RUKA 18

1Yiesû akîrutana arutwa baake, abaa ngerekano aboonia ibabatîîrue barombaga Ngai ntugû cionthe batakûnoga. 2Abeera, "Ikwarî na njanji aatûîre taûni îmwe ataakuthûkaga Ngai na ataatîîyaga muntû. 3Na ikwarî na mwekûrû ûmwe ntigwa wana we aatûîre taûni înu. Mwekûrû ûyu naathiyaga kwa njanji ûyu akîendaga amwathûrana na mûnthû wake. 4"Njanji aamba aakara bantû a ntugû inyingî gûtarî bu akwenda kûmûrûthîra. Nyumaani eebîîra na nkoro, 'Wana weegua ntikuthûkaga Ngai, kana ntîîya muntû, 5nkaathûrana ntigwa îno na mûnthû wa yo îtige kûndîa kîongo na kûûyaga gwakwa rîonthe!' " 6Mwathani auga, "Îîrutaneeni na mantû ma njanji ûyû ataarî ûmwega. 7Amwe na ûthûûku bwake naagiitire îgamba bwega. Bûtikûthûgaania Ngai agaateethia antû baake bara athuurîîte, bara bamûrîragîra ûtugû na mûthenya? Eengeerie kûbateethia. 8Na ga nkûbwîra, akabaathûrana na mpwî. Îndî rîra Mwana wa Muntû akaaya kuuma îgûrû n'antû bagana akeethîra barî na wîtîgio?" 9Yiesû aatûmîîre ngerekano îno akîaria na antû bara beebîtîgagia i baagîru, bara bamenagîîria bara bangî. Yiesû auga, 10"Antû baîrî ibaathiire nyomba ya Ngai kûromba. Ûmwe aarî Mûbarisai na ûra ûngî aarî mûrûngithia ûgooti. 11Mûbarisai akûrûngama, aaromba na wîkumia auga, 'Ingûgûcookeria nkaatho Ngai n'ûntû niû ntirî mwîyia ta antû bara bangî, kana ta mûrûngithia ûgooti ûûra! Niû ntienagîîria antû nthûkia into biao, ntiîyagia na ntithûngagîîra. 12Niû intîîragîra kûrîa irio n'ûntû bwa maromba ntugû ciîrî wakiumia na inkûrutagîra gîcuncî gîa îkûmi gîa into biakwa.' 13"Mûrûngithia ûgooti we aarûngama gataaria mma, na ataaraitha îgûrû akîromba. Aaringaringire kîbara gîake na kîîthikîîro auga, 'Ngai mbîgua kîao ndî mwîyia!' 14"Ga nkûbwîra, mûrûngithia ûgooti eenûkire arî îthaabuuni rîa antû bara baagîru kîrî Ngai nkûrûki ya Mûbarisai ûyu, n'ûntû muntû ûra akeeneneithia nakaanyithua. Na ûra akeenyithia akaaneneithua." 15Antû bamwe ibaareeteete twana kîrî Yiesû, kaingo aturîîkîîra njara atûthaarima. Îndî arutwa baake baanjîîria kûbakaania. 16Yiesû eeta twana tûthi kîrî we. Eera arutwa baake, "Tigaani twana tûûye kîrî niû. Bûtigaatûrigîîrie n'ûntû ûnene bwa Ngai i bwa bara bakari ta twana tûtû. 17Na mma ga nkûbwîra, ûra atathûkia ûnene bwa Ngai na wîtîgio ta bwa kaana kaniini atithûngîra ku." 18Mûtongoria ûmwe Mûyaundi aûria Yiesû, "Mwarimû ûmwega, n'ata ndûtha nkathi mwoyooni wa tene na tene?" 19Yiesû amûûria, "I kî n'ûntû ûkûmbîta ûmwega? Gûtirî we mwega tatiga Ngai wenka. 20Woû nwiyî maathana mara maugîîte, 'Ûtikaathûngîîre,' 'Ûtikaûragane,' 'Ûtikaiye,' 'Ûtigaatuuyanîîre,' 'Tîîyaga abaagu na nyûkwe.' " 21Muntû ûyu amwîra, "Ntûîre mbathîkagîra maathana mamu monthe kuuma ndî mwana." 22Yiesû akwîgua ûgu amwîra, "N'ûntû bûmwe ûtigeerie ûtarûthîîte. Îthi wendie into bionthe bira ûrî na bio ûgaîre nkîa mbia ira bikauma, rîru ûûye ûnthingate. Ûkarûtha ûgu, ûkeegua ûrî na ûtonga bwaku îgûrû." 23Muntû ûyu akwîgua ûgu aathi akîonanagia kîeba n'ûntû naarî na into bingî mûno. 24Yiesû amûraitha athiîte eera arutwa baake, "N'ata kûrî inya bara barî into biingî kûthi ûneneeni bwa Ngai! 25I ûûthû nkamîîra gûkûrûkîîra karinyaani ga cindano kîrî gîtonga kûthi ûneneeni bwa Ngai." 26Antû bakwîgua ûgu baûria, "Anga kûrî we akoonokua?" 27Yiesû abeera, "Bûra bûtaûmbîka kûrûthwa i muntû, nwa Ngai aûmba kûburûtha." 28Petûrû amûûria, "Î tiû tûtigîîte mîciî yetû twakûthingata gûgaakara ata?" 29Yiesû abeera, "Na mma ga nkûbwîra, gûtirî muntû atigîîte mûciî wake, kana mwekûrû wake, kana aruagina, kana aciari baake, kana twana twake n'ûntû bwa ûnene bwa Ngai, 30atakîewa bibu bionthe maita îgana kagiitaani gaka, na kagiita gakaaya akeewa mwoyo wa tene na tene." 31Yiesû eeta arutwa bara baake îkûmi na baîrî gataaria aanjîîria kûbeera, "Îîndî tûthiîte Njerusaremu na twakinya, mantû monthe mara maandîkirwe n'iroria îgûrû rîa Mwana wa Muntû nwa mwanka maûyûre. 32Akaanenkanîrwa kîrî antû batarî Ayaundi bamûnyûrûnte, bamûrumange, na bamûtuîre mata. 33Bakamûringa ibooko na bamûûrage, îndî akaariûka ntugû ya ithatû." 34Arutwa bataaciûkîrwa bamenya mantû mamu Yiesû aaragîîria n'ûntû ibaithîîtwe ûmenyo bûbu. 35Yiesû na arutwa baake barî akubî gûkinya taûni ya Njeeriko, muntû ûmwe aarî ntûngi naakari rûteere rwa njîra akîrombaga antû ûteethio. 36Akwîgua kîrîndî gîkûrûkîîte, eenda kûmenya bûra gwakarîkaga. 37Antû bamwîra, "I Yiesû wa kuuma Nasareethi akûrûkîîte." 38Ntûngi înu yaanjîîria kûmwîta na inya îkiugaga, "Yiesû, Mwana wa mûciî wa Ndaundi, mbîgua kîao!" 39Antû bara baatongoreetie baanjîîria kûmîkaania bakîmîîraga îkire. Yaûkîîria kayû na inya nkûrûki îkiugaga, "Yiesû, Mwana wa mûciî wa Ndaundi, mbîgua kîao!" 40Yiesû aarûngama. Auga, "Ndeeteraani we aaga." Ntûngi înu îgûkinya kîrî Yiesû, Yiesû amîûria, 41"N'ata ûkwenda nkûrûthîra?" Ntûngi înu yamwîra, "Mwathani, ga nkwenda ntua kwona." 42Yiesû amîîra, "Îtua kwona! Wîtîgio bwaku bûgûtûma woora." 43Nthûti weenu muntû ûyu aarî ntûngi aatua kwona, aathingata Yiesû agîkumagia Ngai. Kîrîndî gîkwona ûgu wana kîo gîakaatha Ngai.

will be added

X\