MAARIKO 13

1Yiesû akiumagarûka nyomba ya Ngai, ûmwe wa arutwa baake amwîra, "Mwarimû, taraitha wone maiga ma mwako ûyû bûra marî mathongi!" 2Yiesû amwîra, "Nûkwona mwako ûyû mûnene ûûgû? Gûtirî iiga rîgaatigwa îgûrû ya rîra rîngî. Monthe i makaanyagaarua." 3Yiesû na arutwa baake baathi bwa Karîma ka Mîceituuni. Yiesû aakara nthî araithîîte bwa nyomba ya Ngai. Petûrû, Njakubu, Njoana na Enderea beera Yiesû barî bonka, 4"Tatwîre irî mantû mamu magaakarîka. Na i mbi îkoonania monthe marî akubî gûkarîka?" 5Yiesû abeera, "Îmenyagîîreeni bûtikeeneerue i muntû. 6Antû baingî bakaaya bagîtûmagîra riîtwa rîakwa bakauga i bo Kîrîstû, na bagaata antû baingî. 7Bweegua ndûa ikîrûîwa kana ikîgwetwa, bûtikaamake. Mantû ta mamu nwa mwanka matuîkîke, îndî ûyu t'uu mûthiro. 8Nthîgûrû îkaarûa na îra îngî, na ûnene bûrûe na bûra bûngî. Nthîgûrû îkainaina gûntû na gûntû, na mayûûra makaaya. Mantû mamu monthe i ta rûgakaî rwa mbere rwa mwekûrû arî akubî kûgîa na mwana. 9"Îmenyagîreeni. Bûkairwa kootiini na bûturîrwe masinagoogiini. Na n'ûntû bwakwa, bûkairwa kîrî mangabana na anene bûrî akûûyî. 10Na mbere ya mûthia ungwa ûkinya, ntheto îmbega nwa mwanka ûkeegua îgûtûmîîrua kîrî mîgongo yonthe. 11Bwagwatwa bwairwa kootiini, bûtikaathîîne bûgîcûa bûra bûkauga. Kagiita gaakinya bûkeewa mîgambo ya kuuga. 12Muntû agaakunyanagîra mûruagina akaûragwa n'anene. Mwana agaakunyanagîrwa n'îthe, na aana bakaang'entera aciari baao babaûragithie. 13Bûkaamenwa n'antû bonthe n'ûntû bwakwa. Îndî ûra ûkaûmîîria mwanka mûthia akoonokua." 14Yiesû auga, "Rîra bûkoona kîra kîthûûku mûno, kîra Ngai athûîre, kîrûngi ara gîtabatîîrue wîgua kîrî, (mûthoomi tanataûre), bara ûkeegua barî Njundea ibakuthûke bathi bwa irîma. 15Ûra akeegua arî rûûgûrû rwa nyomba, eendama atikaagerie kûthara nwa mbi. 16Ûra akeegua arî mûndaani atigaakare kûthûkia nguo yake ara agûtûûgîîrîîtie. 17Eekûrû bara ûkeegua barî barito kana barî na tûgenke twa gwonkia, gîku na ti kînyamaara bakoona kagiita gaku! 18Îrombaani ûtikeegue kûrî îgiita rîa mpîo kagiita gaku. 19N'ûntû kînyamaara kîra ûkeegua kîrî oogo i kîra gîtooneka nthîgûrû îno kaîrî kuuma îkûûmbwa. Na gûtirî kîngî ta kîo gîkooneka gûkû kaîrî. 20Ûkeegua ti bûra Mwathani akubîîtie ntugû inu, gûtirî muntû oonoka. Aikubîîtie n'ûntû bwa bara athuurîîte. 21Kwoogu ûra akaabwîra, 'N'ûyû Kîrîstû!', kana 'N'ûûra!', bûtikaamwîtîgie. 22N'ûntû Kîrîstû ba ûrongo na iroria bia ûrongo ûkeegua barî ku. Na bakaaringaga biama na kwonania magegania kaingo weegua gûkaûmbîka beeneeria kinya bara Ngai athuurîîte. 23Îndî biû îmenyeereeni. Nkûbwîra mantû monthe mbere ya makarîka." 24Yiesû aathi na mbere auga, "Na nyuma ya kînyamaara gîku kînene ûgu, riûa rîkaaruma mwindu na mweri ûtige kûtharara. 25Nthata igwe kuuma îgûrû, na mainya ma îgûrû mainainue. 26Rîru i rîo antû bakoona Mwana wa Muntû aayîîte na matu, arî na inya înene na mwago. 27Atûme araîka bathi nteere cionthe cia nthîgûrû beethîranie bara bathuure nthîgûrû yonthe." 28Yiesû auga, "Tathûkiani ngerekano ya mûkûyû bwîrutane na uu. Rîra mpong'i cia uu cianakaga, mathangû makaanjîîria kûririma, ibûmenyaga i thaano îrî akubî. 29Ûgu i ta bu ûkeegua kûrî rîra bûkoona mantû mamu magîkarîka. Bwona bûmenye Mwana wa Muntû arî akubî mûno kûûya. 30Na mma ga nkûbwîra, mantû mamu monthe magaatuîkîka rûciaro rûrû rûtarî rûthiru. 31Îgûrû na nthîgûrû bikaathira îndî biugo biakwa bitikooro bithira." 32Yiesû auga, "Gûtirî muntû aiyî ntugû kana îthaa. Gûtirî mûraîka arî îgûrû aiyî na wana Mwana atiiyî. I Baaba wenka aiyî. 33Kwoogu îmenyagîreeni na îcûûbagîreeni n'ûntû bûtiiyî irî ûkeegua kûrî. 34Gûkari ta muntû arî na rûgendo, na mbere ya athi agatiga eera woora mûruti ngûgî wake bûra akaarûtha. Na akeera kinya mûkaria mûrango akarage araithîrîte. 35Kwoogu îmenyagîîreeni n'ûntû bûtiiyî rîra mwene mûciî agaacooka. Bûtiiyî weegua akaaya ûgoro, ûtugû gatî kanene, rware rûgîtema, kana riûa rîkiuma. 36Ûkeegua bûteecûûbîrîte, aûmba kûûya rîra bûtakûmwîrîgîîra akeethîra bûmaami toro. 37Ûgu nkûbwîra i bu mbîîraga antû. Îmenyagîîreeni!"

will be added

X\