarî na mathu maakari ta ma ndû, na kanyua gaakari ta ga cimba. Njoka înu yarî nene ûgu yanenkera nyamû înu inya ya yo, gîtî kîa yo kîa ûnene, na inya înene mûno ya wathani. 3Kîongo kîmwe kîa nyamû înu gîakari taka kîarî kîîmunte bwa kûrigaria, gîakua kûrû, îndî îmuntîrwa rîru rîora, kîongo kîabua kaîrî. Kîrîndî kîa nthîgûrû yonthe kîarigarua i nyamû înu, gîatuîka athingati ba yo. 4Kîagonga njoka înu yarî nene ûgu n'ûntû bwa inya înu ya yo yeere nyamû înu. Baagonga nyamû înu, bauga, "N'ûû aganaane na îno? N'ûû amîota?" 5Nyamû înu yeewa watho bwa kwaria mîgambo îmîthûûku mûno ya kûrumanga Ngai. Yeetîgîîrua mîeri mîrongo îna na îîrî îrûtha wabûra îkwenda. 6Ndoona yaatîka yaruma Ngai, kûra atûûraga, na bara batûîre îgûrû. 7Yeewa watho bwa kûrûa na antû ba Ngai îkaboota, inya ya kwatha mîgongo yonthe, antû ba rangi cionthe, nthiomi cionthe, na nthîgûrû cionthe. 8Antû bonthe bamîgonga bara baatûîre nthîgûrû, bara mariîtwa maao mataandîkwa îbukuuni rîa mwoyo mbere ya nthîgûrû yûmbwa. Îbuku rîru rîa mwoyo, i rîra rîa Kagondu kara kaûragirwe. 9Ûra arî na matû neegue. 10"Ûra arî mûtagwa, nagaataîgwa. Ûra arî mûûragwa na rûyiû, nakaûragwa na ru. Ûgu i ta kwonania, bara ûkeegua barî antû ba Ngai bakeendekana beegua barî na kûûmîîria na wîtîgio." 11Ndoona nyamû îngî yatiibûka nthîgûrû. Yarî na ngoci ciîrî ta cia gatûrûme, na kayû ka yo keeguîkaga ta ka njoka îra nene mûno. 12Yatûmagîra inya ya nyamû îra ya mbere, îgatûma antû ba nthîgûrû bagonga nyamû înu ya mbere, îra yarî na kîronda kîra. 13Antû bakîonaga, nyamû înu yaringa biama bia kûrigaria, ta gûtûma mwanki ûkauma îgûrû mwanka nthîgûrû. 14Yeeneeria antû ba nthîgûrû na biama bibu yaringaga kuumania na inya îra yeetwe i nyamû înu îngî îmîringîîra bio. Yeera antû nwa mwanka barûthe mûbuanaano wa nyamû înu yamuntîîtwe kîongo kîmwe na rûyiû, gîakua, îndî gîacooka kîabua. 15Yeewa inya ya gwîkîra mûbuanaano ûyu mwoyo. Mûbuanaano ûyu watua kwaria na ûkîûraga bara bataugonga. 16Nyamû înu yeekîrithia antû bonthe rwano njara ya ûrîo kana ûthiû, baanene na baaniini, itonga na nkîa, nkombo na bara batarî nkombo. 17Gûgûkarîka ûgu, gwatuîka gûtirî muntû akîgûra kana eendia gîntû atarî na rwano rûru. Na rwano rûru i riîtwa rîa nyamû înu kana namba ya riîtwa rîa yo. 18Ûtitaûra rwano rûru ûtarî mwe ûûme. Ûra mûûgî nacerie amenye kîra namba înu îrûngamîîrîîte, n'ûntû namba înu îrûngamîîrîîte riîtwa rîa muntû. Namba înu i magana mathanthatû ma mîrongo îthanthatû na ithanthatû (666).

will be added

X\