AEBEESO 6

1Aana, athîkagîraani aciari beenu ndeni ya Mwathani. Ûgu i bu kwagîrîte. 2"Tîîyaga abaagu na nyûkwe." Rîru i rîo yathana rîa mbere rîra rîrî na wîrane bwa Ngai 3atî, "kaingo ûtûûra bwega na ûtûûra îgiita rîraaya gûkû nthîgûrû." 4Naabi, beethe ba aana, bûtikaathûûrieni aana beenu na kûbarûthîra mantû mataagîrîte. Barereeni bakûre na nthoni imbega na bûkîbarutanaga bûra Mwathani eendaga batûûra. 5Nkombo athîkagîraani anene ba aaga nthîgûrû bara bûrutagîra ngûgî na bakuthûkageeni mûno. Barutagîreeni ngûgî na nkoro îmbega ta Kîrîstû bûkûrutîra ngûgî. 6Na ti kuuga bûbarutagîre ngûgî na nkoro îmbega warîra babûrûngamîîrîîte kaingo bûbakenia. Rîonthe barutagîreeni ngûgî ta nkombo cia Kîrîstû. Rûthagaani kwenda kwa Ngai na nkoro yonthe. 7Rutaani ngûgî na wîru ta Mwathani bûkûrutîra na t'antû. 8Ririkanaani Mwathani agatwa woora muntû kîewa kûringana na mantû meega mara tûrûthaga, nwîgue tûrî nkombo kana tûtirî nkombo. 9Naabi, anene ba nkombo, rûthagîraani nkombo cienu bûra kwagîrîte. Bûtikaabamakie. Ririkanaani mûnene wenu na wao n'ûmwe, ûra arî îgûrû, ûra athûkagia antû bonthe ûntû bûmwe. 10Nkîthiria, ka mbwîreeni bûkarage bwîrikîîtie bûrî ndeni ya Mwathani na ndeni ya inya yake înene. 11Thûkiani mathaga monthe ma ndûa ma Ngai, kaingo bûûmba kwîrigîîria kîrî mîbango îmîthûûku ya Nkoma. 12Tûtikûrûa na antû, tûrîrûa na anene ba ûthûûku, aathani, mainya ma mwindu ma nthîgûrû, na ûthûûku bwa gîîkîrundu bwa îgûrû. 13N'ûntû bwa ûgu, thûkiani mathaga ma ndûa monthe ma Ngai, kaingo bûûmba kûrûa bwega rîra Nkoma akaabwithûkîra. Bwarûtha ûgu bunthe, rîru bûrûngame bwîrikîîtie. 14Kwoogu îthuuranîreeni. Îbogeeni ûmma ta mûciibi kauna. Ogeeraani wagîru ta îthaga rîa kûrigîîria kîbara gîtigaatonywe. 15Kwîthuuranîra kwenu kûthi gûtûmîîria ntheto îmbega ya ûkiri, ikwîgue i ku iraatû bienu. 16Îgiita rîonthe tûmagîraani wîtîgio bûrî rong'o yenu kaingo bûûmba kûrigîîria mîguî ya ûra mûthûûku, îra îrî mwanki. 17Îkîraani wonokio bûrî nkoobia îra îrigagîîria kîongo gîtigaatonywe. Thûkiani rûyiû rwa Kîrundu rûrî kiugo kîa Ngai. 18Kwa inya ya Kîrundu Ûmûtheru rombagaani rîonthe maromba ma mîthemba yonthe na ûragiani bunthe bûra bûkwenda bûrûthîrwa. Na kaingo bûûmba kûrûtha ûgu, karagaani bwîcûûbîrîte. Karagaani bûkîrombagîra antû ba Ngai bonthe. 19Ndombagîraani Ngai ampe mîgambo ya kûmenyithania kîriga kîa ntheto îmbega ndî na ûcamba. 20Nthaîkîîtwe n'ûntû bwa gûtûmîîria ntûmwa îno, ndî mûtûmwa wa Kîrîstû. Ndomberaani mbîgue ndî na ûcamba bwa gûtûmîîria ntheto îmbega bûra mbagîrîtwe. 21Mûruayia ûra twendeete na mwîtîgua ngûgîîni ya Mwathani, Tikikas, akabwîra mantû maakwa monthe bûmenye bûra ndî na bûra nkûrûtha. 22Ndamûtûma kîrî biû kaingo abwîra bûra tûrî na akîbwîkîra wîru. 23Ngai Baaba na Mwathani Yiesû Kîrîstû baroobwaa ûkiri, wendo, na wîtîgio. 24Ûtugi bwa Ngai bûrookaraga na bonthe bara beendeete Mwathani wetû, Yiesû Kîrîstû na wendo bûtathira.

will be added

X\