AIBIRANIA 10

1Watho bwa Musa i mbica ya mantû meega mara makaaya. Ti bu mantû mongwa. Igongwana bira birutagwa kûringana na watho birutagwa îgiita na îgiita wakîra mwanka. Na watho bûbû bûtiûmba kûtheria bara bathiyaga akubî na Ngai. 2Ûkaaya kwîgua bitûmaga bathera, wîgua biatigirwe kûrutagwa n'ûntû bara barombaga Ngai wîgua baatuîkire baatheru, baathira meeyia na baatiga kwîgagua ibeeyîîtie. 3Îndî igongwana ibibaririkanagia meeyia maao wakîra mwanka, 4n'ûntû nthakame ya ndeegwa na ya mbûri îtiûmba kûthiria meeyia. 5I ntûma rîra Kîrîstû aayire gûkû nthîgûrû eerire Ngai, "Ûtirî bata na igongwana na into bira antû barutagîra Ngai, îndî nûmpete mwîrî wa kûruta. 6Ûtikenaga n'igongwana bira bibîîthagua kana bira antû bakûrutagîra n'ûntû bwa meeyia maao. 7Ndauga, 'Mbûyîîte kûrûtha kwenda gwaku, Ngai, wata bûra mantû maakwa maandîkîîtwe îbukuuni rîa Maandîko Maatheru.' " 8Mbere ariuga, "igongwana, into bira antû barutagîra Ngai, igongwana bira babîîthagia na bira bamûrutagîra n'ûntû bwa meeyia" (bira wathooni kwîrîtwe birutagwe), Ngai atirî bata na bio na atikenaga i bio. 9Rîru auga, "Mbûyîîte kûrûtha kwenda gwaku, Ngai." Athûkîîtie igongwana bia kîrîîkanîro gîîkûrû, aareeta kîgongwana kîngî. 10N'ûntû Yiesû Kîrîstû naarûthire bûra Ngai eendaga arûtha, itûtuîkithîîtue baatheru i kwîruta kûra aarutire mwîrî wake rîmwe na rîa mûthia. 11Kûringana na kîrîîkanîro kîra gîkûrû, athînjîri barutaga ngûgî yao wakîra ntugû, bakaruta igongwana wabimwe maita maingî, bira bitaûmba kûthiria meeyia kinya rî. 12Îndî Kîrîstû aarutire kîgongwana kîmwe n'ûntû bwa meeyia, kîgongwana kîra kîrutaga ngûgî tene na tene. Rîru aakara nthî rûteere rwa ûrîo rwa Ngai. 13Naagu i noogo arî eeteereete mwanka rîra anthû baake bakaareetwa batuîkithue ûkinyo bwa magûrû maake. 14Gûkûrûkîîra kîgongwana gîku kîmwe, bara bathambîîtue meeyia nabatuîkithîîtie baatheru cwe tene na tene. 15Kîrundu Ûmûtheru natwete ûkûûyî bwa ûntû bûbu Maandîkooni Maatheru. Mbere ariuga, 16"Kîrîîkanîro kîra nkaarîîkanîra na antû ba Isiraeri ntugû ciîyîîte, Mwathani ariuga, ûkeegua gîkari ûûgû. Ngeekîra maathana maakwa nkorooni ciao, na mmaandîke mathûgaanioni maao." 17Kaîrî auga, "Ntiiririkana meeyia maao kaîrî, kana mantû mara baarûtha kînyume kîa watho." 18Kwoogu rîra antû barî barekere meeyia maao, gûtirî gîtûmi kaîrî gîa kûruta igongwana. 19N'ûntû bwa ûgu, aruayia na aarayia, tûrî na ûcamba bwa kûthûngîra ara atheru mûno n'ûntû Kîrîstû neetûûrire nthakame yake îrî kîgongwana. 20Naatûrugûrîîre njîra îngî îra îreetaga mwoyo. I taka aûkîîrie nguo îra îgaanîîtie ara atheru mûno, ta yo mwîrî wake. 21Tûrî na mûthînjîri ûmûnene ûra aathanaga nyomba ya Ngai. 22Kwoogu tûthiini kîrî Ngai tûrî na nkoro ciagîrîte, na tûrî na wîtîgio bwingî mûno, n'ûntû tûrî baatherie mathûgaanio mara matûririkanagia ûthûûku bûra twarorûtha. I taka twathambiirue mîîrî na rûûyî rûûtheru. 23Tûthiini na mbere kwîgua tûrî na wîrîgîîro mûno bûra tuugaga itwîtîgîîtie tûtakwenyenya n'ûntû Ngai i mwîtîgua, na n'ûntû naingagia bûra augire. 24Îkanagîraani wîru bwa kwonania wendo, na rûthagaani mantû meega. 25Tûtigaatigeeni kûrîîkanaga amwe ta bûra antû bamwe barûthaga. Ga twîkanagîreeni wîru, mûno mûno, îgiitaani rîra bûkwona ntugû ya kûûya gwa Kîrîstû îrî akubî gûkinya. 26Tûgatua kwîyagia tûkîmenyaga, twiyî ûmma, gûtirî kîgongwana gîa kûthiria meeyia kaîrî. 27Kîra ûkeegua gîtigeere nwa gweteera na ûguaya tûkagiitîrwa îgamba rîra rîyîîte na mwanki ûmwingî mûno ûra ûkaabîîthia bara bareganaga na Ngai. 28Muntû wonthe ûra aaregaga kwathîkîra watho bwa Musa naûragagwa atakwîguîrwa kîao kuumania na ûkûûyî bwa antû baîrî kana bathatû. 29Î bara bamenagîîria Mwana wa Ngai? Bara bathûkagia nthakame ya kîrîîkanîro kîîyerû taka îtarî ntheru, bara barumangaga Kîrundu wa ûtugi? Antû baba bakeewa îkaanûkia rîînene nkûrûki. 30Itwiyî ûra augire, "I niû nkaarîyia bara bambîtagîria, nkabakaanûkia." Na kaîrî auga, "Mwathani akaagiitîra antû baake îgamba." 31T'ûntû bwa mathee kûgîa njaraani cia Ngai ûra atûûraga mwoyo. 32Ririkanaani bûra bwanyamaaraga bûgana îndî bwaûmîîria mathîîna mamu îgiita rîkûrûku rîra bwamenyire ûmma. 33Magiita mamwe ibwarumangagwa na bûkathîînua antû bakîonaga. Magiita mangî bûkeegua bara bangî kîao kûthîînuani kwao. 34Na ibweegagua kîao bara baarî nceera. Bwatunywa into bienu bwonaga ta ûntû bwa gûkeneera, n'ûntû ibwiyî bûrî na into biega nkûrûki bia gûtûûra tene na tene kûra îgûrû. 35Kwoogu bûtigaakue nkoro n'ûntû gûgaatûma bwewa kîewa kîînene. 36Nwa mwanka bûtuîke aûmîîria kaingo bûrûtha bûra Ngai akwenda, na kaingo abwaa kîra aaugire akabwaa. 37Maandîko Maatheru maugîîte, "N'ûntû nyuma ya kagiita gaakai, ûra arî mûûyi nakûûya na atiithûkia îgiita. 38Ûra aagîrithagua n'ûntû bwa wîtîgio bûra arî na bu agaatûûra. Îndî ûra acookaga nyuma ntiikena n'we." 39Îndî tiû tûtirî bara bacookaga nyuma bakathirua. Tûrî boonoku n'ûntû bwa wîtîgio.

will be added

X\