MAARIKO 9

1Yiesû abeera, "Na mma ga nkûbwîra, bamwe ba baba barûngi aaga batiikua batooneete ûnene bwa Ngai bûra bûkaaya bwonanie inya ya bu." 2Nyuma ya ntugû ithanthatû, Yiesû aathûkia Petûrû, Njakubu na Njoana. Aatwa na bo kîrîmaani kîîraaya mûno, na i bo bonka baarî gûku. Yiesû aanjîîria kûgarûka, arutwa babu bakîonaga. 3Nguo ciake ciatua gûyica mûno, ciatuîka injerû ce. Gûtirî mûbûûri nguo nthîgûrû îno akîûmba gûcibûûra ikara ta ûgu ciakari. 4Eriya na Musa boonekana bakîaria na Yiesû. 5Petûrû eera Yiesû, "Mwarimû, na kaaba tûrî aaga. Ga twake tûganda tûthatû--gaaku, ka Musa, na ka Eriya." 6Petûrû atoona bwa kuuga i kûmaka kûra baamakîîte. 7Îtu rîaya rîabakunîka. Kayû kauma gûku îtuuni kauga, "Ûyû i Mwana wakwa na immwendeete mûno. Mûthikagîîrieni." 8Na nthûti îmwe arutwa bakûraitha batoona babu bangî kaîrî, i Yiesû wenka aatigirwe agu baarî. 9Bagûrûkîîte kîrîmaani gîku baarî, Yiesû abakaania abeera batikeere antû mantû mamu boonire mwanka rîra Mwana wa Muntû akaariûka. 10Arutwa babu beendama bakîûranagia i kûriûkua kûrîkû gûku Yiesû aaragîîria. Bataumbûra mantû mamu boonire. 11Baûria Yiesû, "I kî n'ûntû aarimû ba watho barutanaga bakauga nwa mwanka Eriya aaye mbere ya Mesia aaya?" 12Yiesû abeera, "N'ûmma Eriya nwa mwanka aaye mbere oone mantû magûkara bûra maagîrîtwe wîgua makari. Îndî i kî n'ûntû Maandîko Maatheru maugaga Mwana wa Muntû akanyamaarua mûno na amenwe? 13Ga nkûbwîra, kwaria mma Eriya naayire, na wata bûra kwandîkîîtwe Maandîkooni Maatheru îgûrû rîake, antû baamûrûthire wabûra bunthe beendaga." 14Bagûcooka baakinya kîrî arutwa bara bangî, beethîra kîrîndî kiingî kîbathiûrûkîîrîte na aarimû ba watho bakîbakararagia. 15Antû bakwona Yiesû, baarigara mûno. Bamûthagaana na rwîro, baathi kûmûkeethia. 16Yiesû abaûria, "I mbi yo bûgûkararanîria?" 17Muntû ûmwe kîrî kîrîndî gîku amwîra, "Mwarimû, ingûkûreeterete kaana gaakwa karî na kîrundu kîîthûûku. Kîrundu gîku gîgatuîkithîîtie maamu. 18Na rîra gîkagwete igîkagwîthagia nthîgûrû gagatua kûruta mûthonjo na kanyua gagîkabakabaga magego gakaûmagara ng'û. Nkûûya ndeera arutwa baaku, kîrundu gîku karî na kîo ikîbaremire, batiraûmba gûkîîngatia." 19Yiesû abeera, "Ga tûgaakara naabi mwanka rî, nthuke îno îtarî wîtîgio? Ga nkainyîkîria tûkare naabi mwanka rî? Reeteeni kaana gaku." 20Baareeta kaana gaku kîrî Yiesû. Kîrundu gîku gîkwona Yiesû kîaûmagaria kaana gaku nthûti îmwe. Gîagaturania nthî, kaana kaanjîîria kûgaragara gakîrutaga mûthonjo na kanyua. 21Yiesû aûria îthe wa kaana gaku, "I kuuma rî kaana gaka kaanjîîrie gûkara ûûgû?" Îthe wa kaana amwîra, "I kuuma wana bwa ko. 22Na i maita maingî kîrundu gîku gîkagereete mwankiini na rûûyîîni gîkîenda gûkaûraga. Ûkeegua kûrî bu ûrûtha, twîgîîrue kîao ûtûteethie!" 23Yiesû amwîra, "Î nûkuuga weegua kûrî bu ndûtha? Ûntû bunthe nwa bûûmbîke kîrî ûra eetîgagia." 24Warîru îthe wa kaîyî gaku eera Yiesû na inya, "Ndî na wîtîgio, îndî mbongeera ti bwingî!" 25Kîrîndî gîgûtua gûtindîkana mûno, Yiesû aagondokera kîrundu gîku akîîra, "Woû kîrundu kîîthûûku ûtûmîîte kaana gaka gatiga kwîgua na kwaria, ngûkûgondokera. Uma na ûtigaacooke kîrî ko kaîrî!" 26Kîrundu gîku gîakaya. Gîatiga kîaûmagaria kaana gaku mûno gaakara ta gaakua, rîru kîauma. Antû bakwona gaakara ûgu, baingî baao bauga, "Gagûkua!" 27Yiesû aagwata kaana gaku njara agaûkîîria, kaarûngama. 28Yiesû bagûcooka nyomba, arutwa baake bamûûria barî bonka, "I kî n'ûntû tiû tûremirwe kwîngatia kîrundu kîra gîkûrî na kaana kara?" 29Yiesû abacookeria abeera, "Kîrundu ta kîra gîtiîngatîka na gîntû kîngî, tatiga na njîra ya maromba na gûtîîrîra kûrîa n'ûntû bwa maromba." 30Yiesû na arutwa baake bakuuma agu baakûrûkîîra Gariiri. Yiesû ateendaga antû bamenya ara aarî, 31n'ûntû naarutanaga arutwa baake. Abeeraga, "Mwana wa Muntû agaakunyanîrwa anenkanîrwe kîrî antû bamûûrage. Îndî akaariûka ntugû ya ithatû." 32Arutwa baake bataaciûra ûntû bûbu, îndî baakuthûka kûmûûria biûria. 33Bagûkinya taûni ya Kaperinaumu, barî nyomba, Yiesû aûria arutwa baake, "I mbi bûgûkararanagîria njîraani?" 34Arutwa baakira n'ûntû wabu barî njîraani ibaakararanagia woora muntû akiugaga n'we mûnene kîrî bara bangî. 35Yiesû aakara nthî, abeeta baayanga akubî. Abeera, "Ûra akwenda gûtuîka wa mbere, nwa mwanka eetuîkithie wa mûthia na nkombo ya bara bangî bonthe." 36Yiesû aathûkia kaana kaniini akarûngamia agu mbere. Akagwatîîra, eera arutwa baake, 37"Ûra akenagîîra kaana ta gaka riîtwaani rîakwa, i niû akenagîîra. Na ûra ankenagîîra, n'ûra aantûmire akenagîîra." 38Njoana amwîra, "Mwarimû, twonire muntû akîîngatia irundu biithûûku agîtûmagîra riîtwa rîaku twamwîra atige n'ûntû t'ûmwe wetû." 39Yiesû amwîra, "Bûtikaagirie muntû ta ûyu kaîrî n'ûntû gûtirî we aringa kîama agîtûmagîra riîtwa rîakwa na agaacooka kûngweta na ûthûûku. 40Muntû atarî ûthû naati ûyu n'wetû. 41"Ûra akaabûkundia rûûyî riîtwaani rîakwa akiugaga arîbûkundia n'ûntû bûrî ba Kîrîstû, muntû ta ûyu atiaga kîewa." 42Yiesû auga, "Ûra atûmaga nwa ûmwe wa baba baniini bambîtîgîîtie beeyia, i kaaba akoogeerwa iiga rîa kûthia nkingo, akagerwa îriani ndeni. 43Weegua i njara yaku îtûmaga wîyia, mîgiite! I kaaba ûkathi mwoyooni wa tene na tene ûrî na njara îmwe, kîrî ûkara na cio irî ciîrî, na îndî ûthi îcamaarîro mwankiini ûtooreka. [ 44Gûku maginyo matikuyaga na mwanki ûtioreka.] 45Weegua i kûgûrû gwaku gûtûmaga wîyia, kûgiite! I kaaba ûkathi mwoyooni wa tene na tene ûrî na kûgûrû kûmwe, kîrî ûkara na mo marî maîrî, na îndî ûgerwa îcamaarîro. [ 46Gûku maginyo matikuyaga na mwanki ûtioreka.] 47Weegua i riitho rîaku rîtûmaga wîyia, rîkûûre! I kaaba ûkathi ûneneeni bwa Ngai ûrî na riitho rîmwe, kîrî ûmaiga marî maîrî na îndî ûgerwa îcamaarîro. 48Gûku maginyo matikuyaga na mwanki ûtioreka." 49Yiesû eera arutwa baake, "Ûra aambîtîgîîtie ageetîgîîrîka kuumania na gûkûrûkîîrua kûra agaakûrûkîîrua mwankiini, ta bûra kîgongwana gîîtîgagîîrua kuumania na mwonyo ûra gîîkagîrwa. 50Mwonyo n'ûmwega, îndî ûkathira mûcamo ûtiîkîrîka uu kaîrî. Karagaani bûrî na mûcamo, na tûûranagiani na ûkiri."

will be added

X\