RUKA 2

1Nyuma ya îgiita rîtarî rîraaya kuuma Njoana agûciarwa, Kaisaarî Aûgûstû aaruta watho auga antû ba nthîgûrû yake bonthe beebandîkithie. 2Rîrî i rîo rîarî îgiita rîa mbere gûtara antû kuuma Akuirino agûtuîka Ngabana wa nthîgûrû ya Sîîria. 3Wamuntû wonthe aathiyaga kwîbandîkithia naara booyûe baatûûraga tene. 4Njosebu auma taûni ya Nasareethi, gîteere kîa Gariiri, aathi Bethireemu taûni ya baNdaundi n'ûntû aarî wa rûrîîyo rwao. 5Aathiire noogo kaingo beebandîkithia na Maria ûra aakeethagia agûra. Maria naarî na nda. 6Barî Bethireemu, Maria aakinyithia îgiita rîa kûgîa na mwana. 7Aaciara kaana ga kaîyî karî gîtûra îria gîake, akaguîka na nguo, akamaamia rûkongorooni rûra ng'ombe ciarîyagîra. Batoona kîmaamo nyomba ya ageni n'ûntû bwa antû kwingîa. 8Ikwarî na arîîthi baareerie ng'ondu ciao rûriîni gûntû gûku. 9Mûraîka wa Mwathani aarûngama mbere yao, mwago wa Mwathani wabamûrîka. Baamaka mûno. 10Mûraîka abeera, "Tigaani kûmaka n'ûntû ndaaya kûbwîra ntheto îmbega ya gîkeno kîînene kîrî antû bonthe. 11N'ûntû îmunthî taûni ya baNdaundi bûgûciarîrwa Mwonokia, n'we i Kîrîstû Mwathani. 12Kaana kara bûkoona kaguîkîîtwe na nguo kaamaamua rûkongorooni rûra ng'ombe irîyagîra, gîku i kîo gîkaabûmenyithia n'we Mwonokia." 13Nthûti îmwe njûûrî ya araîka ba îgûrû na mûraîka ûyu baanjîîria kwina bagîkumagia Ngai. Bainaga, 14"Ngai ûra akaraga îgûrû mûno arookumagua, ûkiri ibwîgue bûrî gûkû nthîgûrû kîrî antû baake bara bamûkenagia!" 15Araîka bakûbatiga beetia îgûrû, arîîthi beerana, "Tûthiini Bethireemu tûkeebonere ûntû bûbû Mwathani atûmenyithia." 16Bauma agu na mpwî baathi. Bagûkinya beethîra Maria na Njosebu, na kaana kamaamîîtue rûkongorooni rûra ng'ombe ciarîyagîra. 17Arîîthi bagûkoona, beera antû mantû mara mûraîka aabeerîîte îgûrû rîa kaana gaku. 18Antû bonthe bara beegiirue mantû mara arîîthi baabeerire, baarigara i mo. 19Maria aakira na mo akîmathûgaanagîria na nkoro. 20Arîîthi baacooka naara baumîîte bakîgongaga na bagîkumagia Ngai n'ûntû bwa mantû mara beegîîtue, na n'ûntû bwa kwona mantû makari bûra mûraîka aabeerîîte. 21Kagenke gaku gagûkinyitha ntugû inyanya gaataanwa geetwa Yiesû. Geetirwe riîtwa warîra keerwe i mûraîka mbere ya kinya kagîa nda ya gina. 22Îgiita rîa kwîtheria kwa Maria rîakinya wata bûra watho bwa Musa bwaugîîte kûrûthagwe. Baathûkia kaana baathi na ko Njerusaremu gûkanenkanîra kîrî Mwathani. 23Wata bûra watho bwa Mwathani bwaandîkîîtwe bwauga, "Kîîmbere gîa karûme kîonthe gîgeetwa kîîtheru kîrî Mwathani." 24Baacooka, wata bûra watho bwa Mwathani bwaugîîte, baarutîra Ngai kîgongwana kîa "Macea mara ma mîciî maîrî kana maunga ma mo maîrî." 25Ikwarî na muntû aatûîre Njerusaremu eetagwa Simioni. Aarî muntû ûmwagîru na aakuthûkaga Ngai. Aakaraga eeteereete kwonokua gwa antû ba Isiraeri. Kîrundu Ûmûtheru naarî amwe n'we. 26Aamwete wîrane amwîra, "Ûtiikua ûtooneete Kîrîstû wa Mwathani." 27Simioni aathûngîra nyomba ya Ngai atongoreetue i Kîrundu. Aciari ba Yiesû, ta bo Njosebu na Maria, baira Yiesû nyomba ya Ngai kûringana na bûra watho bwaugîîte kûrûthagwe. 28Simioni aathûkia Yiesû, amûgwata. Aacookeria Ngai nkaatho, auga, 29"Îîndî, Mwathani, ûkwingia wîrane bwaku, ndekeeria niû, mûruti ngûgî waku, mbuume nthîgûrû îno na ûkiri. 30Niû ningwa nkwona Mwonokia na meetho maakwa, 31ûra ûthuuranîrîte antû bonthe bakîonaga. 32We i werû bwa kûmûrîkîra antû bara batarî Ayaundi, na gûtûma antû baaku, Aisiraeri, boona mwago waku." 33Njosebu na Maria baarigara mûno i mantû mamu Simioni aariirie îgûrû rîa Yiesû. 34Simioni abathaarima. Eera Maria, "Kaana gaka gagaatûma Aisiraeri baingî baûra kana boonokua. Agaatuîka rwano îndî antû bagaakararia. 35Mathûgaania ma antû baingî makaumbûrwa. Na woû naawe kîîthikîîro gîgakûmunta nkoro ta rûyiû." 36Ikwarî na ntigwa îmwe kîroria yeetagwa Ana. Ana aarî ûmûkûrû mûno. Aarî na ûkûrû bwa mîanka mîrongo înaana na îna. Aarî mwarî wa muntû eetagwa Panueri wa mwîrîga wa baAceri. Akûgûrwa baakarire mîanka mûgwanja, mûrûme aakua. Ana ataatîîraga nyomba ya Ngai mûthenya na ûtugû. Aathiyaga kûromba Ngai na agatîîrîra kûrîa irio n'ûntû bwa maromba. 38Ana aayîîte nyomba ya Ngai, aaya kagiita gaku Yiesû aareeteetwe. Akûûya, aacookeria Ngai nkaatho. Eera antû bonthe mantû ma kaana gaku bara beeteereete kwonokua gwa antû ba Njerusaremu. 39Njosebu na Maria bakûrûtha mantû monthe wata bûra watho bwa Mwathani bwaugîîte, beenûka kwao taûni ya Nasareethi, gîteere kîa Gariiri. 40Yiesû aakûra, aagania inya. Aûmea mûno na eegua arî na ûtugi bwa Ngai. 41Wakîra mwanka îgiita rîakinya rîa kûrîa kîatho gîa Pasaka, aciari ba Yiesû ibaathiyaga Njerusaremu. 42Yiesû agûkûra aakinyithia mîanka îkûmi na îîrî, wata wîthîre ibaathiire Njerusaremu kîathooni gîa Pasaka. 43Kîatho gîkûthira, Yiesû aatigwa Njerusaremu aciari baake beenûka. Bataamenya agîtigwa. 44Baathûgaanagia nwa baathiyanîîtie amwe n'we na antû bara bangî. Ntugû îkûthira wabarî rûgendooni, baanjîîria kûmûûrithîria kîrî antû baao na kîrî acoore. 45Gûgûtuîka batikûmwona, rûûni baacooka Njerusaremu kûmûceria. 46Aûkeeni, i rîo baathiire kûmwîthîra arî nyomba ya Ngai, akari na aarimû ba watho abathikîîrîîtie bakîaria na akîbaûragia biûria. 47Antû bonthe bara baamwîgagua ibaarigaraga mûno i ûûme bûra aarî na bu bwa gûcookia biûria. 48Aciari baake bakûmwona baarigara mûno. Gina amûûria, "Mwana wakwa, i mbi n'ûntû watûrutithia ngûgî ta îno? Ga tûtakûmakîîte mûno tûrî na abaagu tûgîgûceria!" 49Yiesû abaûria, "I mbi bûgûnceragîria? Ka bûtakwiyî mbatîîrue kwîgua ndî nyomba ya Baaba?" 50Aciari ba Yiesû bataamenya bûra aabeeraga. 51Yiesû aacookania na aciari baake bwa Nasareethi, aakara na bo akîbaathîkagîra. Gina aakaraga na mantû mamu monthe oonaga nkorooni yake. 52Yiesû aathi na mbere kûgania ûûme wabûra aakûraga, agîkenagia Ngai na antû.

will be added

X\