RUKA 12

1Antû ngiri inyingî beethîrana amwe mwanka baatua gûkinyangana. Yiesû aanjîîria na kwîra arutwa baake, "Îmenyagîîreeni kîrî ndawa ya Abarisai ya kwimbithia mîgaate. Ndawa înu i wîbwithia bwao. 2Ûntû bunthe bûra bwithe nwa bûkaamenyeka, gûtirî witho bûtakiumbûka. 3Kwoogu mara bwaugire kûrî ûtugû nwa makeeguîgwa kûrî mûthenya. Na mara bwariirie na kîoye bwîbithîîte nwa makaugîîrua antû bonthe beegue." 4Yiesû aacooka abeera, "Na ga nkûbwîra, acoore baakwa, bûtigaakuthûkeeni bara baûmba kûûraga mwîrî unka na nyuma ya ûgu gûtirî bûngî baûmba kûrûtha muntû. 5Îndî ga nkûbwîra kûrî ûmwe wenka ûra bûbatîîrue bûkuthûka. Kuthûkagaani Ngai n'ûntû arî na inya ya kûûraga muntû akamûgera mwankiini wa îcamaarîro. Yîî na ga nkûbwîra, ûyu n'we bûbatîîrue bûkuthûka. 6Anga tûnyoni tûtaano tûniini tûkeendua twauma mbia kûrî? Îndî amwe na ûgu, gûtirî nwa kamwe Ngai ariganîrua i ko. 7We wana ntundu ira irî biongo bienu cionthe naiyî n'igana. Kwoogu menya bûmaka. Biû bûrî gîtûmi nkûrûki ya tûnyoni tûtatarîka." 8Yiesû aacooka auga, "Na ga nkûbwîra, ûra agaankûûyîîra kîrî antû, wana niû, Mwana wa Muntû, nkamûkûûyîîra kîrî araîka ba Ngai. 9Îndî ûra agaankaana kîrî antû, wana niû inkaamûkaana kîrî araîka ba Ngai. 10Muntû wonthe ûra agaacambia Mwana wa Muntû, akaarekerwa. Îndî ûra akaaria mantû maathûûku îgûrû rîa Kîrundu Ûmûtheru atiirekerwa. 11"Wana babûthitanga biamaani bia masinagoogi kana kîrî mangabana na anene, bûtikaûrie n'ata bûkauga kana n'ata bûgaacookia. 12Rîra îgiita rîru rîgaakinya Kîrundu Ûmûtheru akabûrutana bûra bûkauga." 13Muntû ûmwe ntunduuni eera Yiesû, "Mwarimû, îra mûruayia angaîre into bira twatigîîrwe i baaba." 14Yiesû amûûria, "Aba, n'ûû ampete watho bwa kûgambîra mantû ta mamu?" 15Yiesû eera antû, "Îmenyeereeni bûtigaatanûkîre into. Muntû atiûmba gûtûûrua mwoyo n'ûtonga bwake." 16Yiesû aatûmîra ngerekano abeera, "Gîtonga kîmwe ikîarî na irio biingî mûno mûndaani wa kîo. 17Gîtonga gîku kîebûûria na nkoro, 'N'ata nkûrûtha mbone bantû a gûkethera irio biakwa bionthe?' 18Kîebîîra mathûgaaniani, 'Nkoomborania makûmbî maakwa monthe mbake mangî maanene mara ngeekîra irio biakwa biganîre, na mbone akwaiga kinya into biakwa bira bingî bionthe. 19Ndarûtha ûgu rîru mbîîre nkoro yakwa, "Nkoro, înogokere ûkîrîyaga, ûkînyunyaga, na ûkene n'ûntû into ûrî na bio bia kûgana bitathira rua rûrû." ' 20"Îndî Ngai eera gîtonga gîku, 'Woû ûrî kîaa mûno! Ûgaakua îmunthî ûtugû. Îîndî into bibi wîthîranîîtie bigana ûûgû bionthe bigaatuîka bia ûû?' " 21Yiesû akîthiria auga, "Muntû ta ûyu n'antû bara beebaigîrîte ûtonga bwa aaga nthîgûrû beegwetie bu, bantû a beegwatia ûtonga bwa Ngai." 22Yiesû eera arutwa baake, "Bûtikeemakîre bûkîûragia i mbi bûkaarîa, kana bûûria i kû bûkaaruta nguo cia gwîkîra. 23Mwoyo n'uu ûrî gîtûmi nkûrûki ya irio, na mwîrî n'uu ûrî gîtûmi nkûrûki ya nguo. 24Taraithaani nkûngûrû. Cio itiandaga, itikethaga, itirî makûmbî na itirî mîrûrû. I Ngai acieyaga irio. Anga ti biû bûrî gîtûmi nkûrûki ya cio! 25N'ûû wacienu aûmba kwîbongeera nwa ntugû îmwe ya mwoyo wake n'ûntû bwa kwîmakîra? 26Ûkeegua bûtiûmba kûrûtha tûmantû tûniini ta tûtu rî, i mbi n'ûntû bûkwîmakîra mantûûni mamu mangî? 27"Taraithaani maûa mara maumaga kîthakaani bwone bûra makûrangaga. Mo matirutaga ngûgî kana matuma nguo. Na ka mbwîreeni, wana mûnene Soromoni ûra nkuma yake yaiyîkeene mûno, ûthongi bwa nguo ciake bûtigîkinyîîra ûthongi bwa maûa ta mama. 28Biû antû ba wîtîgio bûûkai! Ûkeegua Ngai nakûthongamia nyaki ya kîthaka bûgana ûûgû rî, nyaki îkwîgua îrî îmbîthî îmunthî na rûû gûgîkinya îkîgerwa mwankiini rî, î biû Ngai akaabûmenyeera bûgana ata? 29Kwoogu bûtikeemakîre bûkîûragia, 'I mbi tûkaarîa?' kana, 'I mbi tûkaanyua?' 30Into ta bibu i bio antû ba nthîgûrû bacûaga. Abaagu ûra arî îgûrû naiyî bira bûrî bata na bio. 31Îgûrû rîa mantû monthe cûani ûnene bwake, rîru bibu bionthe bûrî bata na bio akabwaa. 32"Biû, eendwa baakwa baakai, bûtigaakuthûke n'ûntû Abaagu ûra arî îgûrû nagûkeneera kûbwaa ûnene bûbû. 33Endiani into bienu bionthe bûteethie nkîa. Bûtikeebaigîreeni ûtonga bûra bûkaathira. Îbaigîreeni ûtonga bwa îgûrû n'ûntû bu bûtithiraga, bûtiywa i mwamba, na bûtiînyangua i ndugunye. 34Ara ûtonga bwa muntû bûrî noogo nkoro yake îîgagua îrî." 35Yiesû auga, "Karagaani bwîthuuranîrîte na bûmuntîîtie taa cienu. 36Karagaani ta antû beeteereete mûnene wao aaya mûciî aumîîte kîathooni kîa wiki, kaingo aaringaringa mûrango bamûrugûrîra na mpwî. 37Aruti ngûgî bara beetagîîra mûnene wao mwanka rîra akaaya eethîre batamaami, ibakenaga. Na mma ga nkûbwîra, mûnene eeraga aruti ngûgî ta babu ibakare nthî, akeethuuranîra akabaûrîra irio arî we. 38Mûnene agatua gûkinyaga ûtugû mainda mara manene wakîbeethagîra bamweteereete, nabathaarimaga. 39Na bûmenye ata rî, mwene mûciî akamenya rîra mwamba akaaya kwiya, atiuma ku. Nakaria nyomba yake atikaiywe. 40Wana biû karagaani bwîthuuranîrîte, n'ûntû Mwana wa Muntû akaaya kagiita konthe kara bûteerîgîîrîîte." 41Petûrû amûûria, "Mwathani, i tiû twinka ûkwîra ngerekano îno kana n'antû bonthe?" 42Mwathani amwîra, "Ndîîra mûruti ngûgî ûra aûmba gwîtîgîka. Mûruti ngûgî ûra mûûme, ûra aûmba kwewa watho bwa kûrûngamîîra mûciî. Ûra aûmba kûrûmia bara bangî irio îgiita rîa biakûrîa rîakinya. 43Mûruti ngûgî ta ûyu nakenaga rîra ûra amwandîkîîte acookaga akamwîthîra akîrutaga ngûgî îra aamwere bwega. 44Na mma ga nkûbwîra, mûnene wake amûtuîkithagia mûrûngamîîri wa gûkaragia into biake bionthe. 45Îndî akeegua arî mûruti ngûgî ûmûthûûku, aatigwa akaathûgaania ûra amwandîkîîte atiiya rua. Akîanjîîria gûtura aruti ngûgî bara bangî, akarîa na akanyua ncoobi agatogoona. 46Ûra amwandîkîîte akaaya ntugû îmwe ataiyî, thaa ira atamwîrîgîîrîîte amwe îkaanûkia rîînene, oone kînyamaara bûmwe na bara bateetîgîîtie. 47"Mûruti ngûgî ûra amenyaga bûra mûnene wake eendaga kûrûthwa îndî atirûthaga bu agaaturwa mûno. 48Îndî mûruti ngûgî ûra ataiyî bûra mûnene wake eendaga kûrûthwa, akaaya kûbîtia akarûtha mantû matûma aturwa, agaaturwa, îndî ti mûno. Ûra akeewa into biingî, akaarandûkwa biingî woogu. Na ûra n'we ageetîgua eewe into biingî mûno, akeerîgîîrwa aruta biingî mûno woogû." 49Yiesû auga, "Ndaayire kûreetera antû îkaanûkia rîa Ngai rîkari ta mwanki ûra ûkaababîîthia. N'ata nkena bûgana mma mwanki ûyu ûkeegua nwanjîîrîîtie kûrîrîmbana ûkîbîîthanagia!" 50"Kûrî na ûbaatithio nkaabaatithua bûkûmbîkîra kîeba mwanka ntugû îra nkaabaatithua bu. 51Bûtigeeciirie mbûyîîte kûreeta ûkiri nthîgûrû. Ntiyîîte kûreeta ûkiri ndeeteete kwathûkana. 52Kuuma îîndî antû ba mûciî ûmwe batiîganua. Weegua i bataano, bathatû bakeebûûmba mwanya, babu bangî baîrî na bo beebûûmbe mwanya. 53Mwana atiigwatanîra na îthe, mwarî atiigwatanîra na gina, mûk'wa mwana atiigwatanîra na ciaraagwe." 54Yiesû aacooka eera kîrîndî, "Bûkoona matu mathwîrooni ma riûa buugaga, 'Îmunthî gûkaura n'ûntû kûrî na matu maayirû.' Na wabu gûkaura. 55Bwona ruuo rûkîbuutana ruumîîte bwa iti buugaga, 'Îmunthî gûkaara mûno.' Na wabu gûkaara. 56Eebwithia baba! Ibwiyî kûraitha mwonekere wa nthîgûrû na matu bûkamenya bûra gûgaakara, îndî bûtikûûmba kûmenya bûra mantû mara magûtuîkîka ntugûûni makwonania." 57Yiesû abaûria, "I mbi n'ûntû bûtakwîgiitîra magamba bûra kwagîrîte? 58Geria bûra kûûmbîka bwîganue na mûnthû waku bûrî njîraani. Woona akwira îgambaani ûthi gûtuîrwa, nûkaanenkanîîrua kîrî mûcikaarî akwire nceera. 59Na ga ngûkwîra, ûtiuma ku ûtamûrîîte mwanka ndururu ya mûthia."

will be added

X\