MAARIKO 6

1Yiesû akuuma agu, aathi kwao Nasareethi na arutwa baake. 2Sabatû îgûkinya, Yiesû aathi sinagoogiini, aanjîîria kûrutana. Antû baingî bakwîgua bûra aarutanangaga baarigara mûno. Baatua kûûrania, "I kû muntû ûyû arutîîte mantû mama akûrutana? N'ûû amwete ûûme bûgana ûûgû? Na i kû arutîîte inya ya kûringa biama ta bira akûringa? 3Anga we ti mûbundi wa mbaaû, mûthaka wa Maria, mûruagina wa Njakubu, Njosebu, Njundas na Simioni? Anga aaragina ti bara tûtwîre na bo gûkû Nasareethi?" Antû baarega kûmwîtîgia. 4Yiesû abeera, "Kîroria i gîîtîîye gûntû kûngî îndî gîtitîîyagwa kûra kiumîîte, kana n'antû baao, kana n'antû ba mûciî wao." 5Yiesû ataûmba kûringa kîama kwao. Ikwaiga aigîîre antû baakai njara bara baayîîtue, abooria. 6Aarigara mûno i bo n'ûntû bwa kwaga wîtîgio. Yiesû aariûnga ntûûraani akîrutanaga. 7Kagiita kamwe eeta arutwa bara baake îkûmi na baîrî arî na mûbango wa kûbatûma baîrî, baîrî. Abaa inya ya kwatha irundu biithûûku, 8na abakaania gûkamata gîntû ta mûgaate wa kûrîa barî rûgendooni rwao, mbooro, mbeeti ya mbia, kana nguo îngî tatiga îra muntû eekîrîte. Kîra gîonka aabeetîgîîrie i gûkamata tûmîraagi twa gwîkinyîîria na tu na gwîkîra iraatû magûrû. 10Abeera, "Bwathi taûni îra bûkaathi, nyomba îra bûkaathûngîra bûgwatwe ûgeni, bûkare ku mwanka rîra bûkaathi. 11Îndî bûkaaya kûthi taûni nna bûkarega kûgwatwa ûgeni, kana antû bakarega kûbûthikîîria, bûkiuma ku bûtige bwabaturaturîra tîîri ya mbayo cienu rûrî rwano rwa kûboonia bûtirî ngwatanîro na bo." 12Arutwa babu baathi baatûmîîria antû babeera beerire meeyia maao. 13Ibengatiirie irundu biingî biithûûku bira biarî kîrî antû na booria antû baingî ndwari ira baarî na cio bakîbaakaga maguta. 14Mûnene Eronde neegîîtue mantû ma Yiesû n'ûntû riîtwa rîake irîarî rîgûtambua gûntû kunthe. Aathûgaanagia akauga, "Ûyu i Njoana Mûbaatithania arariûkire kûringana na inya înu arî n'yo ya kûringa biama." 15Îndî antû bamwe baathûgaanagia bakauga, "N'Eriya." Na bangî na bo bakauga, "N'ûmwe wa iroria bira bia tene." 16Îndî Eronde we augire, "I Njoana Mûbaatithania ûra ndagiitithiirie kîongo arariûkire!" 17Gwatuîkîîte Eronde aatûmanîîte auga Njoana agwatwe athaîkwe nceera. Na aarûthire ûgu n'ûntû bwa Erondia. Erondia aarî mûka wa mûruagina wa Eronde, eetagwa Piripû, naamûtunyîîte we. 18Na n'ûntû bwa ûgu Njoana Mûbaatithania aakaraga akîmwîraga ti bwega gûkara na mûka wa mûruagina taka aarî wake. 19Erondia ateegagua Njoana bwega. Neendaga aûragwa naagaga bûra arûtha 20n'ûntû Eronde naakuthûkaga Njoana. Eronde naiyî Njoana aarî muntû ûmwagîru na ûmûtheru nkorooni. Kwoogu ateendaga aûragwa. Augîîte Njoana aingîrwe bantû gûku nceera. Na îgiita na îgiita Eronde neendaga kûthikîîria Njoana amwe na kwîgua mantû mara augaga neegagua makîmûtanga. 21Ntugû ya gûkeneera gûciarwa kwa Eronde îgûkinya, Eronde aaruga kîatho. Eeta bara baamûteethagîîria kwathana, atongoria ba ndûa, na antû ba îgweta gûku Gariiri. Ntugû înu i rîo Erondia oonire kaanya ga gûtûma Njoana aûragwa. 22Mwarî wa Erondia aayire gûku kîatho kîarî aina ndanci bwega, aakenia Eronde na ageni baake. Eronde amwîra, "Uga kîra wenda nkwa, nkwe kîo." 23Eronde aathiîtia buru amwîra, "Kîra kîonthe ûkeenda ngakwa, wana kinya weegua i nucu ya ûnene bwakwa." 24Mwarî ûyu auma. Aathi eera gina, "Mbîîra kîra ngeetia." Gina amwîra, "Uga wewe kîongo kîa Njoana Mûbaatithania." 25Mwarî aacooka kere eera Eronde, "Ndîenda ûmpa kîongo kîa Njoana Mûbaatithania kîrî thaaniini, weendî." 26Mûnene akwîgua ûgu aagwatwa i kîeba mûno. Îndî gûtirî bu akîrûtha arega n'ûntû bwa bûra aarî akûthiîtia mbere kinya ya ageni baake. 27Kwoogu mûnene Eronde aatûmana warîo, eera mûcikaarî athi agiite Njoana kîongo, areete. Mûcikaarî ûyu aathi nceera kûra Njoana aathaîkîîtwe, amûgiita kîongo 28aaya na kîo aanenkera mwarî wa Erondia kîrî thaaniini, mwarî ûyu aanenkera gina. 29Rîra arutwa ba Njoana baamenyire mantû mamu, baathi baathûkia kiimba gîake, bamûthika. 30Atûmwa bara Yiesû aatûmîîte baacooka. Bamwîra mara monthe baarûthîîte na mara baarutanîîte. 31N'ûntû bwa wingî bwa antû, Yiesû na arutwa baake batoona kaanya nwa ga kûrîa. Gûgûkarîka ûgu, Yiesû eera arutwa baake, "Tûthiini twinka bantû gûtarî antû, bûnogokange." 32Kwoogu baatwa îtarûûni barî bonka, baathi bantû antû bataarî. 33Baingî ba antû babu baumîîte ntûûraani cionthe bakwona Yiesû na arutwa baake bathiîte, babamenya. Baugia batambîîte na rûteere rwa îria babatangîria. 34Yiesû agûkinyûka îtarûûni eethîra kîrîndî kîînene mûno gîa antû. Akwona ûgu abeegua kîao mûno, n'ûntû oonire bakari ta ng'ondu itarî na mûrîîthi. Yiesû aanjîîria kûbarutana mantû maingî. 35Gûgûkara gûtuga arutwa beera Yiesû, "Igûkarire gûtuga na i ta rwanda rûrû tûrî. 36Îra antû bathi kaingo bakinya mîndaani na ntûûra ira irî akubî beegûrîre gîntû gîa kûrîa." 37Yiesû eera arutwa baake, "Baeni gîntû bûrî biû barîe." Arutwa bamwîra, "Tûkauga tûgûrîre antû baba bonthe mîgaate barîe babae, nwanga tûrî na mbia igana ta îrîi rîa mûruti ngûgî wa gîîntugû rîa nkûrûki ya mîeri îthanthatû!" 38Yiesû abaûria, "I mîgaate îgana îrî oogo? Tathiini bwone." Arutwa bakûthi boona i mîgaate îgana yarî, baacooka beera Yiesû, "I mîgaate îtaano na makûyû maîrî." 39Yiesû eera arutwa baake beere antû bonthe bakare nthî nyakiini na ikundi. 40Antû baakara nthî. Ikundi bimwe biarî bia antû mîrongo îtaano, na bingî îgana. 41Yiesû aathûkia mîgaate înu îtaano na makûyû mamu maîrî. Aacûûba îgûrû, aacookeria Ngai nkaatho. Aang'enyûranangia mîgaate akînenkagîra arutwa baake bagaîra antû. Aacooka aagaa makûyû na mo, na maagana antû bonthe. 42Muntû wonthe aarîa aabaa. 43Beethîrania mang'enyûrû ma mîgaate na ma makûyû mara maatigarire maûyûria ikaabû îkûmi na biîrî. 44Antû arûme bara baarîîre baarî ngiri itaano. 45Nyuma ya ûgu, warîru Yiesû eera arutwa baake batwe îtarûûni baringanîrie bathiyage bantû eetagwa Bethisainda, we aatigwa akîîra kîrîndî kîînûke. 46Yiesû agûtigana na antû, aatwa kîrîmaani kûromba Ngai. 47Îtarû rîrî gatîgatî ka îria, rwiriiri rwanjîîria kûgwa. Yiesû aarî naagu nthî îmbûmo wenka. 48Rware rûgîtema Yiesû oona arutwa baake bakîthiithia îtarû na thîîna n'ûntû baatarîîte naara ruuo rwaumaga. Aathi abatarîîte athiîrîîte îgûrû rîa rûûyî akari taka akwenda kûbakûrûka athiyaga. 49Arutwa bakûmwona athiîrîîte îgûrû rîa rûûyî baathûgaania i nkoma yarî. Baaringa gîtuma 50n'ûntû bonthe bakûmwona ibaamakîîte mûno. Warîo Yiesû abeera, "I niû, ûmîîriani! Tigaani kûmaka." 51Yiesû aatwa îtarûûni gûku baarî. Agûtwa ruuo rwathira. Arutwa baarigara na inya mûno 52n'ûntû bataarî kinya bagûciûra kîama kîra kîa mîgaate îra. Mathûgaania maao mataarî magûkunûrwa. 53Yiesû na arutwa baake baaringanîria baakinya bantû eetagwa Ngenesareeti. Baathaîkîîra îtarû agu rûteere rwa îria. 54Antû bakûboona bagîkinyûka baamenya i Yiesû aarî. 55Baugia bwa ntûûra cionthe baathi baareeta aayie na mataratî, babareeta kîrî Yiesû wanaara baamwîthagîîria. 56Bantû onthe ara Yiesû aathiyaga, nwîgue i ntûûra kana i taûni, antû bairaga aayie ara antû beethîranaga mûno bakabamaamia oogo, Yiesû aaya bakamûûria eetîgîîrie aayie bamûtongithie mûthia wa nguo yake. Na iboorire bonthe bara baamûtongithiirie.

will be added

X\