MAARIKO 1

1Ntheto îmbega ya Yiesû Kîrîstû, Mwana wa Ngai yambîîrie ûûgû. 2Kwandîkîîtwe n'ûmwe wa iroria, "Ga ngûkwîra, ngaatûma mûtûmwa wakwa mbere ûkinya akûrûthîre njîra." 3Na kaîrî kwandîkwa i kîroria Isaaya, "Kayû ka muntû igagûtûmîîria rwanda gakiugaga, 'Theriani njîra ya Mwathani, rûngariani kûra agaakûrûkîîra.' " 4Na kwoogu, i kîo n'ûntû Njoana aarî rwanda akîbaatithagia antû. Aatûmagîîria antû akabeera beerire meeyia maao ababaatithie, Ngai abarekere. 5Antû baingî mûno kuuma taûni ya Njerusaremu na gûntû kûngî gûku nthîgûrû ya Njundea baaya baumbûra meeyia maao, Njoana ababaatithia muurooni wa Njorondani. 6Njoana eekagîra nguo yarûthîîtwe na guaya ya nkamîîra, akooga mûkanda kauna. Aarîyaga ngige na ûkî bwa kîthaka. 7Njoana aatûmagîîria antû akabeera, "Ûra aayîîte nyuma yakwa n'we arî îgweta nkûrûki yakwa. Ntiagîrîte kinya wa gûkuamîîria mmûtharia iraatû ndigi. 8Niû ndîbûbaatithia na rûûyî. We akaabûbaatithia na Kîrundu Ûmûtheru." 9Îgiitaani rîru Njoana aabaatithanagia, Yiesû aaya aumîîte Gariiri taûni yeetagwa Nasareethi, aabaatithua i Njoana muurooni wa Njorondani. 10Yiesû akûriamûka rûûyîîni, oona îgûrû rîarugûka, Kîrundu Ûmûtheru eendama kîrî we akari ta îcea aagwîrîîra îgûrû rîake. 11Kayû kauma îgûrû kauga, "Woû ûrî Mwana wakwa ûra mbendeete mûno. Nûnkenagia mûno." 12Nthûti îmwe Kîrundu amwira rwanda, 13Yiesû aakara ku ntugû mîrongo îna waakîgeragua i Saitaani. Na gûku rwanda Yiesû akaranagia na nyamû cia kîthaka, îndî araîka ibaamweyaga ûteethio. 14Njoana akûthaîkwa nceera, nyumaani Yiesû aacooka Gariiri gûtûmîîria ntheto îmbega ya Ngai. 15Aatûmagîîria antû akabeera, "Îgiita rîgûkinya. Ûnene bwa Ngai bûkûthengeera. Îrireeni meeyia meenu bwîtîgie ntheto îmbega." 16Yiesû atambîîte na rûteere rwa îria rîa Gariiri, oona ategi ba makûyû baîrî bakîamba neeti ciao bagwata makûyû. Baarî Simioni na mûruagina Enderea. 17Yiesû abeera, "Nthingataani mbûtuîkithie ategi ba antû." 18Bamûthingata warîru baatiga neeti ciao naagu. 19Bakûthiyathiyanga, Yiesû eethîra ategi bangî baîrî barî îtarûûni rîao bagîtumaga neeti ciao. Baarî Njakubu na mûruagina Njoana, aana ba muntû eetagwa Cabendi. 20Yiesû akûboona abeeta. Nthûti îmwe Njakubu na Njoana baatiga îthe, Cabendi, na aruti ngûgî baao îtarûûni baathingata Yiesû. 21Yiesû na arutwa baake baathi taûni ya Kaperinaumu. Ntugû ya Sabatû înu yathingatîîte, Yiesû aathi sinagoogiini aarutana antû. 22Bara baamûthikîîrîîtie baarigara mûno n'ûrutani bwake n'ûntû we ataarutanaga ta aarimû ba watho. Aarutanaga na watho kuuma kîrî Ngai. 23Gûku sinagoogiini ikwarî na muntû aarî na kîrundu kîîthûûku. Muntû ûyu augîîria na inya, 24auga, "N'ata ûkwenda naati Yiesû Mûnasareethi? Ka ûûyîîte gûtûthiria kana? Imbiyî woû ûrî ûû. Ûrî Mûtheru kuuma kîrî Ngai." 25Yiesû aagondokera kîrundu gîku akîîra, "Kira na uume kîrî muntû ûyû." 26Kîrundu gîku kîthûûku gîatûgûûgia muntû ûyu gîkîrurumaga. Kîauma kîrî we kîathi. 27Antû bonthe bara baarî gûku baarigara mûno. Baanjîîria kûûrania, "I bûrîkû bûbû? Î muntû ûyû arîrutana mantû maageni na arîaria na watho kuuma kîrî Ngai! Î arîîra irundu biithûûku birûthe ûntû na bikamwathikîra!" 28Nkuma ya Yiesû yatamba na mpwî mûno gûntû kunthe gûku nthîgûrû ya Gariiri. 29Yiesû bakuuma sinagoogiini baathi kwa baSimioni na mûruagina Enderea. Ibaarî kinya na Njakubu na Njoana. 30Mûthoni wa Simioni wa mûka naamaami aayîîtue kûbîîyanîra mwîrî. Yiesû akwîrwa mantû maake, 31aathi amûgwata njara, akûmûûkîîria aabua aanjîîria kûbagaagûra. 32Ûgoro nyuma ya riûa rîkûthûa, bonthe bara baayîîtue na bara baarî na irundu biithûûku baareetwa kîrî Yiesû. 33Kîrîndî kîonthe gîa taûni kîethîreene agu mwîrango wa nyomba înu Yiesû aarî. 34Yiesû ooria baingî baao, bara baarî na ndwari mîthemba na mîthemba, na eengatia irundu biingî biithûûku biauma kîrî antû. Na ataareka irundu bibu biaria n'ûntû ibiaiyî we aarî ûû. 35Rûûni rûkîîrî mûno, Yiesû aaraûka kuumagarûka. Auma taûni înu aathi gûntû gûtaarî na antû kûrombera noogo. 36Simioni na bara bangî baathi kûmûcûa. 37Bakûmwona bamwîra, "Antû bonthe ibagûgûceria." 38Yiesû abeera, "Tûthiini taûni ira ingî na cio ngatûmîîrie noogo n'ûntû ûgu i bu bwatûmire mbûya." 39Kwoogu Yiesû aariûnga gûku Gariiri kunthe agîtûmagîîria masinagoogiini, na akîîngatagia irundu biithûûku bikauma kîrî antû. 40Muntû ûmwe aarî na mûtigiri aaya kîrî Yiesû, aamûturîria maru amwereka amwîra, "Weegua weenda kûmboria, mboria nthere." 41Yiesû aûyûrwa i kîao. Aatambûrûkia njara amûringithia, amwîra, "Yîî, inkwenda. Thera!" 42Nthûti weenu muntû ûyu oora mûtigiri. 43Mbere Yiesû eera muntû ûyu athi, amûkaania mûno amwîra, "Menyeera ûtikeere muntû, 44îndî îthi wonwe i mûthînjîri wa Ngai, ûrute kîewa kîra Musa augire kîrutagwe kîrî ûkûûyî kîrî antû." 45Îndî amwe na ûgu, muntû ûyu aathiire eera antû bonthe nkuma înu yatamba gûntû kunthe mwanka gwatuîka Yiesû atikîthi taûni antû bonthe barega kûmwîthîranîra. Yiesû aakara gûntû gûtaarî na antû, na naagu i noogo antû kuuma nteere cionthe baathiyaga kûmwona arî.

will be added

X\