AIBIRANIA 3

1Kwoogu, aruayia na aarayia, biû bûrî ba Ngai ûra abwîtîîte. Erekeriani mathûgaania meenu kîrî Yiesû. Itwîtîgîîtie n'we aatûmirwe i Ngai atuîka mûthînjîri ûra mûnene wake. 2Aarî mwîtîgua kîrî Ngai ûra aamûthuurire ta bûra Musa aarî mwîtîgua ngûgîîni yake na antû ba nyomba ya Ngai. 3Mwaki nyomba n'we eeyagwa gîtîîyo nkûrûki ya nyomba yo yongwa. Na kwoogu ûgu i ta bu Yiesû arî gîtîîyo kîînene mûno nkûrûki ya Musa. 4Wakîra nyomba yaakagwa i mwaki mûna, îndî Ngai n'we mwaki wa bionthe. 5Musa aarî mûruti ngûgî mwîtîgua, eetîgîîtue na antû ba nyomba ya Ngai bonthe. Kwîgua naarî mwîtîgua i ku kwarî ûkûûyî bwa kwonania mîgambo îra Ngai akaaria. 6Îndî Kîrîstû i mwîtîgua ta Mwana, arî na watho îgûrû rîa antû ba nyomba ya Ngai. I tiû antû ba nyomba ya Ngai weegua tûkaathi na mbere kwîgua tûrî na ûcamba wîrîgîîrooni bwetû tûkeneete. 7Kwoogu ta bûra Kîrundu Ûmûtheru augîîte, "Bweegua Ngai akîaria naabi îmunthî, 8bûtikaûmie biongo ta biûyûûyû bienu. Baaregire mbatongoria barî rwanda, bangeria. 9Baangeriirie na amwe na kwîgua ibooneete mantû mara ndarûthîîte mîanka mîrongo îna. 10Nkwîgua banthûûria ndauga, 'Mathûgaania ma antû baba rîonthe meegagua marî kûraaya naani. Baticiûkagîrwa bamenya bûra mbendaga barûtha.' 11Nkûthûûra ndathiîtia ndauga, 'Batikooro bakinya kûra mbathuuranîrîte kûrî kînogoko kîao.' " 12Kwoogu îmenyeereeni, aruayia na aarayia, bwîgue gûtirî we wacienu arî na nkoro ya kûrûtha ûthûûku kana ya kûrega gwîtîgia, aaya kwathûkana na Ngai ûra atûûraga mwoyo. 13Îkanagîraani wîru wakîra ntugû twîtaga "îmunthî," kaingo bûteeneerua i wîyia bûbûûmia biongo. 14Tûrî na kîthaarimo kîmwe na Kîrîstû kuumania na mantû mara arûthîîte, waya kwîgua tûkaathi na mbere kwîgua tûrî na wîtîgio bûûriku mwanka mûthia. 15Maandîko Maatheru maugîîte, "Bweegua Ngai akîaria naabi îmunthî, bûtikaûmie biongo, ta biûyûûyû bienu. Baaregire mbatongoria, bangeria." 16I ba ûû bo beegiirue mîgambo ya Ngai, îndî baarega kûmwîgua? T'wabara bonthe Musa aatongoreerie bauma Miisiri? 17Na i ba ûû baathûûrîîtie Ngai mîanka mîrongo îna? T'wabara beeyiirie na bara baakuirîîre rwanda? 18Na i ba ûû Ngai aaragîîria îgûrû rîao rîra aathiîtiirie auga, "Batikooro bakinya kûra mbathuuranîrîte kûrî kînogoko kîao"? T'wabara baaregire kûmwathîkîra? 19Kwoogu i ta kwonania n'ûntû bwa kwaga wîtîgio kwao, antû babu batigîkinya gûntû gûku.

will be added

X\