MATHAYO 15

1Nyumaani Abarisai bamwe na aarimû ba watho ba kuuma Njerusaremu baathi kîrî Yiesû bamûûria, 2"I kî n'ûntû arutwa baaku baunaga wîthîre bwetû bwa kûthamba njara mbere ya kûrîa irio?" 3Yiesû abaûria, "I kî n'ûntû bûtaathîkagîra watho bwa Ngai bûgatindaga bwîngeene na kîîwîthîre kîenu? 4Ngai augîîte, 'Tîîyaga abaagu na nyûkwe.' Na aacooka kaîrî auga, 'Ûra akaaruma îthe kana gina, na mma nakue.' 5Îndî ûrutaniini bwenu biû buugaga muntû arî na gîntû aûmba gûteethia na kîo îthe kana gina, nwa abeere i gîa kûrutîra Ngai na atabateethie, na mamu ti mabîtia. Na kaîrî bûrutanaga antû kûrega gûtîîya beethe na bagina. Gûku ti kwagîra watho bwa Ngai gîtûmi n'ûntû bwa kûthingata kîîwîthîre kîenu? 7Biû eebwithia baba! Isaaya naaroragia mantû meenu bwega rîra aandîkire, 8'Antû baba baankumagia na tûnyua akî, nkoro ciao irî kûraaya mûno naani. 9N'ûtheri bangongaga, mantû mara barutanaga i maathana magûtuîgwa n'antû.' " 10Yiesû aacooka eera kîrîndî, "Thikîîriani bwîgue na bûciûre bûra nkuuga. 11Kîra kîthûngagîra kîrî muntû gûkûrûkîîra kanyuani ti kîo gîtûmaga agîa mûgiro. Kîra kiumaga kanyuani i kîo gîtûmaga agîa mûgiro." 12Arutwa ba Yiesû baathi kîrî we bamwîra, "Nûkûmenya Abarisai batirakenua i bûra uugire?" 13Yiesû abeera, "Gîntû kîonthe kîra Baaba ûra arî îgûrû ataanda nagaakûûra na marindo meene. 14Rekanaani na bo tu. Bûroona ntûngi îkwathîîra îra îngî njîra? Ntûngi îtiûmba kûgwata îra îngî mûtî n'ûntû bakeethîra îrinya i ku boorokera bonthe." 15Petûrû amwîra, "Wenda twîre bûra ûkwenda kuuga na ngerekano îno." 16Yiesû abeera, "Îkaanthî wana biû bûtiraciûra? 17Bûrîenda kuuga îîndî bûtiiyî kîra kîthûngagîra mwîrî gûkûrûkîîra kanyuani kîthiyaga nda na gîgacooka gîkauma? 18Îndî kîra kiumaga na kanyua kîîgagua kiumîîte nkorooni na i kîo gîtûmaga muntû agîa mûgiro, 19n'ûntû nkorooni i ku kuumaga meeciiria maathûûku, ûûragani, ûthûngîîri na ûtheria, wamba, ûkûûyî bwa ûrongo, na kûrumanga antû. 20Mama i mo mantû mara matûmaga muntû agîa mûgiro. Îndî kîrî Ngai, kûrîa ûtathambîîte njara gûtiûmba gûtûma ûgîa mûgiro." 21Yiesû na arutwa baake bakuuma agu baathi bwa Turo na Sindoni. 22Mûka ûmwe wa gûntû gûku aaya kîrî Yiesû amûkaîra amwîra, "Mwathani, mwana wa rûrîîyo rwa Ndaundi, itû mbîgua kîao! Kaarî gaakwa karî na kîrundu kîîthûûku mûno gîtakarekaga." 23Îndî Yiesû gûtirî bu aamûcookeria amwîra. Arutwa baake baathi akubî baaria n'we bamwîra, "Ûtamwîre athi rîmwe bantû akara atuumîîte nyuma agîtûringagîra gîtuma?" 24Yiesû auga, "Ndatûmirwe kîrî Aisiraeri bonka, bakari ta ng'ondu ciûrîîte." 25Yiesû akîrîîkia kuuga ûgu, mûka ûyu aathi aaturia maru mbere yake. Amwîra, "Itû, Mwathani, nteethia." 26Yiesû auga, "Ti bwega kûgerera kurû irio bia twana." 27Mûka ûyu amwîra, "Bûbu bu n'ûmma, Mwathani. Îndî rî, wana kurû nirîyaga tûngenyua tûra tûgwîyaga rungu rwa meetha eene cio bakîrîa." 28Yiesû amwîra, "N'ata ûrî na wîtîgio bûgana, mwekûrû! Bûra ûkwenda ûkaarûthîrwa bu." Na kuuma thaa wainu kaarî gaake kaabua. 29Yiesû akuuma naagu aathi aakinya îriani rîa Gariiri. Aatamba na rûteere aathi aatwa karîmaani aakara nthî. 30Kîrîndî kiingî mûno kîamwirîra bionje, ntûngi, ithua, maamu, na aayie ba mîthemba îngî bakîbaigagîîra akubî na magûrû maake. Yiesû abooria. 31Kîrîndî kîarigara mûno, gîakumia Ngai wa Isiraeri gîkwona maamu ciatua kwaria, ithua biatua kûthi, bionje biabua, na ntûngi igûtua kwona. 32Yiesû eeta arutwa baake abeera, "Inkwîgua antû baba kîao n'ûntû tûkarîîte na bo ntugû ithatû na batirî na irio. Ntikwenda beenûka na yûûra n'ûntû baûmba kûgwa njîraani." 33Arutwa baake bamûûria, "I kû tûruta mîgaate ya kûgana rwanda ta rûrû tûrî ya kûrûmia kîrîndî gîkî kîonthe?" 34Yiesû abaûria, "I mîgaate îgana îrî oogo?" Bamûcookeria bamwîra, "I mûgwanja na tûkûyû tûûkai." 35Yiesû auga antû bakare nthî. 36Aathûkia mîgaate înu mûgwanja na tûkûyû tûtu. Aacookeria Ngai nkaatho, aang'enyûranangia akînenkagîra arutwa baake, arutwa baagaîra antû. 37Antû bonthe baarîa baabaa. Arutwa ba Yiesû beethîrania ikaabû mûgwanja bia ing'enyua bira biatigarire. 38Antû arûme bonka baarî ta ngiri inya tûtagûtara aka na twana. 39Rîru Yiesû eera antû beenûke, aatwa îtarûûni aathi bwa gûntû gweetagwa Magandani.

will be added

X\