AIBIRANIA 11

1Kwîgua tûrî na wîtîgio i kwîgua tûrî na mma ya mantû mara twîrîgîîrîîte, kwîgua twiyî ûntû bûra tûtoona bûrî oogo, tûtarî na nkanja. 2Wîtîgio bwa antû ba tene mûno, i bu bwatûmire Ngai akena i bo. 3Wîtîgio i bu bûtûmaga tûmenya into bionthe biaûmbirwe kuumania na kiugo kîrî Ngai. Kwoogu bira twonaga biaûmbirwe kuuma kîrî bira bitoonekana na meetho. 4I wîtîgio bwatûmire Abeeri arutîra Ngai kîgongwana kîega nkûrûki ya gîa Kaini. Wîtîgio bwake i bu bwatûmire Ngai akena n'we, amûthûkia arî muntû ûmwagîru na aakena n'into bira aamûrutîîre. Na wana kinya ûkeegua n'ûmûkuû, kûringana na wîtîgio bwake i taka aaragia. 5I wîtîgio bwatûmire Enoki athûkua i Ngai kaingo atakua. Gûtaarî muntû akîmenya ara aarî n'ûntû Ngai naarî akûmûthûkia. Mbere ya atirathûkua, Maandîko Maatheru maugaga aarî muntû aakeniirie Ngai. 6Gûtarî wîtîgio gûtirî we akenia Ngai. Muntû wonthe ûra aayaga kîrî Ngai nwa mwanka eetîgie Ngai natûîre mwoyo na nathaarimaga bara bamûcûaga na mantû meega. 7I wîtîgio bwatûmire Nuu aaka cabina îra yoonokiirie antû ba mûciî wake. Nuu neetîgiirie Ngai akûmwîra mantû matoonekanîîte mbereeni. Kuumania na wîtîgio bwake, Nuu aareganire na mantû ma nthîgûrû, aatuîka ûmwagîru kîrî Ngai n'ûntû bwa wîtîgio. 8I wîtîgio bwatûmire Îburaîmu aathîkîra Ngai, rîra Ngai aamwîrire aume nthîgûrû yao athi nthîgûrû îngî îra aamwîrire akamwaa îtuîke yake. Îburaîmu aathiire atakûmenya kûra aathiîte. 9I wîtîgio bwatûmire atûûra ûgeniini gûntû kûra Ngai aamwîrîîte bûrî wîrane. Aatûûraga maremaani barî na Isaka na Njakubu, bara wana bo beerwe wîrane bûmwe n'we i Ngai. 10Îburaîmu aarûthire ûgu n'ûntû bwa bûra eeteereete taûni îbanganîîtue na yakwa i Ngai mûcingiini ûmûkamu. 11I wîtîgio bwatûmire Saara agîa nda ya Îburaîmu, aciara, wana kinya ûkeegua naarî agûtindira. Îburaîmu neetîgîîtie Ngai akaingia wîrane bwake. 12Kinya ûkeegua Îburaîmu naarî agûkûra, akubî akua, muntû ûyû ûmwe naathagayire mûno. Nciarwa ciake ciakarire ta nthata cia îgûrû kana ta mûthanga rûteere rwa îria. 13Antû babu bonthe baakuire barî na wîtîgio. Bataarî bakwingîrua i Ngai mantû mara aabeete wîrane bwa mo. Îndî iboonaga îgiita rîa mo rîgaakinya, bagakena mûno. Ibeetîgîîtie atî baarî ageni na ûtûûro bwao bûtaarî nthîgûrû. 14Bara baugaga mantû ta mamu boonanagia ibagûcûa kwao. 15Ûkaaya kwîgua baathûgaanagia kwao i nthîgûrû îra baaumîîte, bagîcooka n'ûntû ibaarî na kaanya. 16Îndî baarî na bata na nthîgûrû îîngî îmbega, nthîgûrû ya îgûrû. Kwoogu Ngai atibeegagua îgi bamwîta Ngai wao, n'ûntû nabathuuranîrîte ntûûra yao. 17I wîtîgio bwatûmire Îburaîmu aruta mwana wake Isaka arî kîgongwana, rîra Ngai aamûgeriirie. N'we Ngai eere mawîrane na amwîra, "N'Isaka aagûtûma ûgîa nciarwa." Na amwe na ûgu neetîgagîîria kûruta Isaka ûra aarî mwana wake wenka, atuîka kîgongwana. 19Îburaîmu neetîgagia atî Isaka wana agîkuire, Ngai akîûmba kûmûriûkia. Na kwoogu i taka gwatuîkire Îburaîmu aacookeerwe n'Isaka ariûkîîte. 20I wîtîgio bwatûmire Isaka athaarima aana baake, Njakubu na Esaû, mantûûni ma ntugû ciao ira ciarî ikaaya. 21I wîtîgio bwatûmire Njakubu, rîra aarî akubî gûkua, athaarima aana bara baîrî ba Njosebu. Na aacooka aakumia Ngai eeteetheereetie kûrûngama na kamûraagi gaake kara eekongootagia na ko. 22I wîtîgio bwatûmire Njosebu, rîra aarî akubî gûkua agwetera Aisiraeri abeera bakauma ûkombooni Miisiri. Aabeerire aakua bakamate maîndî maake. 23I wîtîgio bwatûmire aciari ba Musa bamwitha mîeri îthatû n'ûntû iboonire aarî kaana kaathongi. Bataakuthûka kûrega kwathîkîra watho bwa mûnene wa Miisiri. 24I wîtîgio bwatûmire Musa agûkûra arega gwîtwa mwana wa mwarî wa mûnene wa Miisiri. 25Musa oonire i kaaba akanyamaaranîria amwe na antû ba Ngai, bantû a kwîgua mûrîo wa kagiita gaakai wa meeyia. 26Oonire i kaaba akanyaamaara n'ûntû bwa kwîrîgîîra Kîrîstû ûra aayîîte, kîrî kwîgua arî na ûtonga bwa Miisiri bunthe. Na gîtûmi i kwîgua neeteereete kwewa kîewa. 27I wîtîgio bwatûmire Musa auma Miisiri, na ataakuthûkaga mûthûûro wa mûnene. Aakarire arikîîtie wîtîgio bwake taka oonaga Ngai ûra atoonagwa. 28I wîtîgio bwatûmire eera Aisiraeri barîe kîatho gîa Pasaka na baake nthakame itugîîni bia mîrango, kaingo mûraika ûra aûragaga aana ba mbere ba antû na ba nyamû, ataûraga baao. 29I wîtîgio bwatûmire Aisiraeri baringa Îria Rîtûûne bathiîrîîte nthî îmbûmo. Îndî Amiisiri bagûcûûgia kûringa ta bo, ibaûrîîre ku. 30I wîtîgio bwatûmire nthingo cia Njeriko ciomokanga Aisiraeri bagûcithiûrûûka ntugû mûgwanja. 31I wîtîgio bwatûmire Raabu, mûka ûra aarî îrwaya, agwata ûgeni Aisiraeri bara athigaani. Na kwoogu ataakua antû bara bangî ba taûni înu bagîkua, bara bateetîgîîtie Ngai. 32Nthi na mbere? Gûtirî na kagiita ga kûgana ga kûgweta mantû ma Ngindioni, Mbaraki, Samusoni, Njebutha, Ndaundi, Samweri na iroria. 33Wîtîgio bwao ibwatûmire barûa na nthîgûrû ira ingî baicinda. Baatûûraga ûtûûro bwagîru na beewa mawîrane i Ngai. Ngai naaboonokagia kuuma kîrî tûnywa twa cimba, 34ndîrîmbî cia mwanki na kuuma kîrî ûûgî bwa ndûyiû. Bataarî na inya îndî ibaayire kûmîgîa nyumaani. Baarî ncamba cia ndûa, baatûma njûûrî cia antû bara bangî ibakuthûka. 35Eekûrû ibaacookagîrwa i bara baao baakuîte, barî mwoyo. Antû bamwe ibaanyamaariirue mûno na beetîgîîria kûnyamaarua, kaingo bariûkua bathi ûtûûrooni bwega nkûrûki. 36Bara bangî ibaanyûrûntagwa na bakaringwa ibooko. Bangî na bo ibaathaîkagwa na nyororo bakaingîrwa nceera. 37Kûrî bo baûragagwa na maiga, bangî bakagiitanua maita maîrî, na bangî bakaûragwa na ndûyiû. Kûrî bo bataarî na gîa gwîkîra, beekagîra njûo cia ng'ondu kana cia mbûri. Bataarî gîntû. Ibaanyamaariirue na baarûthîrwa mantû maathûûku. 38Baarî antû beega mûno bataabatîîrue kwîgua barî nthîgûrû îno. Baariûngaga rwanda na irîmaani, bagîkaraga makurunguuni na mîrinyaani. 39Antû babu bonthe i baiyîkeene n'ûntû bwa wîtîgio bwao, îndî amwe na ûgu gûtirî we oona Ngai akiingia wîrane bûra aabeete. 40Ngai naabangîîte mûbango ûngî ûmwega nkûrûki n'ûntû bwetû. Aabangîîte atiingia mûbango wake wa kûbatuîkithua baatheru cwe tûtarî oogo.

will be added

X\