AEBEESO 4

1Îîndî inkwenda kûbûkinyîîria ndî nceera n'ûntû bwa Mwathani, bûtûûrage mûtûûrîre ûkwonania bûrî na mwîto wa Ngai. 2Rîonthe îgaguani bwînyiîtie na bûrî abooreeri. Bûtikeegue bûrî antû ba mûthûûro. Onanagiani wendo kîrî bara bangî, kinya bara babûbîtagîria. 3Cûûgiani mûno kûmenyeera ngwatanîro îra Kîrundu areetaga, bûgwatithanîîtue n'ûkiri. 4Kûrî mwîrî ûmwe na Kîrundu ûmwe ta bûra bweetirwe i Ngai bwîgua bûrî na wîrîgîîro bûmwe. 5Kûrî Mwathani ûmwe, wîtîgio bûmwe na ûbaatithio bûmwe. 6Kûrî Ngai ûmwe, Baaba wa antû bonthe. N'we aathaga antû bonthe na n'we arutaga ngûgî na bo bonthe. Atûûraga ndeni yetû twinthe. 7Woora ûmwe wacietû n'ûmwe kîewa kîa mwanya kûringana na bûra Kîrîstû atûgaîrîte. 8Wata bûra kwandîkîîtwe Maandîkooni Maatheru, "Rîra eetiirie îgûrû naathaûrire agwate na aapa antû biewa." 9Kuuga Kîrîstû "eetiirie" i kwonania naambîîte aaya gûkû nthîgûrû. 10Na Kîrîstû wooyu aayire nthîgûrû n'we eetiirie îgûrû kaingo eegua arî gûntû kunthe. 11Kîrîstû n'we wengwa eeyanire biewa bibi kîrî kanica. Bamwe abaa kîewa gîa gûtuîka atûmwa, bangî abatuîkithia iroria, bangî atûmîîria, bangî arîîthi na bangî aarimû. 12Eeyanire biewa bibu athuuranîra antû ba Ngai baruta ngûgî yake na aaka kanica ta yo mwîrî wake. 13Na kwoogu twinthe tûgaakûra tûkare ûntû bûmwe wîtîgioni bwetû na tûmenye Mwana wa Ngai ûntû bûmwe, mwanka tûtuîke eetîgîri agima tûkare ta Kîrîstû bûra akari. 14Tûtiîgua tûkari ta twana tûnyi wîtîgioni bwetû. Tûtiigarûkaga mathûgaania îgûrû rîa bûra twîtîgîîtie tweegua ûrutani bwa bara barî ûûme bwa gûkangayia antû, bara beendaga kûbîtithia bara bangî njîra na ûrongo bwao. 15Ga twîrage antû ûmma na tûbeendage kaingo tûkûra nkûrûki na njîra cionthe tûkare ta Kîrîstû. Kîrîstû n'we kîongo gîa kanica. 16Kwoogu n'we agwatithanîîtie kanica, ta yo mwîrî wake. Mwîrî ûgwatithanîîtue amwe i tûrûngo mwanya mwanya, tûra Ngai acuûmbîrîte. Rîra tûcuncî tunthe tûkûruta ngûgî ya tu, kanica yonthe nîkûraga îkagîa inya, antû bakîonanagia wendo. 17Riîtwaani rîa Mwathani ndîbwîra bûtigaakare ta bara bataiyî Ngai. Mathûgaania maao maûyûri mantû ma ûtheri, 18i mwindu ûrî ku. Batitaragîrwa mwoyooni ûra Ngai eeyanaga, n'ûntû gûtirî kîo baiyî, ibaûmagia biongo. 19Bationaga mantû maathûûku mara barûthaga ta ûntû. Ibeetîîyîîre gûtirî ûntû boonaga bataagîrîtwe barûtha. Barîrûtha mantû ma rûko ma mîthemba yonthe bakîîriragîîria kûthi na mbere kûmarûtha. 20Îndî biû rîra bwatuîkire eetîgîri ndeni ya Kîrîstû bwarutanirwe mûtûûrîre ûngî wa mwanya na ûyu. 21Na mma ibwiyî mantû ma Yiesû monthe na ibwarutanirwe ûmma bwake. 22Kwoogu bûtikeegue bûrî ba mûkarîre ûra bwatûûraga mbereeni. Mûkarîre wenu warî wa mîtugo ya mawîrirîîria maathûûku, ma ûrongo, mara maabwînyangagia. 23Erûuani mathûgaania meenu, 24bwonanie kûgarûka kwa mûkarîre wenu wa wagîru bwa mma, na ûtheru bwa mma. 25Kwoogu, bûtikaarie ûrongo. Îranagaani ûmma n'ûntû twinthe tûrî tûcuncî twa mwîrî ûmwe. 26Bûtikaareke mûthûûro ûtûma bwîyia. Bûtikaareke riûa rîthûa bûthûûri. 27Bûtikaanenkere Nkoma kaanya ga gûtûma bwîyia. 28Mwamba natige kwiya. Narute ngûgî oone mbia kaingo aûmba gûteethia bara bakwenda ûteethio. 29Bûtikaaragieni mîgambo îtaagîrîte. Bunthe bûra bûkaaragia ibwîgue bûrî ûntû bwega, ûntû bûûmba gûteethia muntû wonthe ûra ûkaabwîgua. 30Bûtikaathûûrie Kîrundu Ûmûtheru ta we rwano rwa kwonania bûgaakûûrwa wîyiani ntugû ya mûthia. 31Bûtikeegue bûrî antû ba marûrû. Na bûtikeegue bûrî antû ba mûthûûro, na bûtikaagondokagîre antû. Bûtikaarume antû. Na nwa mwanka bwîgue bûtarî na rûmena rwa mûthemba nwa ûrîkû. 32Nwa mwanka bûteethanagie na bwîganague kîao. Rekanagîraani ta bûra Ngai aabûrekeere ndeni ya Kîrîstû.

will be added

X\