RUKA 14

1Ntugû îmwe ya Sabatû, Yiesû aathûngîra kûrîa irio nyomba ya mûtongoria ûmwe, Mûbarisai. Antû bara baarî oogo baarîthania n'we bakîenda kwona bûra akaarûtha. 2Ikwarî na muntû ûmwe oogo aayîîtue mûrimo wa kwimba njara na magûrû. 3Yiesû aûria aarimû ba watho na Abarisai, "Watho ibwîtîgîîrîîtie kworania ntugû ya Sabatû kana bûtiîtîgîîrîîtie?" 4Gûtirî we aaria. Yiesû ooria muntû ûyu, amûrekeeria aathi. 5Yiesû aûria, "N'ûû wacienu eegua arî na îng'ooi rîake kana ng'ombe yake îgûîte mûthûrûriini ntugû ya Sabatû, îndî atamîrute na mpwî?" 6Gûtirî we aûmba kûmûcookeria nwa ata. 7Yiesû akwona bûra bara beetîîtwe kîathooni beendaga gûkara mbere itîîni bia gîtîîyo, aatûmîra ngerekano abeera, 8"Ûgeetwa i muntû kîathooni ta kîa wiki, ûtikeende gûkara mbere. Mûgeni ûngî arî na gîtîîyo nkûrûki yaku aûmba kûûya. 9Na aaya, ûra abwîtîîte akaaya akwîre, 'Tanenkera muntû ûyû kaanya akare aaga.' N'îgi mûno ûthiîte gûcûa gîtî kîa nyuma ûkarîra. 10Ûkaaya gwîtwa kîathooni, îthi ûkare nyuma kaingo ûra agwîtîîte aaya akwîthîra ûkari nyuma akûthûkia akwira mbere, na ûgaatîîywa n'antû bonthe bara ûkeegua bûkîrîyanîra na bo. 11Ûra akeeneneithia akaanyithua. Na ûra akeenyithia akaaneneithua." 12Yiesû aacûûba mwene kîatho amwîra, "Waruga irio bia mûthenya kana bia ûgoro, ûtigeete acoore, aruanyûkwe, na antû beenu, kana itonga bia ntûûra yenu, n'ûntû wana bo bagaacooka bagwîte bakûrîe. 13Rîra ûrî na kîatho îtaga nkîa, bionje, ithua, na ntûngi; 14na ûkaathaarimwa n'ûntû bo batirî na gîntû gîa gûkûrîa na kîo. Ngai agakûrîa îgiita rîakinya rîa kûriûkua kwa bara baagîru." 15Muntû ûmwe kîrî babu Yiesû aarîyanagîra na bo akwîgua ûgu amwîra, "Kîthaarimo i kîrî muntû ûra akaarîa mûgaate ûneneeni bwa Ngai!" 16Yiesû amwîra, "Muntû ûmwe naarugire kîatho kîînene mûno eeta antû baingî. 17Îgiita rîgûkinya, aatûma mûruti ngûgî wake aathi kwîra bara beetîîtwe îgiita rîgûkinya ibaaye kîathooni. 18"Îndî wamuntû aarî ûmwîte aanjîîria kweyana gîtûmi gîake gîa kûrega kûthi. Wa mbere auga, 'Kûrî mûnda ndaragûrire na mbuîrîîte nthi gûcuona bûra ûkari. Itû ndekera.' 19"Wa baîrî auga, 'Kûrî ncamba ciakwa îkûmi cia mûraaû ndaragûrire, na mbuîrîîte nthi kûgeria mbona bûra ikûruta ngûgî. Itû ndekera.' 20"Wa bathatû auga, 'Ndî na mwiki. Kwoogu ntiûmba kûûya.' 21"Mûruti ngûgî ûyu aatûmîîtwe aacooka eera mûnene wake bûra antû babu baugire. Mûnene akwîgua ûgu baugire aathûûra mûno. Eera mûruti ngûgî ûyu wake, 'Taumagarûka na mpwî ûthi barabaraani cia taûni, iinene na iiniini wîte nkîa, bionje, ntûngi na ithua.' 22"Mûruti ngûgî ûyu aarûtha ûgu eerîîtwe. Aacooka eera mûnene, 'Nkûrûtha bûra ûkûmbîîrîîte, îndî wana îîndî nyomba îrî na kaanya kaûmba gûkara antû bangî.' 23"Mûnene eera mûruti ngûgî, 'Umagarûka kaîrî ûthi na barabara na njîra ira igendeete mîankaani ûkinyîîrie wamuntû wonthe ûra ûkoona aaye, kaingo nyomba yûyûra. 24Ga nkûbwîra, gûtirî muntû kîrî bara ndareetîîte akaarûma nwa mbi ya kîatho gîakwa.' " 25Îgiita rîmwe kîrîndî gîa antû ikîathiyanîîtie na Yiesû. Yiesû abacûûba abeera, 26"Gûtirî muntû atuîka mûrutwa wakwa, nwanga akambenda nkûrûki ya bûra eendeete îthe na gina, mwekûrû wake na twana twake, kana aruagina na aaragina, kana bûra eendeete mwoyo wake. 27Muntû atakamata mûtharaba wake aanthingata atiûmba gûtuîka mûrutwa wakwa. 28"Muntû akeenda gwaka nyomba îndaaya, mbere nwa mwanka atare mbia ira ikwendekana kûmîûyûria oone kana arî na cio 29atikaaye kwînjîra mûcingi îrema kûûyûra, antû bamîona bamûthekeera bauga, 30'Eneeni ûyû kaayia aranjîîrîîtie gwaka nyomba aaremwa kûmîûyûria!' 31"Î kana rî, anga kûrî mûnene eetîgîra kûrûa na mûnene ûngî mbere ya aamba gûkara nthî athûgaania bwega oona kana kwaûmbîka akarûa na mûnene ûyu akwenda barûa we arî na acikaarî ngiri mîrongo îîrî, n'we arî na acikaarî ngiri îkûmi? 32Akoona atiûmba ndûa înu, n'antû atûma bakathi kûromba mûnene ûyu ûkiri arî kûraaya, mbere ya bakinyanîîra. 33Kwoogu gûtirî we wacienu aûmba gûtuîka mûrutwa wakwa, nwanga agatiganîria bionthe bira arî na bio." 34"Mwonyo n'ûmwega, îndî ûkathira mûcamo ûtiîkîrîka uu kaîrî. 35Ûkarire ûgu, ûtirî gîtûmi kaîrî n'ûntû ûtigerwa mûndaani ûtuîka mboreo. Nûteeyagwa. Ûra arî na matû neegue."

will be added

X\