AEBEESO 3

1Gîku i kîo gîtûmaga mbûrombera Ngai, niû, Paûrû, mûthaîkwa wa Kîrîstû n'ûntû bwenu bara bûtarî Ayaundi. 2Na mma ibwîgîîtue bûra Ngai ampete ngûgî ya mwanya ya kûbûtûmîîria. 3Ngai nangwûrîîre kîriga ta bûra mbandîkîîte bûûkai mantû ma kîo baarûani îno. 4Bwamîthooma bûkaamenya bûra nciûkîrîtwe i kîriga gîku bûgana mantûûni ma Kîrîstû. 5Kîriga gîku gîtaamenyithanîîtue kîrî bara baarî oogo mbere yetû, ta bûra îgiitaani rîrî kîgwûrîrîtwe atûmwa baake baatheru na iroria na njîra ya Kîrundu. 6Na kîriga n'atî, bara batarî Ayaundi na bara barî Ayaundi bakeewa rûgai rûmwe gûkûrûkîîra nthetooni îmbega. Tûrî ta icuncî bia mwîrî ûmwe na wîrane bwa Ngai i bwetû twinthe gûkûrûkîîra kîrî Kîrîstû Yiesû. 7Niû ndatuîkithiirue mûruti ngûgî wa Ngai ntûmagîîria ntheto îno îmbega, kîrî kîewa kîa mwanya kîra Ngai aampeere kwa inya yake îra îrutaga ngûgî ndeni yakwa. 8Wana weegua ndî ûmûniini nkûrûki ya antû bara bangî ba Ngai, i ndeerwe ngûgî îno ya mwanya ya gûtûmîîria ntheto îmbega kîrî bara batarî Ayaundi îgûrû rîa ithaarimo bia gîîkîrundu bitarî mûthia bia Kîrîstû. 9Ngai aanthuurire mmenyithania kîriga kîra we Mûûmbi wa bionthe aakarîîte aithîîte kuuma wo tene. 10Rîarî yerekeeria rîa Ngai amenyithanie gûkûrûkîîra kîrî kanica îgiitaani rîrî tûrî ûûme bwake bwa mîthemba îmingî kîrî aathani na mainya mara maathanaga maanganyoni. 11Na ûyu n'uu warî mûbango wake kuuma tene na tene, ûra aingîîtie ndeni ya Kîrîstû Yiesû, Mwathani wetû. 12Tûrî ndeni ya Kîrîstû na tûmwîtîgîîtie tûrî na ûcamba bwa kûthi kîrî Ngai tûtarî na nkanja. 13Kwoogu bûtigaakue nkoro i kûnyamaarua gwakwa n'ûntû bwenu. Ndînyamaarua bûteetheka. 14Gîtûmi gîku i kîo gîtûmaga nturîria Baaba maru, Îthe wa Mwathani wetû, Yiesû Kîrîstû, 15ûra eete mîgongo yonthe na araîka bonthe mariîtwa. 16Inkûbûrombera Ngai ûra arî ûtonga bwa kûrigaria, abwîkîra inya nkorooni cienu gûkûrûkîîra kîrî Kîrundu wake ûra arî ndeni yenu. 17Inkûromba Kîrîstû atûûrage nkorooni cienu n'ûntû bwa wîtîgio bwenu. Inkûbûrombera bwîrikia wendooni na bwakîka rwaraani rwa wendo, 18kaingo amwe na eetîgîri bara bangî bonthe bûûmba kûmenya bûra wendo bwa Kîrîstû bwaramîîte bûgana, bûra bûraayîîte bûgana, bûra bwîndamîîte bûgana, na bûra bwîtîtie îgûrû bûgana. 19Bûroomenya wendo bwake kaingo bûûmba kûûyûrwa kûrû n'ûngai, kinya ûkeegua bûtimenyekana bunthe. 20Arookumua Ngai ûra aûmbaga gûtûrûthîra mantû na agakûrûkîîria na kûraaya bûra tûmûûragia atûrûthîre, kana bûra tûthûgaanagia gûkûrûkîîra kîrî inya yake îra îrutaga ngûgî ndeni yetû. Arookumagua i kanica gûkûrûkîîra kîrî Kîrîstû Yiesû magiita monthe tene na tene! Aameni.

will be added

X\