MAARIKO 15

1Rûûni rûkîîrî mûno, athînjîri bara banene ba Ngai, akûrû, aarimû ba watho, na kîama kîonthe baabanga bûra bakaûragangithia Yiesû. Bamûthaîka njara bamwirîra Piraatû ûra aarî ngabana. 2Bagûkinya, Piraatû aûria Yiesû, "I woû mûnene wa Ayaundi?" Yiesû amwîra, "Nwa ta ûgu wauga." 3Athînjîri bara banene ba Ngai baatuîrîîra Yiesû mantû maingî. 4Piraatû eera Yiesû, "Ûteetheteere na nûkwîgua bûra mantû maingîîte bûgana mara bakuuga nûrûthîîte?" 5Îndî wana rîo gûtirî bu Yiesû auga. Piraatû aarigara mûno. 6Wakîra mwanka kagiita ga kîatho gîa Pasaka gaakinya, bwarî wîthîre bwa ngabana kûrekia mûgwate ûmwe ûra antû beendaga. 7Kagiita gaku ikwarî na mûgwate nceera eetagwa Baraba. Baraba ûyu aarî mûregi watho na aathaîkîîtwe n'ûntû bwa kûûraga muntû kûrî na mûgomo. 8Kîrîndî kîathi kîrî Piraatû kîanjîîria kûmûûria arekia mûgwate ûmwe wata wîthîre. 9Piraatû abaûria, "Ibûkwenda ndekia Mûnene wa Ayaundi?" 10Piraatû naiyî athînjîri bara banene ba Ngai baareeteete Yiesû kîrî we n'ûntû bwa bûra baamwîgagua rûriitho. 11Athînjîri babu banene ba Ngai ibaarî bakwîra antû, na antû beetîgîîria kwîra Piraatû arekie Baraba. 12Piraatû aûria antû kaîrî, "Aabu n'ata bûkwenda ndûtha na muntû ûyû bûgwîta Mûnene wa Ayaundi?" 13Kîrîndî kîaugîîria na inya kîamwîra, "Mwambe!" 14Piraatû abaûria, "I kî? I mabîtia marîkû arûthîîte?" Amwe na ûgu, kîrîndî gîaûkîîria kayû na inya nkûrûki, kîera Piraatû, "Mwambe!" 15Na n'ûntû Piraatû neendaga kûbaingîria bûra beendaga, auga Baraba arekue. Aaruta watho auga Yiesû aringwe ibooko. Rîru amûnenkanîra kîrî acikaarî athi kwambwa. 16Acikaarî babu baira Yiesû nyomba îra magamba maagiitagîrwa gûku kambîîni ya ngabana. Nyomba înu yeetagwa Puritoria. Bakûmwira ku beeta mbûûtû ya acikaarî bara bangî bonthe. 17Beekîra Yiesû nguo îndaaya ya rangi ya ûkûyû. Baatumania matî ma mîîgua maakara ta nthûmbî ya ûnene bamwîkîra mo. 18Bakûrûtha ûgu, baacooka baatua kûmwîra, "N'ata îîndî, Mûnene wa Ayaundi!" 19Acikaarî babu baacooka baakûng'anga Yiesû kîongo na kamûraagi bakîmûtuuyagîra mata. Bamûturîria maru bakîmûthekeera bakîîrûthaga taka bakûmûgonga. 20Bakûrîîkia kûrûtha ûgu, acikaarî babu bamûruta nguo înu yarî îndaaya. Bamwîkîra nguo ciake ciongwa kaîrî, rîru baathi kûmwamba. 21Bathiîte, baarîîkana na muntû eetagwa Simioni, wa kuuma gûntû gweetagwa Kureni. Simioni ûyu aarî îthe wa Aregisanda na Rubas. Kagiita gaku naumîîte mûndaani. Acikaarî baakamatithia Simioni mûtharaba wa Yiesû na taka. 22Baira Yiesû bantû eetagwa Gorogotha. Gorogotha i ta kuuga, 'Kîîndî gîa kîongo.' 23Bagûkinya, baageria gûkundia Yiesû ndibei yaunganîîtue na manemane. Yiesû aarega. 24Acikaarî babu baamba Yiesû mûtharabaani. Baacooka baaringîra nguo ciake kuura, muntû aathûkia îra aacindaga. 25Rîru baamwambire kwarî thaa ithatû cia rûkîîrî. 26Acikaarî bakûmwamba, baacooka agu îgûrû rîa kîongo giake mûtharabaani baaringaringîra kabaaû ga kwonania kîra Yiesû aathitangîrîtwe. Kabaaû gaku kaandîkîîtwe, "|scMÛNENE WA AYAUNDI.|d" 27Baacooka baamba atunyani baîrî agu akubî n'we. Ûmwe aarî rûteere rwake rwa ûrîo, na ûyu ûngî rûteere rwake rwa ûmotho. [ 28Maandîko Maatheru maingîka, mara maugîîte, "Aathûkiirue bûmwe na auni watho."] 29Bara baakûrûkagîîra agu Yiesû aambîîtwe bamûrumanga. Bainainagia biongo bakauga, "Ooo! Anga ûtiraugaga ûkoomborania Nyomba ya Ngai ûmîake kaîrî na ntugû ithatû! 30Teebambûre uume agu ûrî mûtharabaani, wîbonokie!" 31Wana athînjîri bara banene ba Ngai na aarimû ba watho ibaamûthekagîîra. Beeranaga, "Aroonokagia antû, îndî atikûûmba kwîbonokia! 32Ûkaaya kwîgua wabu n'we Kîrîstû, mûnene wa Isiraeri, îîndî neebambûre aume agu arî mûtharabaani, twone, tûmwîtîgie." Atunyani babu baambîîtwe agu wana bo barumanga Yiesû. 33Kwanjîîria mûthenya gatî, mwindu waruma mathaa mathatû nthîgûrû înu yonthe. 34Igûkinya thaa kenda, Yiesû aagondoka na inya. Auga, |i"Eloi, Eloi, lama cabakithani?"|d Kuuga ûgu i ta kuuga, "Ngai wakwa, Ngai wakwa, i kî n'ûntû wantiganîria?" 35Antû bamwe ba bara baarûngi agu bakwîgua Yiesû auga ûgu bauga, "Teeguani, n'Eriya agwîta!" 36Ûmwe wao augia rwîro aathi aathûkia cibonji amîtombeka ndibeini yarî na gana, amîogeera mûthiani wa kamûtî amîtiirithia mîromo ya Yiesû aciia. Auga, "Gatwoneeni ingî kana weegua Eriya akaaya amwambûre aume mûtharabaani ûyû aambîîtwe." 37Yiesû aagondoka kaîrî, aanyaarûka. 38Gîtambaa kîra kîagaanîîtie nyomba ya Ngai gîatembûkana maita maîrî kîganeene kuuma îgûrû mwanka nthî. 39Mûtongoria wa njûûrî ya acikaarî aarûngi agu mbere rungu rwa mûtharaba wa Yiesû. Akwona bûra Yiesû aakuyangire auga, "Na mma muntû ûyû araarî Mwana wa Ngai." 40Ikwarî na eekûrû beebûmbîîte gataaria bakîonaga bûra gwakarîkaga. Bamwe baao baarî Maria Mûmagindari, Saroome, na Maria gina wa Njakubu ûra mûniini na Njastas. 41Eekûrû babu baumanîîtie na Yiesû Gariiri bakîmûmenyagîîra. Na ikwarî kinya na eekûrû bangî baingî baayanîîtie na Yiesû Njerusaremu. 42Ûgoro bûgûkinya ntugû înu ya kwîthuuranîra n'ûntû bwa Sabatû, 43muntû ûmwe eetagwa Njosebu wa kuuma Arimathea aathi kîrî Piraatû aûmîrîîtie, aaroomba eetîgîîrue athûkie kiimba kîa Yiesû. Njosebu ûyu aarî ûmwe wa akîama ba kîama kîa Ayaundi, na aarî ûmwe wa bara beerîgîrîîte ûnene bwa Ngai bûkaaya. 44Piraatû aarigara akwîgua Yiesû naarî agûkua. Atoonaga taka ûkîûmba kwîgua Yiesû aarî agûkua na mpwî ûgu. Eeta ûmwe wa anene ba acikaarî ûra aakarîîtie Yiesû amûûria. 45Akwîrwa Yiesû naarî agûkua, eetîgîîria Njosebu athûkia kiimba. 46Njosebu aagûra cuka. Aambûra kiimba kîa Yiesû mûtharabaani. Akîoga na cuka înu aathi akiiga nthikooni yenjîîtwe rwaraani rwa iiga. Aingiritia iiga rîînene mûno aakunîkîra na rîo. 47Maria Mûmagindari na Maria gina wa Njastas boona kûra mwîrî wa Yiesû wathûngîîrue.

will be added

X\