APIRIPI 1

1I tiû Paûrû na Timotheo tûkûbwandîkîra baarûa îno, tûrî aruti ngûgî ba Yiesû Kîrîstû. Tûrîbwandîkîra biû antû ba Ngai bûrî Piripi, atongoria beenu na ateetheeria bara bûrî ndeni ya Kîrîstû Yiesû. 2Ngai Baaba na Mwathani wetû Yiesû Kîrîstû baroobwaa ûtugi na ûkiri. 3Magiita monthe rîra mbûririkanaga incookagîria Ngai wakwa nkaatho. 4Na rîonthe rîra mbûrombagîra, mbûrombagîra bwinthe nkeneete, 5n'ûntû bwa bûra bûnteetheetie ngûgîîni ya gûtûmîîria ntheto îmbega kuuma ntugû îra bwamîîtîgîîre mwanka îîndî. 6Ngûgî îra Ngai aanjîîrie ndeni yenu i ngûgî îmbega. Na ndî na mma Ngai akaathi na mbere n'yo mwanka îthire, rîra Kîrîstû agaacooka. 7Imbagîîrue kwîgua ûgu îgûrû rîenu bwinthe, n'ûntû imbwendeete mûno. Ibûnteetheetie ngûgîîni îno ya mwanya, îra Ngai ampete nduta. Ibwanteethiirie kûrûîrîîra ntheto îmbega twonania n'ya mma na ibûgûnteethia ndî niû îîndî ndî nceera. 8Ngai naiyî n'ûmma nkwaria inkwenda kûbwona bwinthe n'ûntû imbwendeete na wendo bwa Kîrîstû Yiesû. 9Îromba rîakwa rîra nkûbûrombera i rîrî, atî wendo bwenu bûthi na mbere kwingîa, bwîgue bûrî na ûmenyo bunthe, 10na bûmenye kûthuura bûrûthage mantû mara meega kîrî monthe. Rîru i rîo bûgaatuîka antû baatheru, na batarî na mabîtia mwanka rîra Kîrîstû agaacooka. 11Na i rîo bûgaatuîka antû bakûrûthaga mantû maingî meega gûkûrûkîîra kîrî Yiesû Kîrîstû. Bwarûtha ûgu bûkoonania ibûgûtîîya Ngai na ibûkûmûkumia. 12Aruayia na aarayia, ndîenda bûmenya mantû monthe mara ndarûthîîrwe imaateethiirie ntheto îmbega yatamba. 13Acikaarî na antû bara bangî bonthe ba nyomba ya mûnene ibaiyî nthaîkîîtwe n'ûntû ndî mûthingati wa Kîrîstû. 14Na n'ûntû bwa kûthaîkwa gwakwa, eetîgîri baingî ibagîîte ûcamba mûno na batigûkuthûka gûtûmîîria ntheto cia Ngai. 15I mma antû bamwe batûmagîîria mantû ma Kîrîstû barî na rûriitho na bakîthetanagia. Îndî kûrî bara batûmagîîria n'ûntû bwa wendi bûra barî na bu. 16Na barûthaga ûgu na wendo, n'ûntû ibaiyî i Ngai ampete ngûgî ya kûrûîrîîra ntheto îmbega. 17Îndî kûrî babu batûmagîîria mantû ma Kîrîstû barî na itûmi bitarî biega. I bo bakwenda kûndeetera thîîna îîndî ndî nceera. 18Îndî nwîgue barîtûmîîria n'ûntû bwa itûmi biega kana biithûûku, bûbu t'ûntû. Bûra bûrî na gîtûmi n'atî, ntheto cia Kîrîstû nigûtûmîîrua na njîra cionthe. Kwoogu ingûkena na nkaathi na mbere gûkena. 19N'ûntû bwa maromba meenu na ûteethio bûra buumaga kîrî Kîrundu wa Yiesû Kîrîstû, ndî na mma nkaatharua mbuume nceera. 20Ndî na wîrîgîîro bûûnene mûno atî, kîrî bûra bunthe ndûthaga, gûtirî rîo nkaarûtha ûntû bwa kûmbîkîra nthoni. Na ûgu i bu nkaraga mbîrîgîîrîîte. Wîrîgîîro bwakwa n'atî, ngaakaraga na ûcamba bwingî mûno îîndî na magiita monthe, mbonanagie na mantû mara ndûthaga bûra Kîrîstû arî ûmûnene, nwîgue ingaatûûra mwoyo kana inkaûragwa. 21Weegua ngaatûûra mwoyo ngatûûrîra Kîrîstû. Naka na ngakua nwa baita. 22Ndathi na mbere gûtûûra, ûkeegua ndî na kaanya ga kûthi na mbere kûrutîra Mwathani ngûgî. Kwoogu ntithuura. 23Kîrî mantû mamu marî maîrî, ntiuga i bûrîkû bwega. Inkwenda gûtigana na ûtûûro bûbû mbîgue ndî amwe na Kîrîstû. Na ûgu i bu bwega mûno. 24Îndî kwîgua ndî mwoyo ndeni ya mwîrî kûrî gîtûmi mûno kîrî biû. 25Na ndî na mma ûgu i bu gûgaakara. Kwoogu, nkeegua ndî amwe naabi bwinthe mbûteetheerie bûkûre, bûkeneere wîtîgio bwenu. 26Rîra nkauma gûkû mbûye, bûkeegua bûrî na itûmi biiganu bia gûnkeneera n'ûntû bwa mantû mara Kîrîstû Yiesû arûthîîte naani. 27Îndî wana ndakara ata, bûtikaariganîrueni i gûkaraga mûkarîre ûra ûgaatûma ntheto îmbega ya Kîrîstû îtîîywa. Kwoogu ndaaya kûbwona kana ndaremwa kûûya, ndeenda kwîgua ibûrikîîte wîtîgioni bûgwatanîrîte. Ndeenda kwîgua bûrîrûîrîîra wîtîgio bûra tûrî na bu kuumania na ntheto îmbega bûgwatanîrîte. 28Bûtikaamakue n'anthû beenu ûntûûni kinya bûrîkû. Ûcamba bwenu i bu bûgaatûma bamenya i bo bakaathirua, biû bwonokue. Na i Ngai akaarûtha ûgu. 29Ngai atibûthaarimîîte na kaanya ga gwîtîgia Kîrîstû gonka. Abûthaarimîîte kinya na kaanya ga kûnyamaarua n'ûntû bwa Kîrîstû. 30Ibwoneete bûra nnyamaarîîtue bûgana n'ûntû bwa Kîrîstû. Na ibwîgîîtue wana îîndî nwa nkûnyamaarua. Îndî na wana biû ibûkûnyamaarua nkînyamaarua.

will be added

X\