RUKA 13

1Kagiitaani wagaku antû bamwe ba bara baarî agu beera Yiesû mantû ma antû ba kuuma Gariiri, bara Piraatû aûragithiirie bakîrutîra Ngai kîgongwana kîao barî ara kîgongwana kîa nyamû kîarutagîrwa. 2Yiesû abaûria, "Kabûkûthûgaania antû babu baûragirwe n'ûntû i bo baarî na meeyia nkûrûki ya antû bara bangî bonthe ba gîteere kîa Gariiri? 3Arî, gîku ti kîo kîarî gîtûmi. Ga nkûbwîra, twanga bûkeerira meeyia meenu, bûkaathira wata bo bwinthe. 4Kana ibûkûthûgaania antû bara îkûmi na banaana, bara boomokeerwe i nyomba îra yarî îndaaya mûno Siroamu yabaûraga ka baarî na meeyia nkûrûki ya antû bonthe ba Njerusaremu? 5Arî gîku ti kîo kîarî gîtûmi. Ga nkûbwîra, twanga bûkeerira meeyia meenu, bûkaûra bwinthe wata bo." 6Yiesû aaria agîtûmagîra ngerekano eera antû, "Muntû ûmwe naarî na mûkûyû mûndaani wake wa mîcabiibû. Akûthi kwona kana nwaciere nkûyû, eethîra ûtaciere. 7Eera mwandîkwa wake wa mûnda, 'Taraitha wone mîanka îthatû îkûthira wankîîyaga kwona kana mûkûyû ûyû nûciere, îndî gûtirî rîo ndoona ûciere. Curîîke ûtige kûmbonderia mûnda mana.' 8"Mwandîkwa eera mwene mûnda, 'Rekana na uu itû, aba, mbambe ncurîmîre na ncuîkîre mboreo mwanka ûyû. 9Ûkaaya gûciara matunda, mwanka ûyu ûngî ûkare. Îndî ûkarega gûciara amwe na ûgu, rîru i rîo ûkauga ûrîîkwe!' " 10Ntugû îmwe ya Sabatû, Yiesû naarutanaga sinagoogiini. 11Ikwarî na mwekûrû ûmwe gûku aarî na kîrundu kîîthûûuku kîamwonjeetie bantû a mîanka îkûmi na înaana. Mwekûrû ûyu aathiyaga agûnkuîte mwanka gwatuîka mûgongo wake ûtigîtambûrûka, arûngama bwega. 12Yiesû akûmwona amwîta. Amwîra, "Ûkworua wonje bwaku, mwekûrû." 13Yiesû akûmwaigîîra njara, nthûti îmwe mûgongo wake watambûrûka. Mwekûrû ûyu akûrûngama, aakaatha Ngai. 14Mûtongoria wa sinagoogi aathûûra Yiesû akworania ntugû ya Sabatû. Eera antû, "Kûrî ntugû ithanthatû cia kûruta ngûgî. Rîru i rîo bwagîrîtwe kûûya bûkoorua, îndî ti ntugû ya Sabatû." 15Mwathani amûcookeria amwîra, "Eebwithia baba! N'ûû wacienu atarugûragîra ng'ombe yake kana îng'ooi rîake athi kûnyuithia ntugû ya Sabatû? 16Mwekûrû ûyû we n'wa rûrîîyo rwa Îburaîmu, Saitaani naratûîre amûthaîkîîte mîanka îkûmi na înaana. Kaatabatîîrue athaûrwa auma kîthaîkooni ntugû ya Sabatû?" 17Ûgu Yiesû augire ibweekîîre anthû baake nthoni. Antû bonthe baakena n'we n'ûntû bwa mantû mara aarûthire ma kûrigaria. 18Yiesû aûria, "I mbi mma mbûmba kûbuanaania n'yo ûnene bwa Ngai?" 19Auga, "Bûkari ta gapîndî ka mûtî kara muntû aathûkiirie aanda mûndaani wake, gapîndî kara kaniini kîrî mpîndî cionthe. Gagûkûra gaatuîka mûtî ûmûnene, nyoni ciaya ciaka ntara mpong'iini cia uu." 20Yiesû kaîrî aûria, "I mbi mma mbûmba kûbuanaania n'yo ûnene bwa Ngai?" 21Auga, "Ûnene bwa Ngai bûkari ta ndawa ya kwimbithia mîgaate, îra mûka ûmwe aathûkiirie eekîra mûtuuni ûmwingî, yaimbithia mûtu ûyu unthe aguukanda." 22Yiesû waathiîte bwa Njerusaremu, aariûnga na mataûni na ntûûra akîrutanaga antû. 23Muntû ûmwe amûûria, "Mwathani, n'antû baakai bakoonokua kana i baingî?" Yiesû auga, 24"Geragiani mûno kûthûngîra na mwîrîga ûra mûcege. Bara baingî bagaacûûgia kûthûngîra na uu baremwe. 25Îgiita rîgaakinya mwene mûciî ainge mûrango. Na rîra bûkaaya bûkaarûngama nja bwanjîîrie kûringaringa mûrango bûkîmwîraga, 'Mwathani, tûrugûrire.' "Îndî akaabwîra, 'Ntiyî bûra buumîîte!' 26"Abwîra ûgu, bûkîanjîîria kûmwîra, 'Anga tûtaarîyanagîra na tûkanyunyanîra naawe? Anga ûtaarutanaga ntûûraani cietû?' 27"Mwene mûciî akaabwîngatia abwîre, 'Ntibwiyî. Umaani aaga ndî eeyia baba.' 28"Abwîra ûgu bûkîanjîîria kûrîra bûrî na kîeba kîînene mûno bwona Îburaîmu, Isaka, Njakubu, na iroria bionthe birî ûneneeni bwa Ngai, naabi bûtigîîtwe nja. 29Antû bakauma nteere cionthe cia nthîgûrû baaye bakaranîîre amwe ûneneeni bwa Ngai. 30Rîru i rîo bara ba mûthia bagaatuîka ba mbere, ba mbere batuîke ba mûthia." 31Îgiita rîru Yiesû augaga ûgu rîongwa, Abarisai bamwe baaya bamwîra, "Toorooka ûthi n'ûntû Eronde nabangîîte gûkûûragithia." 32Yiesû abeera, "Îthiini bwîre mûkangayia ûyu îmunthî inkwîngatia irundu biithûûku na nkîoranagia. Na wana rûû na aûke nwa bu nkaarûtha, mwanka rîra nkaathiria ngûgî yakwa. 33Nwa mwanka nthi na mbere na rûgendo rwakwa Njerusaremu, n'ûntû gûtiûmbîka kîroria kîûragîrwa bantû angî tatiga Njerusaremu!" 34Yiesû auga, "Biû antû ba Njerusaremu, bûûragîîte iroria na bwaringanga bara Ngai aabûtûmîîre na maiga! I maita magana mbendaga kûbwîthîrania amwe ta ngûkû bûra îîthîranagia tûcwi twa yo îgatûguîkîra na mathabu ma yo, îndî naabi bûkarega! 35Ata rî, ntûûra yenu îgaatigwa îrî îganjo. Na ga nkûbwîra, bûtimbona kaîrî mwanka rîra bûkauga, 'N'ûmûthaarime ûra aayîîte kwa riîtwa rîa Mwathani.' "

will be added

X\