NJAKUBU 5

1Naabi bara bûrî itonga thikîîriani. Rîraani bûminûke n'ûntû bwa kînyamaara kîra kîbweteereete. 2Ûtonga bwenu i bworu na nguo cienu n'indîe i mûthwa. 3Thaabu na fetha cienu nigwete nganka. Na nganka inu ikeegua irî ûkûûyî ntugû ya îgamba. Ikaabûrîa nyama ta mwanki ûkûbûbîîthia. Bûtongeete mûno ntugû ino cia mûthia na 4bûtirîîte antû mbia ciao, bara babûrutagîra ngûgî mîndaani yenu. Thikîîriani kîrîro kîao! Gûkaya kwa babu babûkethagîra mîndaani yenu igûkinyîîrîte Mwathani wa Njûûrî. 5Ûtûûro bwenu aaga îgûrû rîa nthîgûrû n'ûtûûro bwa gwîkenia bûgîcûa kûganîrwa. Bûnoreete bwa mûûro bweteereete ntugû ya kûthînjwa. 6Bwagiitire îgamba rîa antû bataarî na mabîtia bûûthûûku bwabaûraga batakûbûrigîîria. 7Aruayia na aarayia, ûmagîîriani bweteere mwanka rîra Mwathani akaaya. Thûkiani ngerekano ya mûrîmi bûra eetagîîra irio biake biciara maketha meega. Eetagîîra bikaurîrwa i mbura ya mbere na ya ciîrî aûmîîrîîtie. 8Ûmîîriani na biû bweteere bûrikîîtie wîrîgîîro nkorooni cienu n'ûntû ntugû ya kûûya kwa Mwathani îrî akubî. 9Aruayia na aarayia, muntû atikaanung'une n'ûra ûngî, kaingo Ngai atabûgambithia. Mûgambithania arî akubî kûûya. 10Aruayia na aarayia, bûkeenda kûthûkia ngerekano îmbega ya bara baûmîîrie mathîîna baûmba gweteera, ririkanaani iroria bira biaragia riîtwaani rîa Mwathani. 11Atîrî, bara baûmagîîria tuugaga i baathaarime. Ririkanaani bûra Ayubu aûmîîrie na bûra Ngai aamûrûthîîre mûthiani n'ûntû Ngai arî kîao mûno na antû. 12Îndî nkûrûki ya mantû monthe, aruayia na aarayia, bûtikaathiîtie bûkîeyana wîrane. Bwakara kweyana wîrane bûtikaathiîtie na riîtwa rîa Ngai, kana na into bia nthîgûrû, kana kinya na gîntû kîîngî. Ugaga "Yîî" weegua ûrîenda kuuga "Yîî," kana "Arî" weegua ûtikwenda, kaingo Ngai atakûgambithia. 13Kûrî we wacienu arî thîînaani? Weegua kûrî we narombe Ngai. Kûrî we akeneete? Weegua kûrî we naine nyîmbo cia gûkumia Ngai. 14Kûrî we mwayie? Weegua kûrî we neete akûrû ba kanica bamûrombere na bamwake maguta riîtwaani rîa Mwathani na 15baaromba na wîtîgio mwayie akaabua. Mwathani akamworia amûcookerie mwîrî inya. Na weegua eeyîîtie, Mwathani akamûrekera meeyia maake mara arûthîîte. 16Kwoogu umbûranagîraani meeyia meenu na rombanagîraani kaingo bworua. Îromba rîa muntû ûmwagîru rîrî inya ya kûrûtha mantû maanene. 17Kîroria Eriya aarî muntû ta tiû tu na akûromba na inya mûno mbura îtikaure, mbura îtaura mîanka îthatû na nucu. 18Agûcooka aaromba kaîrî, mbura yaura imera biauma. 19Ka mbwîreeni, aruayia na aarayia. Ûmwe wacienu akaaya kûûra akauma ûmmaani, îndî ûmwe kîrî biû akamûcookia ûmmaani kaîrî, 20ririkanagaani ûûgû--ûra acookagia mwîyia aûrîîte akoonokia mwoyo wa mwîyia ûyu ûtigaakue. Na agaatûma muntû ûyu arekerwa meeyia maingî mara akeegua arûthîîte.

will be added

X\