MATHAYO 16

1Abarisai bamwe na Asandukai baathi kîrî Yiesû. Bakîmûgeria bamwîra aringe kîama, kîrî rwano rwa kwonania inya îra arî n'yo kuuma îgûrû. 2Yiesû abeera, "Bûkoona gwatuga gûtarî na matu buugaga, 'Rûû gûgaakea gûkembûkîîte.' 3Na rûkîîrî buugaga, 'Îmunthî gûkaura n'ûntû kûrî na matu maayirû.' Ibwiyî kûraitha mwonekere wa matu bûkamenya bûra gûgaakara, îndî bûtikûûmba kûmenya bûra mantû mara magûtuîkîka ntugûûni ino makwonania. 4I rûciaro rûûthûûku rwa aregi Ngai rûkwenda kwona kîama. Gûtirî kîama kîngî bûkoona tatiga kîra gîa kîroria Njona." Yiesû abatiga aathi. 5Arutwa ba Yiesû bakîringanîria bathi rûgongo rûra rûngî rwa îria, bataaririkana bakamata mîgaate. 6Yiesû abeera, "Îmenyeereeni îgûrû rîa ndawa îra Abarisai na Eronde batûmagîra kwimbithia mîgaate." 7Arutwa baanjîîria kwaranîria. Bauga, "Arîtwîra ûûgû n'ûntû tûtiraaya na mîgaate." 8Yiesû akwîgua bakîîrana ûgu abaûria, "N'ata bûrî na wîtîgio bûûniini! I kî n'ûntû bûkûthûgaania i bûra bûtarî na mîgaate? 9Ka bûtagûciûkîrwa kinya îîndî? Ka bûtakûririkana rîra ndagaîrîîre antû ngiri itaano mîgaate îtaano? Bwaûyûriirie ikaabû bigana bia matigari? 10Bûtikûririkana kinya rîra ndagaîrîîre antû bara ngiri inya mîgaate îra mûgwanja? N'ikaabû bigana bia matigari bweethîraniirie? 11Aabu i kî îîndî n'ûntû bûtagûciûkîrwa bûmenya ti mantû ma mîgaate nkwaragîîria? Bwîmenyeere kîrî ndawa ya kwimbithia mîgaate ya Abarisai na Asandukai." 12Rîru i rîo baaciûkîîrwe baamenya ataabeeraga beemenyeere kîrî ndawa ya kwimbithia mîgaate, aabeeraga beemenyeere kîrî moorutani ma Abarisai na Asandukai. 13Yiesû agûkinya rûteere rûra taûni ya Kaisaria Piripi yarî aûria arutwa baake, "Înkûbûûria, antû baugaga Mwana wa Muntû n'ûû?" 14Arutwa baake bamwîra, "Bamwe baugaga ûrî Njoana Mûbaatithania, bangî bakauga ûrî Eriya, na bangî na bo bakauga ûrî kîroria Njeremia, kana ûmwe wa iroria." 15Yiesû aacooka abaûria, "Î biû buugaga ndî ûû?" 16Simioni Petûrû amwîra, "Woû ûrî Kîrîstû, Mwana wa Ngai ûra arî mwoyo." 17Yiesû amûcookeria amwîra, "Woû ûrî ûmûthaarime, Simioni mwana wa Njona, n'ûntû ti muntû akûgwûrîrîte mantû mama. I Baaba ûra arî îgûrû akûgwûrîrîte mo. 18Ga ngûkwîra, i woû Petûrû. Ngaaka kanica yakwa îgûrû ya rwara rûrû, na wana gîkuû gîtimîkîria inya. 19Ngakûnenkera mbungûro cia ûnene bwa îgûrû. Kîonthe kîra ûkaarega gûkû nthîgûrû, wana îgûrû igîkaaregwa. Na kîra ûgeetîgîîria gûkû nthîgûrû wana îgûrû gîgeetîgîîrua." 20Yiesû abeera batikeere antû n'we Kîrîstû. 21Kuuma îgiita rîru Yiesû aanjîîria kwonia arutwa baake nwa mwanka athi Njerusaremu anyamaarue mûno n'akûrû, athînjîri bara banene ba Ngai, na aarimû ba watho bamûûragithie. Îndî akaariûka ntugû ya ithatû. 22Petûrû amwira gataaria, aanjîîria kûmwîra atige kuuga ûgu. Amwîra, "Mwathani, Ngai atiîtîgîîria mantû mamu na ntienda ûgu!" 23Yiesû aûndûka amwîra, "Taaria aaga ndî, Saitaani, n'ûntû nûkûndigîîria ntiraingia kwenda kwa Ngai. Mathûgaanio maaku ti ma kîîngai i ma kîîmuntû." 24Yiesû aacooka eera arutwa baake, "Muntû akeenda kûnthingata abatîîrue eetîîyîra, akamata mûtharaba wake, rîru anthingata. 25Ûra oonaga mwoyo ûyû n'uu ûrî gîtûmi akaûra. Îndî ûra akeeruta n'ûntû bwakwa agaatûûra mwoyo. 26Î rîo rî, i baita mbi muntû oona wana ûkeegua nthîgûrû yonthe n'yake, îndî akaaga mwoyo? Anga kûrî kîo muntû ateeyana akîenda kwonokia mwoyo wake? 27"Mwana wa Muntû arî akubî kûûya na araîka baake arî na mwago wa Îthe. Eengeerie kûûya atuîre woora muntû kûringana na ngûgî yake îra arûthîîte. 28Na mma ga nkûbwîra, bamwe ba baba barûngi aaga batiikua batooneete Mwana wa Muntû akîîya na ûnene bwake."

will be added

X\