RUKA 15

1Îgiita rîmwe arûngithia ûgooti na eeyia ibaayire kwîgua bûra Yiesû aarutanaga. 2Abarisai na aarimû ba watho baanjîîria kûnung'una bakîûragia, "I mbi îgûtûma muntû ûyû athagaana eeyia na arîyanîra na bo?" 3Yiesû abaa ngerekano îno. Abaûria, 4"Bûrîthûgaania ata? Ûkeegua muntû arî na ng'ondu ciake îgana, îmwe ya cio îkaûra, ntikuuga natiga inu ingî mîrongo kenda na kenda bantû eega akathi gûcûa îra mbûru mwanka rîra akaamîona? 5Akaaya kûmîona amîîkîra ituro akamîkamata akeneete mûno, 6aakinya mûciî ageeta acoore baake na atûûri akabeera, 'Tûkeneereeni tûrî amwe n'ûntû nkwona ng'ondu yakwa îra îkûûrîîte.' 7"Ga nkûbwîra, gîkeno ta gîku i kîo wîgagua kîrî îgûrû rîra mwîyia ûmwe eerira. Wîgagua kûrî na gîkeno ta gîku, kîînene mûno nkûrûki ya kûrî na antû mîrongo kenda na kenda baagîru batarî na ûntû bwa kwîrirîra." 8Yiesû abaa ngerekano îîngî. Abeera, "Î kana rî, kûrî mwekûrû aûmba kwîgua arî na fetha îkûmi, îmwe ya cio yaûra akarega kûmuntia taa athûkia gîciati aciata nyomba amîceria bwega mwanka rîra akaamîona? 9Akaaya kûmîona, eeta acoore na atûûri bonthe akabeera, 'Tûkeneereeni amwe n'ûntû nkwona fetha îra ngûteete.' 10"Ga nkûbwîra, ûgu i ta bu araîka ba Ngai bakenaga mwîyia ûmwe eerira." 11Yiesû aacooka abaa ngerekano îngî kaîrî. Abeera, "Ikwarî na muntû ûmwe aarî na nthaka ciake ciîrî. 12Ûra mûniini eera îthe, 'Baaba, ngaîra into biakwa weendî bira ûraayaga kûngaîra.' Îthe abagaîra. 13"Nyuma ya ntugû inkai nthaka înu yarî niini, yendia into bia yo bionthe yakamata mbia yathi na cio bwa nthîgûrû îngî, kûraaya na mûciî wao. Yenyangia kîra kîonthe yarî na kîo na mantû maathûûku. 14Îkûthiria mbia, nthîgûrû înu yagwatwa i yûûra rîînene mûno. Mûthaka ûyu aanjîîria kûnyamaara. 15Aathi gûcûa ngûgî kwa muntû ûmwe naagu nthîgûrû înu. Muntû ûyu amwaa ngûgî ya kûmûrîîthîria ngûrwe ciake. 16Mûthaka aagwatwa i yûûra mwanka eenda kûrîa makonde mara ngûrwe ciarîaga. Gûtirî muntû aamûrûmagia gîntû gîa kûrîa. 17"Akûthûgaania, aacooka aarîcûkwa. Eebûûria, 'N'aruti ngûgî bagana barî kwa baaba bakûrîa bakabaa na irio bigatigara, naani nwaka nkûgûîra naaga i yûûra! 18Ndîînûka nthi mbîîre baaba, "Baaba, imbîyîîtie kîrî Ngai, na kîrî woû. 19Wana ntiagîrîte gwîtwa mwana waku kaîrî. Itû, aba, nthûkia ta ndî ûmwe wa aruti ngûgî baaku." ' 20Kwoogu aûkîîra aanjîîria kwînûka mûciî kwa îthe. "Waarî gataaria mma, îthe akûmwona aayîîte amwîgua kîao. Augia rwîro amûthagaana. Akûmûkinyîîra amûrigicîîria njara, amûcunca. 21"Mwana ûyu amwîra, 'Baaba, imbîyîîtie kîrî Ngai na kîrî woû. Wana ntiagîrîtwe gwîtwa mwana waku kaîrî.' 22"Îthe eeta aruti ngûgî baake. Abeera, 'Îthiini na mpwî bûreete nguo îra nthongi mûno bûmwîkîre. Na bûcooke bûmwîkîre mbete kîara na iraatû magûrû. 23Rîru bûthi bûreete njaû îra noru bûûrage tûrîeni tûkeneere, 24n'ûntû mwana ûyû i taka araarî ûmûkuû aariûka. Naraûrîîte oonara!' Baanjîîria gûkeneera." 25"Mwana wake ûra mûkûrû aarî mûndaani akîrutaga ngûgî. Arî njîraani eenûkîîte, arî akubî na mûciî eegua antû bakiina. 26Eeta mûruti ngûgî ûmwe amûûria, 'N'ata antû bakûrûtha aaga?' 27"Mûruti ngûgî ûyu amwîra, 'Mûruanyûkwe naayire na abaagu akûmûthînjîra njaû îra noru n'ûntû bwa kûmûcookera kaîrî arî mwoyo.' 28"Mûthaka ûyu ûngî eegua ûgu aathûûra, aarega kûthûngîra nyomba înu. Îthe aumagarûka nja kûmwereka athûngîra. 29Mûthaka ûyu eera îthe, 'Ntûîre gûkûrutîra ngûgî mîanka îmingî ngîkwathîkagîra na gûtirî ntugû wampa nwa kabûri nthînja tûrîyanîra na tûkenanîra na acoore baakwa. 30Îndî mwana ûyu waku akûûya we, nyuma ya kwînyangia into na marwaya wamûthînjîra njaû îra noru!' 31"Îthe amwîra, 'Mwana wakwa, tûrî naawe aaga ntugû cionthe na into bibi ndî na bio bionthe i biaku. 32Kwoogu ikwagîrîte kûrûtha kîatho gîkî tûrîyanîra na tûkena tûrî amwe, n'ûntû mûruanyûkwe ûyû i taka arakuîte aariûka. Naraûrîîte oonara.' "

will be added

X\