AIBIRANIA 13

1Îthiini na mbere kwendanaga ta muntû na mûruagina kana mwaragina. 2Ririkanagaani kûgwataga antû ûgeni, n'ûntû bamwe ba bara baarûtha ûgu ibaagwatire araîka ûgeni batakûmenya. 3Ririkanagaani bara barî nceera, taka bûrî amwe na bo ku. Na ririkanagaani bara bakûnyamaara taka bûkûnyamaara na biû. 4Kûgûrana ikûbatîîrue gûtîîywa i bonthe. Arûme na eekûrû ibabatîîrue beegua barî eetîgua bonthe. Ngai akaagambithia bara bamaramaraga na bara bathûngagîîra. 5Bûtikeende wendo bwa mbia bûbûgwata ûkombo. Îganagîrwaani i bira bûrî na bio n'ûntû Ngai augîîte, "Ntikooro gûtiga kana ngûta." 6Kwoogu ga tuugeeni ûûgû, "Mwathani n'we mûnteethia, ntiîgua ûguaya. N'ûû ûûmbûûria?" 7Ririkanagaani atongoria beenu bara baabwîrire kiugo kîa Ngai. Thûgaanîriani mûtûûrîre wao, bûthûkie wîtîgio bwao bûrî ngerekano. 8Yiesû Kîrîstû akari bûmwe rîonthe, îgoro, îmunthî, mwanka gûtarî rîo. 9Bûtikaarekeeni moorutani maageni ma mîthemba yonthe matûma bûta njîra. N'ûntû bwega kûûmîîrua nkoro n'ûtugi bwa Ngai, îndî ti kwathîkîra maathana îgûrû rîa irio. Maathana ta mamu matiteethagia bara bamaathîkagîra. 10Athînjîri ba Ngai ba Ayaundi bara barutaga ngûgî nyomba ya Ngai, batirî na aki ya kûrîa kîgongwana gîetû. 11Mûthînjîri ûra mûnene wa Ngai airaga nthakame ya nyamû ara atheru mûno, akîmîruta îrî kîgongwana gîa kûthiria meeyia îndî biimba bikarîrîrîkîrwa na mwanki ome ya ara marema maambîîtwe. 12Ûgu i ta bu Yiesû aanyamaaragîrua ome ya taûni ya Njerusaremu, kaingo atheria antû na nthakame yake wengwa, bathira meeyia. 13Kwoogu tûthiini naara arî ome, twîgue îgi rîra eegiirue. 14Aaga nthîgûrû ti gwetû gwa gûtûûra tene na tene. Ga tweteerete gwetû kagiita gakaaya. 15Kwoogu ga tûkumieni Ngai gûkûrûkîîra kîrî Yiesû, kûrî ta kîgongwana gîa ûkumio bwetû kuuma tûnyuani tûra tuumbûraga riîtwa rîake. 16Bûtikaariganîrueni i kûrûtha mantû meega na teethanagiani na bira bûrî na bio, n'ûntû mantû ta mamu imakenagia Ngai, marî ta kîgongwana. 17Athîkagîraani atongoria beenu na bûtikaabakararagieni n'ûntû babûrûngamîîrîîte bakaûrua i Ngai. Bwabaathîkîra bakaaruta ngûgî bakeneete. Îndî bwarega bakaaruta ngûgî barî na kîeba, na bûbu bûtibûteethia. 18Tûrombagîreeni. Tûrî na mma tûtikwîgambithia nkorooni n'ûntû twendaga kûrûtha bûra kwagîrîte magiita monthe. 19Mûno mûno, inkûbûûria bûndombere, Ngai atûme ncooke kîrî biû na mpwî. 20Ngai wa ûkiri ûra aariûkiirie Mûrîîthi wa ng'ondu, mûrîîthi arî îgweta mûno, ta we Mwathani wetû Yiesû Kîrîstû, gûkûrûkîîra kîrî nthakame ya kîrîîkanîro gîa tene na tene, 21aroobwaa bira bionthe biega bûrûthe kwenda gwake. Arootûma tûrûthaga bûra bûmûkenagia, n'ûntû bwa Yiesû Kîrîstû. We arookumua tene na tene. Aameni. 22Aruayia na aarayia, inkûbûûria bûthûgaanîrie bwega mantû mama mbwîrîîte baarûani îno, n'ûntû ti ndaaya mûno. 23Inkwenda kûbûmenyithia atî mûrûayia wetû Timotheo, nararekiirue auma nceera. Akaaya naaga na mpwî, nkîîya nkamûreeta tûûye kûbwona. 24Keethiani atongoria beenu bonthe na antû ba Ngai bonthe. Eetîgîri ba Itaaria bakûbûkeethia. 25Ûtugi bûrookaraga naabi bwinthe.

will be added

X\