AEBEESO 5

1Tuatiani Ngai n'ûntû bûrî aana baake bara eendeete. 2Karagaani bwendeene ta bûra Kîrîstû aatwendire, aakua n'ûntû bwetû arî kîgongwana, Ngai eetîgîîria akeneete. 3Gûtikeegue kûrî na ûmaramari, mantû mataagîrîte kana wîrirîîria gatîgatî keenu. Wana kûgweta bûtikaagwete mantû mama n'ûntû biû bûrî antû baatheru ba Ngai. 4Bûtikaagwete mantû ma nthoni, ma waa, kana mathee matarî meega. Mantû ta mama matiagîrîte kîrî biû. Îndî bûbatîîrue bûcookagîria Ngai nkaatho. 5Menyaani bwega gûtirî we akaathi ûneneeni bwa Kîrîstû na Ngai arî mûmaramari, kana arûthaga mantû mataagîrîte, kana arî mwîrirîîria (n'ûntû wîrirîîria bûthûkagia kaanya ka Ngai). 6Muntû atikaabweneerie na rwaria rwa waa n'ûntû Ngai akoonania mûthûûro wake kîrî bara batamwathîkagîra, bara barûthaga mantû ta mamu. 7Kwoogu bûtikaagwatanîre na bo bûrûtha mantû mara barûthaga. 8Bûratûûraga mwinduuni, îndî îîndî bûrî werûûni ndeni ya Mwathani. Kwoogu karaani ta aana ba werû. 9Maciaro ma werû bûbû i mîthemba yonthe ya wega, wagîru na ûmma. 10Geriani kûmenya mantû mara makenagia Mwathani. 11Bûtikaagwetanîrueni na mantû ma ûtheri ma mwindu. Gondokagîraani bara bamarûthaga. 12Bûrî nthoni kinya kûgweta mantû mara antû bara bataiyî Ngai barûthagîra withooni. 13Mantû mara barûthaga maumîra werûûni i rîo ûthûûku bwa mo bwonekaga, 14n'ûntû werû ibûtûmaga mantû monthe mamenyeka. Na i ntûma kwîrîîtwe, "Ûka, woû ûmaami, riûka uume kîrî bara bakuû, na Kîrîstû agakûmûrîkîra." 15Kwoogu îmenyeereeni mûno mûtûûrîreeni wenu. Bûtigaakareeni ta bia. Karagaani ta antû baûgî. 16Tûmagîraani îgiita rîenu bwega, n'ûntû ntugû ino i ntugû cia ûthûûku. 17Kwoogu bûtigaakare ta bia. Ciûragaani bûra Mwathani eendaga bûrûtha. 18Bûtigaatogoone i ncoobi n'ûntû ntogoona nîtûmaga muntû arûtha mantû mataagîrîte. Ûyûragwaani i Kîrundu. 19Aranagîriani na cabuurî, nyîmbo cia Ngai na nyîmbo cia gîîkîrundu. Inaani bûkumie Mwathani nkorooni cienu. 20Cookagîriani Ngai Baaba nkaatho n'ûntû bwa mantû monthe riîtwaani rîa Mwathani wetû, Yiesû Kîrîstû. 21Woora muntû neenyithagie kîrî ûra ûngî n'ûntû bwa gûtîîya Kîrîstû. 22Eekûrû, înyithagieni kîrî arûme beenu ta bûra bwînyithagia kîrî Mwathani. 23N'ûntû mûrûme n'we kîongo kîa mwekûrû wake ta bûra Kîrîstû arî kîongo gîa kanica. Kanica i mwîrî wa Kîrîstû, Mwonokia wa uu. 24Ta bûra kanica îînyithagia kîrî Kîrîstû, i ta bu eekûrû babatîîrue beenyitha kîrî arûme baao mantûûni monthe. 25Naabi, arûme, endagaani eekûrû beenu ta bûra Kîrîstû eendire kanica eeruta, aakua n'ûntû bwa yo. 26Kîrîstû aarûthire ûgu amîtuîkithia întheru, amîthambia na rûûyî na njîra ya kiugo. 27Na gîtûmi gîake kûrûtha ûgu, eendaga kwîrûthîra kanica îrî mwago, îtarî karanga, îtarî nkûnjaru, kana îkari ûntû nwa bûrîkû ta bûbu kaingo îîgua îrî ntheru na îtarî na îbîtia. 28Ûgu i ta bu arûme babatîîrue beenda eekûrû baao, ta bûra beendeete mîîrî yao bongwa. Rîra mûrûme eendeete mwekûrû wake n'we wengwa eebeendaga. 29Gûtirî muntû ameneete mwîrî wake. Muntû nareraga na akamenyeera mwîrî wake. Ûgu i ta bu Kîrîstû amenyagîîra mwîrî wake, ta uu kanica. 30Tiû tûrî icuncî bia mwîrî wake. 31Ta bûra kwandîkîîtwe Maandîkooni Maatheru, "N'ûntû bwa gîtûmi gîku muntû mûrûme agaatiga îthe na gina, agwatithanue na mwekûrû wake, na barî baîrî batuîke mwîrî ûmwe." 32Gîku i kîriga kîînene kîra niû mbonaga gîkari ta Kîrîstû na kanica. 33Kwoogu wakîra ûmwe wacienu nabatîîrue eenda mwekûrû wake ta bûra eebendeete wengwa. Mwekûrû n'we nabatîîrue atîîya mûrûme wake.

will be added

X\