AIBIRANIA 5

1Mûthînjîri ûra mûnene wonthe athuuragwa kuuma kîrî antû agatuîkithua n'we akaabarûngamîîra mantûûni mara magûkonia Ngai. N'we eeyanaga biewa bia antû kîrî Ngai na akarutîra Ngai igongwana biao n'ûntû bwa meeyia maao. 2Atiinyagîîria bara bataku, bara babîtagia njîra n'ûntû we wengwa kûrî kûra aremagîîrwa. 3Na kwoogu nwa mwanka arutîre Ngai igongwana biake we wengwa n'ûntû bwa meeyia maake na ma antû. 4Gûtirî we eetuîkithia mûthînjîri ûra mûnene wa Ngai eepa gîtîîyo gîku. I Ngai amwîtaga aruta ngûgî înu ta bûra eetire Arûni. 5Ûgu i ta bu Kîrîstû aarûthire. Ateerûmîîria wengwa gîtîîyo gîa kwîgua arî mûthînjîri ûra mûnene. I Ngai aamwîrire, "Woû ûrî mwana wakwa. Îmunthî ngûtuîka abaagu." 6Na kûrî bantû angî kaîrî Maandîko Maatheru maugîîte, "Ûgaatûûra ûrî mûthînjîri wa Ngai mûtariini wa Merikisendeki." 7Rîra Kîrîstû aarî gûkû nthîgûrû aarombaga Ngai ûra akîûmba kûmwonokia atigaakue akamwîra amwe ûteethio. Aarombaga na inya akîruaga meethori. Na n'ûntû bwa gûtîîya kûra aatîîyîîte Ngai, maromba maake imeeguîkire. 8Wana kinya ûkeegua aarî Mwana wa Ngai, neerutanire kwathîka kuumania na kûnyamaara kûra aanyamaarire. 9Na n'ûntû ûtûûro bwake bwatuîkire bûtaarî na mabîtia, n'we aatuîkire kaumo ka wonokio bwa tene na tene kwa bara bonthe bamwîtîgîîtie. 10Aatuîkithiirue mûthînjîri ûra mûnene i Ngai mûtariini wa Merikisendeki. 11Tûrî na maingî makûgweta îgûrû rîa ûntû bûbû, îndî bûrî na inya gûtûma bûtaûkîrwa i bu, n'ûntû mathûgaania meenu matikûûmba kûgwata bûra tûkûbwîra. 12Bûkarîîte bûrî eetîgîri kwa îgiita rîraaya ûntû bwîgua îîndî bûrî aarimû. Îndî îîndî bûra bûkari i bûkwenda muntû wa kûbûrutana kaîrî ithoomo bia mbere bia kiugo kîa Ngai. Kîthoomo kîra bûkwenda gîkari ta îria bantû a irio biongwa. 13Muntû wonthe ûra irio biake birî îria akari ta kaana na gûtirî bu aiyî îgûrû rîa ûrutani bwa wagîru bwa Ngai. 14Irio biongwa i bia antû agima. Bo ibarutanîîtwe mûno kwathûrana wega na ûthûûku.

will be added

X\