NJAKUBU 3

1Aruayia na aarayia, baingî beenu bûtikeerirîîrie gûtuîka arutani ba kiugo kîa Ngai, n'ûntû ibwiyî tiû bara tûrutanaga bara bangî kîo îgamba rîetû ûkeegua rîrî rîûmo nkûrûki ya bara bangî. 2Twinthe itûbîtagia na njîra inyingî mûno. Ûkaaya kwîgua kûrî we atabîtagia na mîgambo îra aaragia, ûyu i mwîtîgîri ûmûgima. We nwa aûmbe kwatha mwîrî wake unthe. 3Antû boogagîîra gacuuma kaniini kanyuani ka mbaraathi kaingo ibaathîkîra baûmba gûcierekeria wanaara bakeenda. 4Kana thûkia ngerekano ya meeri. Meeri n'înene mûno na itindîkagwa i ruuo rûûnene. Îndî ndereba amîtarithagia wanaara akeenda agîtûmagîra kamûtî kaniini. 5Ûgu i ta bu rûrîmî rûkari. I karûngo kaniini ka mwîrî îndî nwa kaarie rwaria rûûnene rwa wîkumia. Tathûgaania wone bûra karathe kamwe kaûmba gûtûma mwithû unthe ûbea. 6Na kaîrî rûrîmî rûkari ta mwanki. Rûgwataga mwanki wa îcamaarîro rûgatambia ûthûûku rûgateereera mwîrî wa muntû unthe na rûkeenyangia ûtûûro bwake bunthe. 7Nyamû cia kîthaka, nyoni, ira itambaga na nthî na kinya ira ikaraga rûûyîîni, cionthe muntû naûmbaga gûcirutana ikamwathîkagîra. 8Îndî rûrîmî, gûtirî muntû aûmba kûrûrutana rûmwathîkîra. Ru n'ûthûûku bûtaathîka na rûrî ûrogi bûûî. 9Rûrîmî warûra tûkumagia na ru Mwathani Baaba wetû nwa ru tûrîrîkaga na ru bara bangî, antû Ngai aûmbîîte barî ngerekano yake. 10Atî kanyua wakamwe nwa ko kaumaga mîgambo ya nkaatho na ya kûrîrîkana. Aruayia na aarayia, ûûgû ti bu kûbatîîrue kwîgua gûkari. 11Gûtirî kînyaka kîûmba kwîgua kiumaga rûûyî rwega na rûûthûûku. 12Aruayia na aarayia, mûkûyû ûtiûmba gûciara ncabiibû, na mûcabiibû ûtiûmba gûciara nkûyû. Na kinya kînyaka kîa rûûyî rûûthûûku gîtiûmba kuuma rûûyî rwega. 13N'ûû wacienu arî na ûûme na ûmenyo? Weegua kûrî we noonanie na mûtûûrîre wake ûmwega na mantû meega mara arûthaga arî na kwinyithia kuumania na ûûme bûra arî. 14Îndî ûkaaya kwîgua nkorooni yaku ûrî muntû wa rûriitho, marûrû na wa kwenda kûgîta wenka, woû ûtikaarie ûrongo ûgîîkumîria ûûme bwaku. 15Ûûme ta bûbu ti bwa kuuma kîrî Ngai, i bwa kîînthîgûrû n'ûntû ti bwa gîîkîrundu. Na i Nkoma abûreetaga. 16Bantû onthe antû barî na rûriitho na kwenda kûgîta nkûrûki ya bara bangî, bantû agu gûtiûraga gîtuma na ûthûûku bwa mîthemba yonthe. 17Îndî ûûme bwa kuuma kîrî Ngai i bûûtheru, ibwendeete ûkiri, ûbooreru, kûthikanagîîria na kûûyûrwa i kîao. Bûciaraga mantû meega, bûtirî kîmenyano na bûtiîtuîkithagia kîra muntû atarî. 18Ûra eendeete ûkiri aandaga na ûkiri agaketha wagîru.

will be added

X\