MATHAYO 10

1Ntugû îmwe Yiesû eeta amwe arutwa baake barî îkûmi na baîrî. Abaa inya ya kwîngatia irundu biithûûku na ya kworia antû ndwari na mbayua cia mîthemba yonthe. 2Mariîtwa ma atûmwa babu baatûmirwe maarî, Simioni (ûra kaîrî eetagwa Petûrû), mûruagina Enderea, Njakubu wa Cabendi na mûruagina Njoana, 3Piripû, Bathoromayo, Tooma, Mathayo ûra aarî mûrûngithia ûgooti, Njakubu wa Arubayo, Thandayo, 4Simioni Mûkaanani, na Njundas Mûcikariota ûra aakunyanîîre Yiesû, amûgwatithia. 5Yiesû aabatûmire abeera, "Bûtikaathi nthîgûrû cia bara batarî Ayaundi kana bûthi taûni ya Asamaria. 6Îthiini kîrî Aisiraeri. Bakari ta ng'ondu ciûrîîte. 7Bûthi bûgîtûmagîîria bûkiugaga, 'Ûnene bwa îgûrû bûkûthengeera.' 8Bworie bara baayie, bûriûkie bara bakuû, bworie bara barî na mîtigiri na bwîngatie irundu biithûûku biume kîrî bara barî na bio. N'ûntû bwetwe ûtheri eyanaani bûtakûrîwa. 9"Bûtigaakamate mbeeti kana mbia cia thaabu, fetha, kana mûthemba ûngî, 10na bûtigaakamate mbooro. Bûtigaakamate nguo îngî tatiga îra muntû eekîrîte kana iraatû bingî tatiga bira muntû eekîrîte. Na bûtigaakamate mîraagi ya gwîkinyîîria n'yo, n'ûntû mûruti ngûgî nabatîîrue amenyeerwa. 11"Bwathi taûni kana ntûûra îra bûkaathi, bûcûe muntû ûmwagîru bûkare gwake mwanka rîra bûkaathi. 12Bwathûngîra gwake bwambe bûkeethie antû nkeethi cia ûkiri. 13Weegua bûkaagwatwa ûgeni ku ûkiri bûrookara mûciî ûyu. Îndî weegua bûtiigwatwa ûgeni batiikara na ûkiri mûciî ûyu! 14Bara batakîbûgwata ûgeni kana bara bakaarega kûbûthikîîria bûbaturaturîre tîîri ya mbayo cienu rûrî rwano rwa kûboonia bûtirî ngwatanîro na bo. 15Na mma ga nkûbwîra, rîra ntugû ya îgamba îgaakinya antû ba taûni cia Sondomu na Ngomoora ûkeegua barî kaaba nkûrûki ya antû ba taûni ta înu." 16Yiesû eera arûtwa baake, "Ndabûtûma bûrî ta ng'ondu gûntû kûrî ncûûgi. Kwoogu karagaani bwîmenyeereete bûrî na ûûme ta kayûgû na ûkiri ta îcea. 17Bwîmenyeere n'ûntû antû bakabûthitanga biamaani biao na babûringithie ibooko masinagoogiini maao. 18Na bûkaathitangwa kîrî aathani na anene n'ûntû bwakwa, îndî bûgakûûyîîra kîrî bo na kîrî antû bonthe. 19Îndî wana babûthitanga kootiini bûtikaûrie n'ata bûkauga, kana n'ata bûgaacookia. Îgiita rîakinya bûkeewa bwa kuuga, 20n'ûntû bûra bûkauga ûtiîgua buumanîîtie naabi. Bûkeewa bûra bûkauga i Kîrundu wa Abaagu. 21"Muntû agaakunyanîra mûruagina aûragwe n'anene. Mwana agaakunyanîrwa n'îthe, na aana bakaang'entera aciari baao babaûragithie. 22Bûkaamenwa n'antû bonthe n'ûntû bwakwa. Îndî ûra ûkaûmîîria mwanka mûthia akoonokua. 23Bûkaaya kûnyamaarua ntûûra îmwe, bûtoorooke bûthi îngî n'ûntû na mma ga nkûbwîra, ûtiîgua bûgûkomania ntûûra cia Isiraeri cionthe mbere ya Mwana wa Muntû aaya. 24"Mûrutwa t'we mûnene kîrî mwarimû wake. Na mûruti ngûgî t'we mûnene kîrî ûra arutagîra ngûgî. 25Mûrutwa agatuatia mwarimû wake, ûgu ibûmûganîîte. Na mûruti ngûgî agatuatia ûra arutagîra ngûgî, ûgu ibûmûganîîte. Ûkoona i mwene mûciî beetire Bericebuuri, mûnene wa irundu biithûûku, t'wa antû ba mûciî wake." 26Yiesû abeera, "Îndî amwe noogu bûtikaabakuthûke n'ûntû ûntû bunthe bûra bwithe nwa bûkaamenyekana na gûtirî witho bûtakiumbûka. 27Mara nkaabwîra kûrî ûtugû, îraani antû mo kûrî mûthenya. Na mara nkaabwîra na kîoye, bûtwe mîtîîni kûra îgûrû buugîîrie antû beegue. 28Bûtigaakuthûke bara baûmba kûûraga mwîrî akî, îndî bataûrage mwoyo. Kuthûkaani ûra aûmba kûûraga mwîrî na akathiria mwoyo na mwanki wa îcamaarîro. 29Anga ûkeendia tûnyoni twîrî tûniini twauma mbia kûrî? Îndî amwe noogu, gûtirî nwa kamwe ga tu gakua, nwanga Abaagu ûra arî îgûrû eendeete. 30We wana ntundu ira irî biongo bienu cionthe naciiyî n'igana. 31Kwoogu menya bûmaka. Biû bûrî gîtûmi nkûrûki ya tûnyoni tûtatarîka." 32Yiesû auga, "Ûra agakûûyîîra kîrî antû, wana niû nkamûkûûyîîra kîrî Baaba ûra arî îgûrû. 33Îndî ûra agankaana kîrî antû, wana niû inkaamûkaana kîrî Baaba ûra arî îgûrû." 34Yiesû auga, "Bûtigeeciirie mbûyîîte kûreeta ûkiri nthîgûrû. Ntiyîîte kûreeta ûkiri, ndeeteete ndûa, 35n'ûntû mbûyîîte kwathûrana muntû na îthe, mwarî na gina, mûk'wa mwana na ciaraawe. 36Na ngaatûma muntû amenwa kûrû n'antû ba mûciî wake bongwa." 37Yiesû auga, "Muntû ûra eendaga îthe kana gina nkûrûki yakwa, kana ûra eendaga mwana wake nkûrûki ya bûra ambendeete atiagîrîte auga n'wakwa. 38Muntû atagîkamata mûtharaba wake anthingata atiûmba gûtuîka wakwa. 39Ûra acûaga wengwa gûtûûra mwoyo akaûra. Îndî ûra akeeruta n'ûntû bwakwa agaatûûra mwoyo." 40Yiesû auga, "Muntû ûra akaabwîtîgîra i niû akeegua agîîtîgîra. Ûra aambîtîgagîra n'ûra aantûmire eetîgagîra. 41Ûra eetîgagîra kîroria n'ûntû bwa kwîgua i kîroria akeewa kîewa kîganeene na gîa kîroria. Na ûra ageetîgîra muntû wa Ngai n'ûntû bwa kwîgua i muntû ûmwagîru, kinya we akeewa kîewa kîganeene na muntû ûmwagîru. 42Na mma ga nkûbwîra, ûra agaakundia nwa rûûyî rûûtheri ûmwe wa athingati baba baakwa baniini n'ûntû bwa bûra barî athingati baakwa, i mma atiaga kîewa."

will be added

X\