AKOROSAI 1

1I niû Paûrû nkûbwandîkîra tûrî na mûruayia wetû Timotheo. Ntuîkithîîtue mûtûmwa wa Kîrîstû Yiesû wata bûra kwarî kwenda kwa Ngai. 2Tûbwandîkîrîte biû antû ba Ngai bûtûîre Korosai. Bûrî aruayia na aarayia eetîgua ndeni ya Kîrîstû. Ngai Baaba wetû aroobwaa ûtugi na ûkiri. 3Rîra tûbûrombagîra, rîonthe itûcookagîria Ngai nkaatho, Îthe wa Mwathani wetû Yiesû Kîrîstû, 4n'ûntû itwîgîîtue bûra bwîtîgîîtie Kîrîstû Yiesû na bûra bwendeete antû bonthe ba Ngai. 5Bûrûthaga ûgu n'ûntû bwa kwîgua bûrî na wîrîgîîro bwa kîra bwaigîrîtwe îgûrû. Na wîrîgîîro bûbu, i bûra bweegiirue kuuma wo rîra bwatûmîîrue ntheto îmbega ya mma. 6Ntheto înu îmbega bwatûmîîrue nîtambîîte nthîgûrû yonthe, yagarûra mîoyo ya antû gûntû kunthe ta bûra yabûgarûrire bûkûmîîgua rîa mbere, bwamenya ûmma bwa ûtugi bwa Ngai. 7Bwarutanirwe ntheto îmbega i mwendwa Epabaras, mûruti ngûgî wa Ngai amwe naati. Epabaras i mwîtîgua ngûgîîni ya Kîrîstû îra akûmûrutîra naaga bantû eenu. 8N'we aatûmenyithiirie bûra Kîrundu atûmîîte bwîgua bûrî na wendo bûgana. 9N'ûntû bwa ûgu, tûkwîgua mantû meenu wana tiû itûbûrombagîra rîonthe. Tûrombaga Ngai atûme bûmenye bunthe bûra eendaga. Na itûmûûragia abwe ûûme bunthe na atûme bûmenye mantû ma gîîkîrundu. 10Rîru mûtûûrîre wenu ûkeegua ûkîonania bûrî antû ba Mwathani na bûkamûkenagia na njîra cionthe. Bûkaathi na mbere kûrûtha mantû meega ma mîthemba yonthe na bûkeerutana kûmenya Ngai nkûrûki. 11Marombaani meetû itûûragia Ngai abwongeere kwa wingî inya yake îrî mwago kaingo bwetagîîra na bûûmagîîria mantû monthe bûkeneete 12bûgîcookagia nkaatho kîrî Baaba. N'we aatûmire twona rûgai ûneneeni bwa werû bûra athuuranîrîte antû baake. 13Naatûrutire inyaani ya ûra aathanaga mwinduuni atwira ûneneeni bwa Mwana wake ûra eendeete mûno. 14Ngai aatûkûûrire na Mwana wake atûrekera meeyia meetû. 15Kîrîstû atuatîîtie Ngai ûra atooneka na meetho, na i mûnene mûno kîrî biûmbe bionthe. 16Into bionthe bia îgûrû na bia nthîgûrû biaûmbirwe n'we. Bira bionagwa na bira bitoonagwa, anene, aathani, atongoria, na bara barî na watho baûmbirwe n'we. Into bionthe biaûmbirwe gûkûrûkîîra kîrî we na birî oogo n'ûntû bwake. 17Kîrîstû nwa aarî oogo wana mbere ya into biûmbwa na n'we abitûîrie bionthe. 18Kîrîstû n'we kîongo gîa kanica, kanica i mwîrî wake. N'we mwambia. Aariûkire arî wa mbere kaingo eegua arî mûnene wa mantû monthe. 19I Ngai eendire bûra bunthe akari bûtûûra ndeni ya Kîrîstû. 20Na gûkûrûkîîra kîrî Kîrîstû, Ngai naathiriirie ûthû bûra aarî na bu na antû. Aareetire ûkiri kîrî into bionthe bia îgûrû na bia nthîgûrû n'ûntû bwa nthakame ya Kîrîstû îra yeetîgire mûtharabaani. 21Bûtikaariganîrueni kûrî rîra bwarî aaraaya na Ngai. Bwarî anthû baake n'ûntû bwarî na mathûgaanio maathûûku na bwarûthaga mantû maathûûku. 22Îndî îîndî Ngai nabûtumîîte ûcoore gûkûrûkîîra kîrî gîkuû gîa Kîrîstû arî mwîrîîni wa kîîmuntû. Na Kîrîstû aarûthire ûgu kaingo abwira kîrî Ngai bûrî baatheru, bûtarî na mabîtia, na bûrî na riîtwa rîega. 23Îndî ingî nwa mwanka bûthi na mbere kwîgua bûrî na wîtîgio bwîbandîîte kîrî bu bwarika. Bûtikeenyenye buuma wîrîgîîrooni bûra bwagîîre na bu rîra bweegiirue ntheto îmbega. Ntheto îno îmbega nîtûmîîrîîtue nthîgûrû yonthe. Na niû Paûrû, Ngai nanthuurîîte ntuîka mûruti ngûgî wake n'ûntû bwa yo. 24Inkeneete i bûra nnyamaaraga n'ûntû bwenu nkîûyûrîîria kûnyamaara kûra mwîrî wa Kîrîstû ûbatîîrue ûnyamaara kinya îîndî. Mwîrî wa Kîrîstû i kanica. Na mathîîna mama mwîrî wakwa wonaga, wonaga mo n'ûntû bwa kanica. 25Ngai aantuîkithiirie mûruti ngûgî ya kanica mbingia mwîto ûyu na kûbûtûmîîria kiugo gîake. 26Mûbango ûyu wa Ngai kîrî biû bûtarî Ayaundi warî kîriga kuuma îgiita rîa antû ba tene. Antû bataumenya n'ûntû warî ûmwithe. Îîndî i rîo Ngai augwûrîrîte antû baake. 27Îndî Ngai neendire kûmenyithia antû bûra kîriga gîku kîrî ithaarimo birî mwago ûgana kîrî bara batarî Ayaundi. Na kîriga gîku i kwîgua Kîrîstû ûra bwîrîgîîrîîte kwîgua bûrî amwe n'we mwagooni wake, arî ndeni yenu. 28Tûtûmagîîria antû bonthe Kîrîstû. Tûbakaanagia na tûkabarutana na ûûme bunthe kaingo tûbanenkanîra kîrî Ngai barî eetîgîri baûyûru ndeni ya Kîrîstû. 29Na kûng'ang'anaani kûra nng'ang'anaga na ngûgî îno, n'inya înene ya Kîrîstû îrutaga ngûgî naani.

will be added

X\