AKOROSAI 3

1Woona bwariûkanîîrue amwe na Kîrîstû, mworooto wenu nwîgague ûrî wa mantû mara marî îgûrû kûra Kîrîstû akari nthî rûteere rwa njara ya ûrîo ya Ngai. 2Bûtikaathûgaanagîrieni mantû ma aaga nthîgûrû. Thûgaanagîriani mantû ma îgûrû, 3n'ûntû ibwakuyanîîrie na Kîrîstû mwoyo wenu waigwa kîrî we ndeni ya Ngai. 4Rîra Kîrîstû akoonanua, ta we mwoyo wenu, wana biû bûkoonanua amwe n'we mwagooni. 5Kwoogu karagaani taka bûrî baakuû kîrî mantû ma kîînthîgûrû: mantû ta ûmaramari, mantû ma rûko, na bata ya kûrûtha mantû maathûûku. Bûtikeerirîîrie into bia antû kwîrirîîria gûku kûthûkia kaanya ka Ngai. 6Ngai agaakaanûkia bara batamwathîkagîra, bara barûthaga mantû ta mamu. 7Wana biû mbere bûtuîka eetîgîri ibwarûthaga mantû ta mamu. 8Îndî îîndî bûtibatîîrue bûthûûra, kana bwîgua bûrî antû ba marûrû, kana bûrûtha ûthûûku, kana bûrumana kana bwaria mantû ma nthoni. 9Na bûtibatîîrue bûrongoania n'ûntû ibwatiganire na mîtugo îmîthûûku îra bwatûûraga n'yo mbereeni. 10Îîndî bûtûûraga bûrî antû ba mûtugo ûngî ûra uumanagia na Ngai. Athiîte na mbere akîbûgarûraga meeciiria kaingo bûthi bûkîgarûkaga bûkara ta we. 11Mûtûûrîreeni ûyû, gûtirî mwanya kaîrî wa Mûyaundi na ûra atarî Mûyaundi. Gûtirî kuuga ûyû n'ûmûtaane na ûyû ti mûtaane. Kana îno i nkombo na ûyû ti nkombo. Na kîthoomo ti kîo kîrî gîtûmi mûno. Kîrîstû wenka n'we arî gîtûmi na arî ndeni yetû twinthe. 12Biû bûrî antû ba Ngai bara aathuurire. Bûrî baatheru na bûrî eendwa baake. Kwoogu îgaguani bûrî na nkoro cia kwîganagîîrua kîao. Îgaguani bûrî antû ba kûrûthaga mantû meega na ba kwînyithia, bûrî antû ba ûkiri na bûkîûmagîîria mantû. 13Inyîkanagîriani na rekanagîraani bwabîtanîria. Wata bûra Kîrîstû aabûrekeere, wana biû ibûbatîîrue bûrekagîra bara bangî babûbîtîria. 14Na nkûrûki ya mantû monthe endanagaani n'ûntû wendo i bu bûtûgwatithanagia kûrû. 15Nkoro cienu iciûyûrwe n'ûkiri bwa Ngai n'ûntû Ngai aabwîtire bûkaraga na ûkiri ta tûcuncî twa mwîrî ûmwe. Na rîonthe cookagîriani Ngai nkaatho. 16Kiugo gîa Kîrîstû ikîbûûyûre nkorooni cienu. Tûmagîraani ûûme bunthe bwîrutanage na bweyanage ûkûrû bwingwa. Inagaani cabuurî, nyîmbo cia Ngai, na nyîmbo cia gîîkîrundu bûgîcookagîria Ngai nkaatho nkorooni cienu. 17Mantû monthe mara bûkaarûthaga, kana mara bûkaaragia, marûthageeni riîtwaani rîa Mwathani Yiesû bûgîcookagîria Ngai Baaba nkaatho gûkûrûkîîra kîrî Yiesû. 18Biû eekûrû, înyithagieni kîrî arûme beenu n'ûntû i bu kwagîrîte kîrî bara beetîgîîtie Mwathani. 19Naabi arûme, endagaani eekûrû beenu. Bûtikaabeegue marûrû. 20Naabi aana, athîkagîraani aciari beenu mantûûni monthe, n'ûntû ûgu i bu Mwathani akenagîîra. 21Naabi beethe ba aana, bûtikaathûûrie aana beenu baaya gûkua nkoro. 22Naabi nkombo, athîkagîraani anene beenu ba aaga nthîgûrû mantûûni monthe. Na ti kuuga bûbaathîkagîre warîra babûrûngamîîrîîte kaingo bûbakenia. Baathîkagîreeni na nkoro imbega bûgîkuthûkaga Ngai. 23Barutagîreeni ngûgî mantûûni monthe bûrî na nkoro imbega ta Mwathani bûkûrutîra ngûgî na t'antû. 24Wata bûra bûkûmenya bûkeewa rûgai i Mwathani rûrî kîewa. Ririkanagaani atî, i Mwathani Kîrîstû bûkûrutîra ngûgî. 25Muntû wonthe ûra akaarûtha mabîtia akeewa îkaanûkia rîganeene na mabîtia mara arûthîîte. Ngai agambithagia antû gûtarî kîmenyano.

will be added

X\