AIBIRANIA 9

1Îgiitaani rîa kîrîîkanîro kîa mbere, ikwarî na maathana maakoneetie kûthi mbere ya Ngai. Na ikwarî na bantû aatheru gûkû nthîgûrû. 2Îrema rîambagwa rîkagaanua maita maîrî. Mbarî ya mbere kwarî na gîtugî gîa gûtûgîîria na meetha îrî na mîgaate ya kûrutîra Ngai. Mbarî înu yeetagwa bantû ara atheru. 3Na ikwarî na nguo îra yagaanîîtie. Ngarûko înu îîngî n'yo mbarî îra yeetagwa bantû ara atheru mûno. 4Gûku i ku kwarî na bantû aakîîtwe na thaabu a gûtoogeria mîtaa. Ikwarî na îthandûkû rîra rîarî rîa kîrîîkanîro, rîra rîakunîkanîîtue na thaabu. Gûku îthandûkûûni rîru ikwarî na kaûngû kaniini kaûmbîîtwe na thaabu, na kaarî na mana ndeni. Na ikwarî na mûraagi wa Arûni ûrî na mathangû, na maiga mara ma rûbaariû mara maandîkîîtwe maathana îgiita rîa kîrîîkanîro. 5Îgûrû rîa îthandûkû rîru ikwarî na yûmba rîa mîbuanaano ya biûmbe biîrî birî mathabu. Mathabu ma mîbuanaano înu maatambûrûkîîte îgûrû rîa gîkunîkîri kîa îthandûkû. Tûtiûmba kûbwîra monthe îîndî. 6Rîra mantû monthe maabanganua ûgu, anthînjîri ba Ngai bathûngagîra mbarî ya mbere rîonthe bakaruta ngûgî yao. 7I mûthînjîri ûra mûnene wenka aathûngagîra ngarûko înu îngî. Aathûngagîra ku rîmwe kwa mwanka. Atikîthûngîra ku atarî na nthakame ya kûmincîria îthandûkû, kûromba Ngai ûrekeri bwa meeyia maake na ma antû, mara bakîûmba kwîgua barûthîîte batakûmenya. 8Kuumania na ûgu gwakarîkaga, Kîrundu Ûmûtheru eendaga kwonania njîra ya kûthûngîra ara atheru mûno îtaarî îkûrugûrwa îîndî îra mbarî ya mbere ya îrema yatûmagîrwa. 9Ngerekano îno îrîtwonia bûra gûkari îgiitaani rîrî tûrî. Îrîtwonia into na igongwana bira athînjîri barutagîra Ngai bitiûmba kûtheria nkoro cia bara babareetagîra bio. 10Maathana ma kîrîîkanîro gîîkûrû magweteete mantû ma irio, biakûnywa na mîthemba mwanya mwanya ya kûthamba. Mama i maathana maakoneetie mantû ma mwîrî mara maabatîîrue kûthingatwa mwanka rîra Ngai aarîîkanîîre na antû kîrîîkanîro kîngî kîîyerû. 11Rîra Kîrîstû aayire arî mûthînjîri ûra mûnene wa mantû meega mara twonaga, aathûngîîre îremaani rîrî gîtûmi nkûrûki na rîega mûno. Rîo rîtiambîîtwe n'antû na ti rîa gûkû nthîgûrû. 12Kîrîstû aathûngîîre ara atheru mûno rîmwe, gûtarî kaîrî, na ataathûngîra na nthakame ya mbûri na ya tûyaû. Aathûngîîre na nthakame yake wengwa, atûkûûra tene na tene. 13Kûringana na watho bwa kîrîîkanîro gîîkûrû, nthakame ya ndeewa, ya mbûri na muu wa moori biamincagîrua antû bara baarî na mûgiro ûkathira. 14Îndî nthakame ya Kîrîstû yo nîrûthaga manene nkûrûki ya ûgu! Kwa inya ya Kîrundu ûra atûûraga tene na tene, Kîrîstû neerutire arî kîgongwana kîra kîagîrîte kîrî Ngai. Nthakame yake îgatûtheria nkoro kuumania na mantû mara tûrûthaga mara maûmba gûtûma tûkua, i kaingo bûtûmîkîra Ngai ûra atûûraga mwoyo. 15Gîku i kîo gîtûmi kîra gîtûmîîte Kîrîstû eegua arî mwîguithania wa antû na Ngai kîrîîkanîrooni kîîyerû. Aakuire kaingo athaûra bara baunîîte maathana ma kîrîîkanîro kîa mbere, na kaingo bara beetîîtwe i Ngai beewa rûgai rwa tene na tene kûringana na wîrane bwa Ngai. 16Muntû akeegaa, kwîgaa gwake gûtirî na gîtûmi mwanka rîra gûkaamenyekana wabu muntû ûyu n'ûmûkuû. 17Kwîgaa kwa muntû gûtirî gîtûmi rîra muntû ûra eegaîte arî mwoyo. Kûthûkagua kûrî na gîtûmi rîra aakua. 18I ntûma kinya kîrîîkanîro kîa mbere gîtaatuîkithua kîrîîkanîro nthakame îtatûmîkîîte. 19Musa akûrîîkia kwîra antû bonthe maathana monthe mara Ngai aamwîrîîre kîrîmaani, aathûkiirie nthakame ya tûyaû na ya mbûri aungania na rûûyî. Aamincîria yo mbarî irî ciîrî cia îbuku rîa watho na antû bonthe, agîtûmagîra guaya întuune na kamûtî ka mûtî wîtagwa ucopo, 20auga, "Îno i nthakame ya kîrîîkanîro kîra Ngai aaruta watho auga bûkîathîkîre." 21Ûgu i ta bu Musa aamincîîrie îrema rîra nthakame na into bionthe bira athînjîri ba Ngai baatûmagîra. 22Kûringana na watho bwa Musa, akubî kîra gîntû gîatuîkithagua kîîtheru na njîra ya kûmincîrua nthakame. Na antû batikîrekerwa meeyia maao nthakame îteetûûrîîtwe. 23Kwoogu ikwarî na gîtûmi gîa kûtheria into bibu na nthakame, bira birî ngerekano cia into bira birî îgûrû na njîra ta înu. Îndî into bira birî îgûrû bio biongwa biarî bitherue na igongwana biega mûno nkûrûki ya bibu bia nyamû. 24Kîrîstû ataathi bantû ara atheru mûno arûthîîtwe i muntû, ara arî ngerekano ya bûra gûkari. Aathiire îgûrû rîongwa, kûra arî amwe na Ngai n'ûntû bwetû. 25Gûtaarî na gîtûmi gîa Kîrîstû kwîruta maita maingî ta igongwana bira biarutagwa i mûthînjîri ûra mûnene. Mûthînjîri ûra mûnene aathûngagîra ara atheru mûno wakîra mwanka na nthakame ya nyamû îra aarutaga îrî kîgongwana. 26Ûkeegua Kîrîstû aakari ta we, kuuma rîra nthîgûrû yaûmbirwe nwa mwanka akîanyamaara maita maingî mûno. Kîrîstû we aayire îgiita rîrî tûrî rîra rîengeerie kûthira, kaingo eeruta rîmwe na gûtarî kaîrî, kûthiria meeyia. 27Ta bûra muntû wonthe agaakua rîmwe, na nyuma ya gûkua agiitîrwe îgamba, 28i ta bu Kîrîstû aakuire rîmwe arî kîgongwana gîa kûthiria meeyia ma antû baingî. Na akaaya rîa maîrî, îndî tika akeegua aayîîte kwîruta n'ûntû bwa meeyia. Akeegua areeterete bara bamweteereete wonokio.

will be added

X\