AKOROSAI 4

1Naabi anene ba nkombo, rûthagîraani nkombo cienu bûra kwagîrîte. Ririkanagaani wana biû bûrî na mûnene wenu îgûrû. 2Rîonthe rombagaani bûkîîmenyagîîra na bûgîcookagîria Ngai nkaatho. 3Tûrombagîreeni na tiû Ngai atwe kaanya ga gûtûmîîria kîriga kîa mantû ma Kîrîstû. Nthaîkîîtwe n'ûntû bwa gûtûmîîria mantû mamu. 4Ndombagîraani ntûmagîîrie ntheto îno îmbega ngîtaragîîria bwega bûra mbagîrîtwe. 5Karagaani na ûûme rîra bûrî amwe na bara batarî eetîgîri. Na tûmagîraani îgiita rîenu bwega. 6Mîgambo yonthe îra bûkaaria nîîgue îrî mîgambo ya ûtugi. Bûbatîîrue antû babûûria biûria bûmenya kûbacookagîria bûra kwagîrîte. 7Tikikas, mûruayia mwendwa, na mwîtîgua ngûgîîni îmwe naati îra tûrutagîra Mwathani akabwîra mantû maakwa bûmenye bûra ndî. 8Ndamûtûma kîrî biû kaingo abwîra bûra tûrî na akîbwîkîra wîru. 9Ndabatûma barî na Onesimas wa kuuma naagu kwenu. Wana we i mûruayia, mwendwa na mwîtîgua. Baaya bakabwîra bûra mantû marî naaga. 10Bûgûkeethua n'Arîstakas. Tûthaîkîîtwe n'we nceera. Na wana Maariko mûruagina wa kîîmûciî wa Baranaba akûbûkeethia. Maariko aaya bûmûgwate ûgeni wabûra bweerirwe. 11Yiesû, ûra kaîrî eetagwa Njastas wana we akûbûkeethia. Babu i bo Ayaundi eetîgîri bara tûkûruta na bo ngûgî ya ûnene bwa Ngai na ibambîkagîra wîru. 12Epabaras, mûruti ngûgî wa Kîrîstû wa kuuma naagu kwenu, wana we akûbûkeethia. Rîonthe nabûrombagîra mûno akîûragia Ngai abûteethie bûtuîke agima wîtîgioni na bûmenye mantû monthe mara Ngai eendaga bûrûtha. 13Ndî mûkûûyî wa bûra eethangîkagia n'ûntû bwenu na n'ûntû bwa eetîgîri ba taûni ya Raondisia na ya Ieraporis. 14Ndagitaarî mwendwa, Ruka, na Ndemas bakûbûkeethia. 15Nkeetheriani aruayia na aarayia bara barî Raondisia. Na nkeetheriani Nimpa na eetîgîri bonthe bara bakomanaga mûciî wake. 16Bwathooma baarûa îno bwone îgûkinyîîra antû ba kanica ya Raondisia kaingo wana bo bamîthooma. Na naabi bûthoome baarûa îra ndabaandîkîîre. 17Na bwîre Arikipas oone akwingia ngûgî îra Mwathani aamwere. 18I niû Paûrû ndaandîka nkeethi ino na njara ciakwa. Ndirikanagaani ndî gûkû nceera. Ûtugi bwa Ngai bûrookaraga naabi.

will be added

X\