MAARIKO 8

1Ntugûûni inu kaîrî ikwarî na ntundu înene mûno ya antû yethîranîrîte Yiesû. Na n'ûntû antû babu bataarî na biakûrîa, Yiesû eeta arutwa baake abeera, 2"Inkwîgua antû baba kîao n'ûntû tûkarîîte na bo ntugû ithatû na batirî na irio. 3Nkabeera beenûke barî na yûûra, ibakaagwa njîraani n'yûûra, n'ûntû bamwe baumîîte kûraaya mûno." 4Arutwa baake bamûûria, "I kû tûruta mîgaate ya kûrûmia antû baba bonthe rwanda ta rûrû?" 5Yiesû abaûria, "I mîgaate îgana îrî oogo?" Bamwîra, "I mûgwanja." 6Yiesû eera antû bakare nthî. Aathûkia mîgaate înu mûgwanja, aacookia nkaatho. Rîru amîng'enyûranangia akînenkagîra arutwa baake yo bagaîra antû. Arutwa baake baagaîra antû. 7Na ikwarî na tûkûyû tûûkai tûniini. Na tu Yiesû aacookia nkaatho n'ûntû bwa tu, eera arutwa baake bagaîre antû tu. 8Antû baarîa, baabaa, na beethîrania ikaabû mûgwanja bia ing'enyua bia mîgaate na makûyû, bira biatigarire. 9Antû babu baarî ta ngiri inya. Yiesû rîru abeera beenûke bwega. 10Aatwa îtarûûni na arutwa baake baathi gûntû gweetagwa Ndaramanutha. 11Abarisai bamwe baaya kîrî Yiesû, baanjîîria kûmûûria biûria. Bakîmûgeria bamwîra aringe kîama kîrî rwano rwa kwonania inya îra arî n'yo kuuma îgûrû. 12Yiesû eegua ûgu aara nkoro. Aûria, "I kî rûciaro rûrû rûkwendera kwona kîama? Na mma ga nkûbwîra, gûtirî kîama rûkoona!" 13Yiesû abatiga agu aatwa îtarûûni kaîrî, aaringanîria rûgongo rûra rûngî rwa îria. 14Arutwa ba Yiesû ibaariganîrîtue batakamatîîte mîgaate ya kûgana. I mûgaate ûmwe warî gûku îtarûûni. 15Yiesû abakaania abeera, "Îmenyeereeni îgûrû rîa ndawa îra Abarisai na Eronde batûmagîra kwimbithia mîgaate." 16Arutwa baanjîîria kwaranîria, "Arîtwîra ûgu n'ûntû bwa bûra tûtarî na mîgaate." 17Yiesû aamenya bûra baugaga. Abaûria, "I mbi n'ûntû bûkûthûgaania i bûra bûtarî na mîgaate? Ka wana îîndî bûtiramenya kana bûciûra ûgu ndauga? Mathûgaania meenu matirarugûka na îîndî? 18Anga bûrî na meetho na bûtikwona? Anga bûrî na matû na bûtikwîgua? Ka bûtakûririkana 19rîra ndagaagûrire antû bara ngiri itaano na mîgaate îtaano? N'ikaabû bigana bwethîraniirie bia mang'enyûrû mara maatigarire?" Arutwa bamwîra, "Biarî ikaabû îkûmi na biîrî." 20Yiesû aacooka abaûria kaîrî, "Î rîra ndagaagûrire antû bara ngiri inya na mîgaate mûgwanja? N'ikaabû bigana bwethîraniirie bia mang'enyûrû mara maatigarire?" Arutwa bamwîra, "Biarî ikaabû mûgwanja." 21Yiesû abaûria, "Na wana îîndî mma bûtigûciûra bûmenya bûra nkuuga?" 22Yiesû na arutwa baake baakinya taûni yeetagwa Bethisainda. Antû bamwe baareeta ntûngi. Baûria Yiesû aringithie muntû ûyu, amworie. 23Yiesû aagwata muntû ûyu atoonaga njara, bauma taûni. Bakuuma taûni, Yiesû aatuîra muntû ûyu mata meetho. Amwaigîîra njara, amûûria, "Kûrî kîo ûkwona?" 24Muntû ûyu aacûûba amwîra, "Inkwona antû bathiîte, îndî ndîona bakari ta mîtî." 25Kaîrî Yiesû aigîîra muntû ûyu njara meetho. Akûmwaigîîra, muntû ûyu aabua, aatua kwona kûrû. 26Yiesû eera muntû ûyu eenûke na atikaagendeere taûni. 27Yiesû na arutwa baake baathi ntûûra ira ciarî akubî na taûni yeetagwa Kaisaria Piripi. Barî njîraani Yiesû aûria arutwa baake, "Antû baugaga ndî ûû?" 28Arutwa bamwîra, "Bamwe baugaga ûrî Njoana Mûbaatithania, bangî bakauga ûrî Eriya, na bangî na bo bakauga ûrî ûmwe wa iroria." 29Yiesû abaûria, "Î biû buugaga ndî ûû?" Petûrû amwîra, "Woû ûrî Kîrîstû." 30Yiesû aakaania arutwa baake abeera batikeere antû aarî ûû. 31Yiesû aanjîîria kûrutana arutwa baake. Abeera, "Mwana wa Muntû nwa mwanka anyamaarue mûno na akaaregwa n'akûrû, athînjîri bara banene ba Ngai, na aarimû ba watho. Na nwa mwanka aûragwe, îndî akaariûka ntugû ya ithatû." 32Yiesû aabeerire mantû mamu atakûbaitha nwa aniini. Petûrû amwira gataaria, aanjîîria kûmwîra ti bwega kwaria mantû ta mamu. 33Yiesû aûndûka aacûûba arutwa baake bara bangî. Aakaania Petûrû amwîra, "Taaria aaga ndî, Saitaani! Mathûgaanio maaku ti ma kîîngai, i ma kîîmuntû." 34Yiesû eeta kîrîndî kîra kîethîranîîte, kîaya agu arutwa baake baarî. Abeera, "Muntû akeenda kûnthingata, abatîîrue eetîîyîra, akamata mûtharaba wake, rîru anthingata. 35Ûra oonaga mwoyo ûyû n'uu ûrî gîtûmi, akaûra. Îndî ûra akeeruta n'ûntû bwakwa kana n'ûntû bwa ntheto îmbega, agaatûûra mwoyo. 36Î rîo rî, bungwa i baita mbi muntû oona wana ûkeegua nthîgûrû yonthe n'yake îndî akaaga mwoyo? 37Anga kûrî kîo muntû ateeyana akîenda kwonokia mwoyo wake? 38"Ûra akambîgua îgi kana eegue ûrutani bwakwa îgi rûciarooni rûrû rwa ûthûngîîri, rwa meeyia, Mwana wa Muntû nakaamwîgua îgi rîra akaaya na araîka baatheru, arî na mwago wa Îthe."

will be added

X\