KÛGWÛRÎRWA 12

1Magegania ma kûrigaria moonekana gûku îgûrû. Maarî mantû ma mûka eekîrîte riûa ta nguo, mweri ûrî rungu rwa magûrû maake, na eekîrîte nthûmbî ya ûnene îrî na nthata îkûmi na ciîrî. 2Na mûka ûyu naarî na nda. Aatua gûkaya na inya i rûgakaî arî akubî gûciara. 3Magegania mangî moonekana gûku îgûrû. Kwoneka njoka întuune, înene mûno. Njoka înu yarî na biongo mûgwanja na wakîra kîongo ikîarî na nthûmbî ya ûnene. Na nîarî na ngoci îkûmi. 4Njoka înu yakondoria na mûtiro wa yo nthata gîcuncî kîmwe kîa bithatû kuuma îgûrû ciagwa nthîgûrû. Yarûngama agu mbere ya mûka ûyu aarî akubî gûciara kaingo aaciara îrîa kaana. 5Mûka ûyu aaciara mwana wa muntû mûrûme ûra akaatha nthîgûrû cionthe atarî na mathee. Kaana ka mûka ûyu kaatharwa geetithua kîrî Ngai, kairwa ara gîtî gîake kîa ûnene kîrî. 6Mûka ûyu augia rwîro aathi gûkara rwanda, bantû Ngai aamûthuuranîrîte. Agu noogo aakarire ntugû ngiri îmwe na magana maîrî ma mîrongo îthanthatû (1,260) waakîmenyagîîrwa. 7Ndûa yaûka gûku îgûrû. Mûraîka Mikaeri aateetheerua n'araîka baake kûrûa na njoka înu. Njoka n'yo yateetheerua n'araîka ba yo kûrûa na bo. 8Njoka înu îtaacinda. Îgûcindwa, gwatuîka yo na araîka ba yo batigîîtîgîîrua bakara îgûrû kaîrî. 9Njoka înu nene mûno yeengatua gûku îgûrû. Na njoka înu n'yo îtûîre yîtagwa Nkoma kana Saitaani. N'yo yenagîîria antû ba nthîgûrû yonthe. Yeengatiirue îgûrû amwe na araîka ba yo. 10Ndeegua kayû kaagondoka gûku îgûrû kauga, "Îîndî i kagiita ka Ngai wetû kwonokania, kwonania inya yake, ûnene bwake, na wathani bwa mûthuure Kîrîstû, n'ûntû ûra athitangaga aruayia na aarayia akwîngatua. Arabathitangaga kîrî Ngai wetû mûthenya na ûtugû. 11Aruayia na aarayia baramûcindire kwa inya ya nthakame ya Kagondu na gûtûmîîria ûmma. Batiramakagîra mîoyo yao. Batigîkuthûka gûkua. 12Kwoogu, îgûrû kena, na bonthe bara bûrî ku. Irû, yîî kûrû nthîgûrû na îria! Nkoma yaya îthûûri mûno n'ûntû nîkûmenya îtirî na kagiita karî thau." 13Njoka înu nene mûno îkwona îkwîngatua yagerwa nthîgûrû, yageria kûgwata mûka ûra aaciarire kaana kara ga kaîyî. 14Mûka ûyu eewa mathabu maîrî ta ma ndiû înene mûno, kaingo abuurûûka athi bantû ara aarûthîrîtwe akara, rwanda. Mûka ûyu aarî akare bantû agu akîmenyagîîrwa na arigîîrîîtue njoka înu kwa îgiita rîgana ûna, na rîngî ta rîo, na rîngî ta rîo kaîrî na nucu. 15Njoka înu yathûrîra na kanyua mûka ûyu rûûyî ta rwa muuro, îkîgeria kûmûkondoria na ru. 16Mûka ûyu aateethua i nthîgûrû. Nthîgûrû yatîkire yameria muuro ûyu waumaga kanyuani ka njoka înu. 17Gûgûkarîka ûgu, njoka înu yathûûra i mûka ûyu. Yauma agu yathi kûrûa na nciarwa ciake ira ingî, ira ciathîkagîra maathana ma Ngai, ira irî akûûyî ba Yiesû. 18Ndoona njoka înu nene ûgu yarûngama kîthangaani rûteere rwa îria.

will be added

X\