APIRIPI 3

1Na bûngî na bu, aruayia na aarayia, kenagaani n'ûntû bwa kwîgua bûrî ndeni ya Mwathani. Ntikwona îrî thîîna gwakwa kûbwandîkîra mantû ndabwandîkîîre kaîrî, n'ûntû i mantû marî na gîtûmi kîrî biû. 2Îmenyeereeni mûno kîrî antû bara barûthaga mantû maathûûku. Batikari t'antû bakari ta kurû. Na bakenagîîra gûtema mîîrî ya antû na njîra ya kûbataana kûringana na watho bwa Ayaundi. 3Tiû i tiû tûtaanîîtwe rûtaano rwa mma. Tûgongaga Ngai tûrî na Kîrundu na tûkumagia Kîrîstû Yiesû. Kûringana na wîtîgio bwetû tûtiîgwatia kîîmuntû, 4amwe na kwîgua niû nkeenda ntiaga gîa kwîgwatia. Ûra akûthûgaania arî na itûmi bia gûtûma eegwatia mantû ma kîîmuntû, nkeenda itûmi biakwa i bio bingîa nkûrûki ya biake. 5Nwa mbuge ndataanirwe ndî na ûkûrû bwa ntugû inyanya. Gûciarwa, ndî Mwisiraeri wa rûrîîyo rwa Benjameni, na ndî Mwîbirania kanyinyari amwe na aciari baakwa. Na mantûûni ma kwathîkîra watho, ndarî Mûbarisai wengwa. 6Indakenagîîra mûno kûnyamaaria eetîgîri. Na indamenyagîîra mûno kwathîkîra watho, bûra gûtarî we akînduta mabîtia. 7Îndî mantû monthe mara ndoonaga marî gîtûmi mûno, îîndî mmoonaga marî mootheri kuuma nkûmenya Kîrîstû. 8Na ti mantû mamu monka. Mantû monthe i mootheri mmaganaanîîtie na baita ya kûmenya Kîrîstû Yiesû Mwathani wakwa. N'ûntû bwa Kîrîstû, intiganîîte na mantû mara mangî monthe. Mantû mara mangî monthe mmoonaga marî ma rûko kaingo nkara na Kîrîstû wenka, 9na mbîgua ndî kîmwe n'we cwe. Indatigire gwîtuîkithia ûmwagîru na kûthingata watho. Îîndî ndî ûmwagîru kuumania na wîtîgio bwakwa kîrî Kîrîstû. Na i Ngai antuîkithîîtie ûmwagîru n'ûntû bwa wîtîgio bwakwa. 10Îîndî bûra nkwenda i kûmenya Kîrîstû na kûmenya inya ya kûriûka gwake. Ndîenda kwîgua ndî na ngwatanîro n'we kûnyamaaruani kûra aanyamaariirue na nkua gîkuû ta gîake 11mbona mwoyo rîra nkaariûkua na njîra nna. 12Tika nkuuga ûntû bûbu ibûtuîkîkîîte, ndî ûmwagîru kûrû. Ntikûrî kwingia yerekeeria rîru. Ingûcûûgia na inya mûno kwingia rîo kîra mbîtîrîtwe gîtuîka gîakwa n'ûntû i kîo gîatûmire Kîrîstû aantuîkithia wake. 13Aruayia na aarayia, niû ningwa imbiyî ntikûrî nkwewa kîra mbîtîrîtwe. Bûra ndûthaga, ka ndiganagîrua i mantû mara maakûrûkire. Ngeragia na inya mûno kûrûtha mara mbagîrîtwe kûrûtha îîndî. 14I ta kuugia mbugîîtie rwîro ntagûtangatanga ntarîîte rûrigi, kaingo mpeewa kîewa kîra Ngai ambîtîrîte îgûrû gûkûrûkîîra kîrî Kîrîstû Yiesû. 15Ûgu i bu twagîrîtwe tûthûgaanagia, bara tûrî baakûrû gîîkîrundu. Ûkaaya kwîgua kûrî we atakûgwatanîra na ûgu, Ngai agaatûma aciûkîrwe. 16Îndî nwa mwanka tûthingate ûmma bûra twiyî, bûtûtongoragîîrie mîtûûrîreeni yetû. 17Aruayia na aarayia, karagaani bûra bwonaga nkari. Nthûkiani ndî ngerekano. Raithagaani bwega bûkoona bûra bara barî mîkarîre yagîrîte bakaraga, bara barî mîkarîre îkari bûra bwonire tûkari. 18Ndarabwîra kaîrî na kaîrî, îndî ka mbwîreeni kaîrî ngîîtûûraga meethori atî, n'antû baingî boonanagia n'anthû ba mûtharaba wa Kîrîstû kuumania na mîkarîre yao. 19Îndî na bo ibakaathirua mûthiani. Nda ciao i cio batûmîkagîra irî ngai na beekumagia na mantû mara barûthaga batakwona marî îgi. Bathûgaanagîria wamantû ma ûtûûro bwa gûkû nthîgûrû monka. 20Îndî tiû tûrî ba îgûrû. Ga tweteereete Mwonokia wetû, Mwathani Yiesû Kîrîstû auma îgûrû aaya. 21Rîra akaaya agatûgarûra mîîrî îgîe mwago ta wa mwîrî wake kwa inya îra agaatûmîra kwatha bionthe.

will be added

X\