NJUNDA 1

1I niû Njunda mûruti ngûgî wa Yiesû Kîrîstû, mûruagina wa Njakubu nkûbwandîkîra. Ndîbwandîkîra biû bara Ngai Baaba eetîîte, biû eendeete, bara bûrî ûkariani bwa Yiesû Kîrîstû. 2Bûroongeerwa kîao, ûkiri na wendo kwa wingî. 3Eendwa, indareendeete mûno kûbwandîkîra îgûrû rîa wonokio bûbû bwetû twinthe. Îndî ndacooka ndeegua mbwandîkîre mbûkinyîîrie mbwîre bûthi na mbere kûrûîrîîra wîtîgio bûra Ngai aanenkeere antû baake rîmwe na rîa mûthia. 4Ndîbwîra ûgu n'ûntû antû bamwe ba bara batatîîyaga Ngai ibeethûngîîrîîtie na witho gîkundiini keenu. Mantû maao maandîkîîtwe beerwa îgamba rîao irîbeeteereete. Bagarûraga ntûmwa ya ûtugi bwa Ngai wetû na njîra îtaagîrîte, kaingo boona mwanya wa kûrûtha ûntû bunthe bûûthûûku bûra beeriragîîria. Na kaîrî bakaanaga Yiesû Kîrîstû na n'we wenka Mûnene na Mwathani wetû. 5Inkwenda kûbûririkania mantû mama kinya weegua ibûmaiyî. Ririkanaani bûra Mwathani oonokiirie antû baake ba Isiraeri, abaruta Miisiri, îndî nyumaani aacooka aathiria bara bataamwîtîgia. 6Na araîka bara baumire ara baabatîîrue beegua barî, beenda kwîbongeera wathani, Ngai aabaingîîre kûra kûrumeene mwindu. Bakaraga ku abathaîkîîte na nyoyoro itatuîkaga rî kana rî beeteereete ntugû îra nene ya îgamba. 7Kaîrî ririkanaani bwone bûra gwakarire Sondomu na Ngomoora na taûni ira ciarî akubî na cio, antû bagûtua kûrûtha mantû ma ûmaramari na mangî kinya mataûmba kûthûgaanîrîka. Mantû mamu baarûthire i mo maatûmire beewa îkaanûkia rîrî ngerekano kîrî bara bakaagiitîrwa îgamba bagerwe mwankiini wa tene na tene. 8Antû baba barîrûtha ta bo. Barîroota mantû magatûma beenyangia mîîrî yao, bakameneeria wathani na bakarumanga biûmbe bia îgûrû, 9ûntû kinya mûraîka ûra mûnene, Mikaeri, ataarûtha rîra baakararanagîria kiimba kîa Musa na Nkoma. Mikaeri ataûmîîria kûmîrûma kana amîîra mûgambo ûmûthûûku. Bûra Mikaeri aamîîrire n'atî, "Mwathani aroogûkaania!" 10Antû baba bo barumangaga bunthe bûra batakûûmba gûciûkîrwa i bu na bûra bakûmenya woogu na meeciiria maao ta nyamû itarî na ûûme. Na mantû wamamu mongwa i mo mabathiragia. 11Irû! Antû baba bagendeete ara Kaini aagendire. Na n'ûntû bwa kwenda mbia, bathûngîrîte mabîtiani ta mara mongwa Mbaraamu eethûngîîrie. Kûrega kwathîka kwao i ta kûra kwarî na Koora, na bakaathirua ta bûra aathiriirue. 12Na antû baba rîra baayaga bûkarîyanîra na bo biathooni bia ngwatanîro yenu, bakari ta marooro ma rûko barî amwe naabi. Bakenagîîra kûrîa bagakûrûkîîria na kûnyua nkûrûki ya kîthimi batakûmaka. Bakari ta arîîthi ba ng'ondu bara beemakagîra batakûûrania na ng'ondu. Bakari ta matu matarî na mbura bûra macûgagua i ruuo woogu matakiura. Bakari ta mîtî îtarî maciara yakûûrwa, na i ta baakuû cwe. 13Bakari ta makûmbî ma rûûyî rwa îria macacîîte. Ngûgî ira barutaga i cia îgi na itirî witho, nwa ta mûbûûyû wa rûko ûra makûmbî ma rûûyî rwa îria matigaga maakûmîîria rûteere. Bakari ta nthata igûcûga. Ngai abathuuranîrîte gîkaro kîao kûra kûrumeene mwindu ûmûnene. Na bagaakara ku tene na tene. 14Enoki, kîûyûûyû gîetû kîa mûgwanja kuuma kîrî Andamu, naaroreetie mantû ma antû baba rîra augire, "Thikîîriani! Mwathani akaaya na atheru baake ngiri itatarîka 15agiitîre îgamba muntû wonthe. Na ûra wonthe atatîîyaga Ngai akaagiitîrwa îgamba kûringana na mantû monthe mara aarûtha kînyume kîa Ngai. Mwathani akaagiitîra îgamba mwîyia wonthe ûra atamûtîîyaga kûringana na mîgambo yonthe îmîthûûku îra aaria îgûrû rîa Ngai." 16Antû baba rîonthe bakaraga bakînung'unaga na bakîringaga gîtuma. Baathîkagîra wîrirîîria bwao bûûthûûku, na baaragia rwaria rwa wîkumia. Beenagîîria bara bangî na mîgambo îrî mûrîo kaingo bateetheka kuumania na bo. 17Îndî amwe na ûgu, biû, eendwa, bûtikaariganîrue i mantû mara bweerirwe n'atûmwa ba Mwathani wetû Yiesû Kîrîstû. 18Baabwîrire, "Ntugû cia mûthia ciakinya gûkooneka antû bakûbûnyûrûnta bakîthingataga wîrirîîria bwao, kînyume kîa Ngai." 19Antû babu i bo bakûreeta kwathûkana kwenu, n'ûntû bathingataga wîrirîîria bwa mîîrî yao na batirî Kîrundu wa Ngai. 20Îndî biû, eendwa, îbandeeni bwîrikie wîtîgioni bwenu bûûtheru mûno. Na rombagaani na inya ya Kîrundu Ûmûtheru. 21Îkaragaani bûrî wendooni bwa Ngai, bweteereete gûcooka kwa Mwathani wetû Yiesû Kîrîstû abwaa ûtûûro bûra bûtakîthira kûringana na kîao gîake. 22Îgaguani kîao bara bûkwona barî na nkanja. 23Tharaani bangî bûboonokie baume mwankiini, na îgaguani bamwe kîao bûkîmenyagîîra meeyia maao batikaabwake rûko. 24Arookumua ûra aûmba gûtûma bûtikaagwe na akabwira mwanka mwagooni wake bûkeneete bûtarî na mabîtia. 25Ngai arookumua gûkûrûkîîra kîrî Yiesû Kîrîstû, Mwathani wetû. N'we Ngai wenka, Mwonokia wetû. N'ûntû bwa bûra arî mwago, ûnene, inya, na watho, arookumua tene na tene kuuma karaaya, îîndî, na îgiita rîîkaaya mwanka gûtarî rîo. Aameni.

will be added

X\