NGÛGÎ 4

1Petûrû na Njoana wabakîaragia na antû, athînjîri ba Ngai, mûnene wa akaria ba nyomba ya Ngai na Asandukai baaya. 2Ibaathûûri n'ûntû Petûrû baarutanaga antû bakabeera atî Yiesû naariûkire. 3Baagwata Petûrû na Njoana. Na n'ûntû mwindu nwarî akubî kûruma, babaingîra nceera mwanka rûûni babagaambithia. 4Îndî amwe na ûgu, antû baingî ba bara beegiirue mantû mamu Petûrû na Njoana baaragia beetîgia. Kîrî bo arûme baarî ta ngiri itaano. 5Gûgûkea rûûni atongoria ba Ayaundi, akûrû, na aarimû ba watho beethîrana Njerusaremu. 6Mûthînjîri ûra mûnene wa Ngai eetagwa Anas naarî oogo. Na kinya Kayabas, Njoana, Aregisanda na antû ba mûciî wa mûthînjîri ûra mûnene wa Ngai ibaarî oogo. 7Petûrû na Njoana baareetwa. Baarûngamua mbere yao. Kîama kîa Ayaundi kîabaûria, "N'inya mbi bûratûmîîre kûrûtha bûra bûrarûthire na n'ûû arabwete watho?" 8Petûrû aûyûrîîtwe i Kîrundu Ûmûtheru abacookeria abeera, "Atongoria ba antû na akûrû, 9i kî n'ûntû îmunthî bûgûtûgambithia n'ûntû bwa kûrûtha ûntû bwega kîrî muntû ûyû araarî kîonje? Na i kî n'ûntû bûgûtûgambithîria bûra arabuuyangire? 10Biû na antû ba Isiraeri bwinthe bûbatîîrue bûmenya muntû ûyû araarî kîonje abuîte n'ûntû bwa riîtwa rîa Yiesû Kîrîstû wa Nasareethi! Yiesû ûra bwambithiirie mûtharabaani, îndî Ngai amûriûkia. 11Kwandîkîîtwe Maandîkooni Maatheru, 'Iiga rîra rîaregirwe i biû aaki, îîndî i rîo rîtuîkîîte rîa koona.' 12Wonokio bûtioneka kîrî muntû ûngî, n'ûntû nthîgûrû îno yonthe gûtirî muntû arî riîtwa rîûmba kwonokania tatiga Yiesû." 13Akîama babu bakwona bûra Petûrû na Njoana baaragia na ûcamba baarigara mûno i bo n'ûntû baaboonaga barî antû woogu, batarî bathoomu. Baarîcûkwa baamenya antû babu ibaakaranagia na Yiesû. 14Boona muntû ûyu Petûrû na Njoana booreetie arûngi amwe na bo, baaga kîra babaûria. 15Bauga barutwe nja batigwe baaranîrie. Akîama babu bagûtigwa baûrania, 16"N'ata tûkûrûtha antû baba n'ûntû kwaria mma kîama kîra bararingire îkîmenyekanîîte n'antû ba Njerusaremu bonthe na tûtikaana? 17Bûra tûkaarûtha kaingo tûrigîîria mantû mamu matamba nkûrûki, itûkaabamakia kaingo gûtarî we bagwetera kaîrî mantû ma Yiesû." 18Rîru beeta Petûrû na Njoana babakaania babeera batikaarie nwa rî kana barutana nwa ata îgûrû rîa Yiesû. 19Petûrû na Njoana babeera, "Tagiitaani bwingwa bûra kwagîrîte meethooni ma Ngai--tûbwathîkîre kana twathîkîre Ngai? 20Tûtitigana na mantû twoneete na tweegua." 21Akîama babu babamakia nkûrûki, rîru babarekia. Baaga gîtûmi gîa kûbaa îkaanûkia n'ûntû antû bonthe ibaakumagia Ngai n'ûntû bwa ûgu Petûrû na Njoana baarûthîîte. 22Muntû ûyu Petûrû na Njoana booreetie aarî wa mîanka nkûrûki ya mîrongo îna. 23Petûrû na Njoana bakûrekeerua, baathi beera bara bangî baciao bûra athînjîri bara banene ba Ngai na akûrû ba kîama baabeerîîte batige kûrûtha. 24Bara bangî bakwîgua ûgu, bonthe barî amwe na Petûrû na Njoana baaromba Ngai bakîmwîraga, "Mwathani, i woû Mûûmbi wa îgûrû, nthîgûrû, îria, na bionthe bira birî gûntû gûku. 25Waariirie na njîra ya Kîrundu Ûmûtheru gûkûrûkîîra kanyuani ka mûruti ngûgî waku, ta we kîûyûûyû gîetû, Ndaundi, wauga, 'I kî n'ûntû mîgongo îngî îgwetwe i mûthûûro? I kî n'ûntû antû barûthîîte mîbango ya ûtheri? 26Anene ba nthîgûrû beethuuranîîre, aathani beethîrana amwe kaingo baregana na Mwathani na Mesia wake.' 27"Wabu Eronde, Pontio Piraatû, antû batarî Ayaundi, na antû ba Isiraeri beethîrana amwe aaga taûni îno baregana na mûruti ngûgî waku ûmûtheru, Yiesû, ûra wathuurire atuîka Mesia. 28Ûgu baarûthire, woû wengwa nwarî ûkûbanga bûkarîke woogu kwa inya yaku na kwa wendi bwaku. 29Îîndî, Mwathani, teegua bûra bakuuga bagîtûmakia! Tûma tûgîe ûcamba, tiû aruti ngûgî baaku, tûtûmîîrie kiugo gîaku. 30Tûma inya yaku ya kworania, tûma biama na magegania bioneke kwa riîtwa rîa mûruti ngûgî waku ûmûtheru, Yiesû." 31Bakûrîîkia kûromba ûgu, bantû agu baarî ainaina. Booyûrwa i Kîrundu Ûmûtheru bonthe. Baatûmîîria kiugo kîa Ngai barî na ûcamba. 32Eetîgîri bonthe beegagua barî na nkoro îmwe na mwoyo ûmwe. Gûtirî we kîrî bo akiuga gîntû nwa kîrîkû kîa bira aarî na bio i gîake wenka. Baatûmagîra into biao bonthe barî amwe. 33Atûmwa baathi na mbere gûkûûyîîra mantû ma kûriûka kwa Mwathani Yiesû na inya nkûrûki na Ngai abathaarima mûno bonthe. 34Gûtirî we waciao aagaga gîntû n'ûntû bara baarî na ithaka kana nyomba beendagia bakareeta mbia 35kîrî atûmwa, atûmwa bakagaîra cio ûra wonthe aarî na ûbatu. 36Ikwarî na muntû ûmwe wa mwîrîga wa Araawî wa kuuma nthîgûrû ya Kupooro eetagwa Njosebu. Atûmwa baamwîtaga Baranaba (i ta kuuga 'Mûûmanîîria'). 37Njosebu eendiirie kîthaka gîake aareetera atûmwa mbia cionthe ira kîaumire.

will be added

X\