MAARIKO 16

1Rûûni rwa ntugû ya Sabatû, Maria Mûmagindari, Maria gina wa Njakubu na Saroome baagûra mîtaa bathi gwaka kiimba kîa Yiesû. 2Kûrî mûthenya wa mbere wa kiumia, eekûrû babu baaraûka kuuma rûûkîîrî mûno riûa rîkiuma, baathi nthikooni îra Yiesû aathikîîtwe. 3Bathiîte baûranagia, "N'ûû agaatwingiritîria iiga rîra rîgana ûra riume mûromooni wa nthiko?" 4Eekûrû babu bagûkinya boona iiga rîra irîraingiritiirue rîarutarutwa oogo na kûnenea kwene. 5Bakûthûngîra gûku nthikooni beethîra mûthaka akari nthî rûteere rwa ûrîo eekîrîte nguo îndaaya înjerû. Baamaka. 6Mûthaka ûyu abeera, "Tigaani kûmaka. Inkûmenya i Yiesû wa kuuma Nasareethi ûra araambîîtwe mûtharabaani bûgûcûa. Nariûkire, atirî gûkû. Raithaani bwone, aaga noogo kiimba gîake kîraigîîtwe. 7Cookaani bûmenyithie arutwa baake akûthiyaga Gariiri. Baathi noogo bakamwona wata bûra aabeerire. Bwîre Petûrû ûgu." 8Eekûrû babu ibainainaga n'ûguaya. Baumagarûka baugia rwîro. Gûtirî we beera ûgu gwakarîkire n'ûntû bwa kîmako kîra kîabagwete. 9Yiesû akûriûka rûkîîrî mûthenya wa mbere wa kiumia, eebonaniirie mbere kîrî Maria Mûmagindari ûra agu mbereeni eengatîîtie irundu biithûûku mûgwanja biauma kîrî we. 10Maria Mûmagindari akwona Yiesû aathi eera athingati baake. Arutwa ibaarî na kîeba kîînene mûno. Ibaarîraga. 11Maria abeera, "Yiesû arî mwoyo, nkûmwona." Îndî athingati ba Yiesû baarega kûmwîtîgia. 12Nyumaani, Yiesû eebonania kîrî arutwa baake baîrî bathiîte bwa ntûûra. Oonekaga agarûkîîte aakara mwanya na bûra aakari mbere ya akua. 13Arutwa babu baacooka beera bara bangî ûgu boona. Îndî wana rîo bateetîgia. 14Kaîrî nyumaani arutwa bakîrîyaga, Yiesû eebonania kîrî bo barî îkûmi na ûmwe. Abatheteria kwaga wîtîgio n'ûntû bakwîrwa akûriûka i bara baamwonaga, ibaûmiirie biongo baarega gwîtîgia. 15Yiesû abeera, "Îthiini nthîgûrû yonthe bûtûmîîrie ntheto îmbega kîrî antû bonthe. 16Ûra ageetîgia abaatithue, akoonokua. Îndî ûra atagîîtîgia akaagiitîrwa îgamba bûûthûûku mûno. 17Bara bageetîgia, kwa riîtwa rîakwa bakeewa inya ya kwîngatia irundu biithûûku bikauma kîrî antû. Na bakaaragia na nthiomi ingeni. 18Bakaaya kûgwata njoka, kana bakanyua cûmû, gûtirî bu bagaakara. Bakaigagîîra aayie njara bakoora." 19Mwathani Yiesû akûrîîkia kwîra arutwa baake ûgu, eetithua airwa îgûrû, aakara rûteere rwa ûrîo rwa Ngai. 20Arutwa baake baathi gûntû kunthe baatûmîîria antû ntheto îmbega, kuumania na ûteethio bwa Mwathani. Na Mwathani noonaniirie ntheto îmbega îra arutwa baake baatûmagîîria n'ya mma kûringana na biama bira baaringaga.

will be added

X\