APIRIPI 2

1Kwîgua bûrî ndeni ya Kîrîstû ikûbwîkagîra wîru? Î wendo bwa Kîrîstû ibûbûûmagîîria? Bûrî ngwatanîrooni îmwe ya gîîkîrundu? Ibwîgagua bûrî na nkoro imbega cia kwîganîîrua kîao? 2Na n'ûntû i bu kûrî, tûmagaani nkenaga mûno na kwîgagua bûrî na mathûgaanio mamwe, wendo bûmwe, na bûgwatanîrîte meerekeeriani meenu. 3Bûtikaarûthe ûntû na rûriitho kana wîkumia. Muntû nenyiagie kîrî ûra ûngî, na nathûkagie bara bangî ta bo barî gîtûmi nkûrûki yake. 4Bûtikaathûgaanagîrie wamantû meenu monka. Thûgaanagîriani ma bara bangî wana mo. 5Bûbatîîrue bwîgua bûrî na mathûgaanio ta ma Yiesû Kîrîstû na bûkara ta we. 6Kîrîstû aakari ta Ngai mantûûni monthe. Îndî amwe noogu, eerekeeria na baganeene na Ngai. 7Aaciarirwe arî muntû, eetuîkithia gîntû gûtarî, aatuîka mûruti ngûgî. 8Agûtuîka muntû, eenyithia, aathîkîra Ngai mwanka aakua, gîkuû kîra aakuire mûtharabaani. 9Na gîku i kîo gîatûmire Ngai amûneneithia mûno na amwaa riîtwa rîra rîrî îgweta nkûrûki ya mariîtwa mara mangî monthe. 10Na i kîo n'ûntû bwa riîtwa rîake biûmbe bionthe bikaamûturîria maru. Biûmbe bira birî îgûrû na antû bonthe barî nthîgûrû bara ûkeegua barî mwoyo na bara bakaariûkua bakamûturîria maru. 11Na wakîra kîûmbe gîkauga Yiesû Kîrîstû i Mwathani, bikumithie Ngai Baaba. 12Kwoogu, aruayia na aarayia, rîonthe ibwamenyagîîra bûkambathîkîra rîra ndarî kwenu. Îndî îîndî ntarî amwe naabi i rîo bûbatîîrue bûmenyeera mûno nkûrûki kwathîkîra bûra nkûbwîra. Îrutagaani ngûgî imbega bûgîkuthûkaga Ngai mûno mûtûûrîreeni wenu wa wonokio. 13I Ngai akûruta ngûgî ndeni yenu akîbweyaga wendi na akîbûûmbithagia kûrûtha bûra bûmûkenagia. 14Rûthagaani mantû monthe bûtakûnung'una kana bûtagûkararia, 15kaingo bûtuîka aana ba Ngai baatheru batarî na mabîtia. Bûtûûraga na antû batarûthaga bûra kwagîrîte, antû ba meeyia. Werû bwa mûkarîre wenu ûbathararagîra ta bûra werû bûthararaga mwinduuni. 16Gwataani ntheto îra yeyaga antû mwoyo bûmiitie kaingo mbûkeneera ntugû îra Kîrîstû agaacooka. Bûbu i bu bûkoonania ngûgî îra ndutîîte kîrî biû t'ya mana. 17Na wana kinya ûkeegua inkwîrwa mbûragwe mbûyûrîîrie kîgongwana kîa ngûgî yenu kîra bûrutagîra Ngai n'ûntû bwa wîtîgio bwenu nwa nkene. Na kwoogu ingûkeneera bûgîkeneera bwinthe. 18Na bûbatîîrue bûkena n'ûntû bwa bu amwe naani. 19Weegua i kwenda kwa Mwathani Yiesû, inkwîrîgîîra gûtûma Timotheo kîrî biû nyuma ya îgiita rîtarî rîraaya kaingo ndamenya bûra bûrî ngîa wîru. 20Gûtirî muntû ûngî kîrî bara ndî na bo abûthûgaanagîria ta Timotheo. 21Bara bangî bonthe i mantû maao monka beendaga kûrûtha. Batiendaga kûrûtha mantû ma Yiesû Kîrîstû. 22Ibwiyî Timotheo we noonanîîtie bûra akari. Tûrutîîte n'we ngûgî ta mwana na îthe, n'ûntû bwa ntheto îmbega. 23Inkwîrîgîîra kûmûtûma kîrî biû na mpwî bûra kûûmbîka, ndatiga nkûmenya bûra mantû maakwa magaakara. 24Na ndî na mma Mwathani aganteethia mbûye ndî niû nyuma ya îgiita rîtarî rîraaya. 25Bwatûmire mûruayia Epabironditas aaya gûnteetheeria mantûûni maakwa. Tûrutaga ngûgî amwe n'we na nangwatagia kûrûîrîîra ntheto îmbega. Îndî ndîona imbagîrîtwe kûmwîra acooke kîrî biû. 26Ndîenda acooka kîrî biû n'ûntû nakwenda kûbwona mûno bwinthe. Arî na bata ya kwenda bûmwona n'ûntû naiyî ibûreegiirue bûra araayîîtue bûgana. 27I mma we naraayîîtue mûno, akubî akua. I Ngai aramwîgiirue kîao. Îndî t'we wenka, wana niû Ngai narambîgiirue kîao kaingo ntagwatwa i kîîthikîîro, n'ûntû agîkuire nkîgwatwa i kîîthikîîro kîînene. 28Kwoogu ndîenda mûno acooka kîrî biû bûmwona kaingo bûkena, na niû naani ntiga gûtangîka i bûra nkûmenya ibûkûthûgaania bûtamwene. 29Aaya mûkeneereeni n'ûntû i mûruti ngûgî wa Mwathani. Na tîîyagaani bara bakari ta we. 30Bûbatîîrue bûtîîya Epabironditas n'ûntû araarî akubî gûkuîra ngûgîîni ya Kîrîstû. Areebîkîrîte ûgwatiini bwa gîkuû kaingo anteethia. Na gûnteethia kûra aranteethiirie i kûra bwagîrîtwe bûnteethia.

will be added

X\