NJAKUBU 1

1I niû Njakubu mûruti ngûgî wa Ngai na Mwathani Yiesû Kîrîstû nkûbwandîkîra. Inkûbûkeethia biû mîîrîga îkûmi na îîrî bûnyageere gûntû na gûntû. 2Aruayia na aarayia, thûkagiani kîrî gîkeno kîînene rîra bûkwona magerio ma mîthemba yonthe 3n'ûntû ibûkûmenya rîra wîtîgio bwenu bûkûûmba gûcinda magerio mamu, i rîo kûûmîîria kwenu kwongeerekaga. 4Rekaani kûûmîîria kwenu kwingie ngûgî ya ku ndeni yenu kaingo bwîgua bûrî eetîgîri agima, gûtarî kîo bûkwaga. 5Ûra wacienu akaaga ûûme bwa kuuma kîrî Ngai, narombe Ngai amwe. Na Ngai akamwaa n'ûntû eeyaga antû bonthe na wingî atakûnung'una. 6Na akîromba abatîîrue aromba arî na wîtîgio, atarî na nkanja n'ûntû muntû arî na nkanja nkorooni yake akari ta bûra makûmbî ma îria macûgagua i ruuo rûmeerekeretie mbarî weera rûkwenda. 7Muntû ta ûyu naakamenya gûtirî kîo akoona kuumania na Mwathani 8n'ûntû we i njoka ya mîromo îîrî. Gûtirî ara arûngi kîrî mantû maake monthe. 9Mûruayia kana mwarayia ûra arî na ûkîa nwa akeneere kwîgua Kîrîstû amûthûkagia arî muntû wa gîtûmi mûno. 10Na ûra arî na ûtonga wana we rîra Ngai amwonia bûra arî ûmûniini nabatîîrue akeneera bu n'ûntû itonga bira biîgwatagia ûtonga bûra birî na bu bikaathira ta bûra maûa maûrûrûkaga. 11Kagiita ka mwathû riûa riumaga rîkarûngûria kîmera, maûa makanyaara makaûrûrûka, ûthongi bunthe bûra bûkûrî oogo bûkathira. Ûgu i ta bu itonga na bio bikaathirua birî ngûgîîni ciao. 12Kîthaarimo i kîrî ûra aûmagîîria magerio mamûyîîra, n'ûntû amoota ageekirwa nthûmbi ya mwoyo îra Ngai eeyanire wîrane bwa yo kîrî bara bamwendeete. 13Muntû aayîîrwa i magerio atikauge i Ngai akûmûgeria. Ngai atigereka arûtha ûthûûku na atigeranagia. 14Muntû athûngagîra magerioni aakuuyua i mawîrirîîria maake maathûûku mwanka magatûma arîîkîîrua i mûtego wa mo. 15Wîrirîîria bwagîa nda bûciaraga wîyia na wîyia bwakûra bûgaciara gîkuû. 16Kwoogu, eendwa, aruayia na araayia, bûtikeende kweneerua. 17Ûntû bwega bunthe na kîewa kîîganîîru biumaga îgûrû kîrî Ngai, Mûûmbi wa bionthe bira bimûrîkaga îgûrû. We atigarûkaga ta bio na atikaraga akîgarûkaga ta irundu. 18Aatûreetire ûtûûrooni bûûyerû na njîra ya kiugo gîake kîa mma kwa wendi bwake, tûrî rûciaro rwa mbere kîrî biûmbe biake bionthe. 19Eendwa, aruayia na aarayia, menyaani ûûgû, muntû nakarage na mpwî cia kwîgua, îndî ti cia kwaria kana cia kûthûûra. 20N'ûntû muntû arî na mûthûûro atiûmba kwîgua arî ûmwagîru kûringana na bûra Ngai eerîgagîîra. 21Kwoogu bûtikaarûthe mantû ma rûko kana mûkarîre wenu wîgua ûrî wa mantû maathûûku. Îtîgîîriani kiugo kîa Ngai kîra aandîîte nkorooni cienu bwînyiîtie. Kîaûmba kwonokia mîoyo yenu. 22Nabûteebenia mana nakûthikagîîria kiugo gîake akî. Nwa mwanka bûrûthage bûra kiugo gîkuuga. 23Ûra athikagîîria bûra kiugo gîkuuga na atarûthe bûra gûkwendekana akari ta muntû eeraithîîte na kîyici bûra akari ûthiû, 24eebona bûra akari akathi. Na atirakarakara akariganîrua i bûra eebonire akari. 25Îndî ûra acûnkûûnaga bwega watho bûra bûtheru, bûra bûthaûraga antû, na akathi na mbere akarûtha bûra eegua atakûriganîrua, muntû ûyu akaathaarimwa mantûûni mara akaarûthaga. 26Ûkaaya kwîgua muntû augaga n'wa ndini, îndî atimenyagîîra rûrîmî rwake, ndini înu yake n'ya ûtheri, nakwîbenia mana. 27Ndini îmbagîru na ya mma mbere ya Ngai Baaba n'îno: gûteethagia aana ba nkîa na ntigwa mathîînaani maao, na muntû akeemenyagîîra atigaakwe rûko i mantû ma nthîgûrû îno.

will be added

X\