NGÛGÎ 23

1Paûrû abacûûba, abeera, "Aruayia, mwanka îmunthî, meethooni ma Ngai ntûîre nkîîgagua nkorooni yakwa ntirî na îgamba." 2Paûrû akuuga ûgu, mûthînjîri ûra mûnene wa Ngai eetagwa Anania eera bara baarûngi akubî n'we bamûringe kanyua. 3Paûrû amwîra, "Wana woû Ngai nagaakûringa. Woû ûrî rûthingo rwake cokaa! Ûkari agu ûngiitîra îgamba kûringana na watho, îndî woû nûkûbuuna ûkauga ndingwe!" 4Bara baarûngî akubî na Paûrû bamwîra, "Nûkûruma mûthînjîri ûra mûnene wa Ngai!" 5Paûrû abeera, "Ntikwiyî, antû beetû. Nkîmenya i mûthînjîri ûra mûnene wa Ngai akûrî ntikiuga ûgu n'ûntû kwandîkîîtwe Maandîkooni Maatheru, 'Ûtikaarie ûntû bûûthûûku îgûrû rîa mûnene weenu.' " 6Paûrû akûmenya akîama bamwe baarî Asandukai na bara bangî baarî Abarisai, auga na inya, "Antû beetû, ndî Mûbarisai, ncierwe i Mûbarisai. Ndîgambithua n'ûntû bwa bûra mbîtîgîîtie antû bakaariûkua!" 7Akuuga ûgu, Asandukai na Abarisai baanjîîria gûturania mbaara, kîama kîathûkana. 8Asandukai bateetîgîîtie muntû ûmûkuû aariûka. Na bateetîgîîtie kûrî araîka kana kîrundu kîa muntû ûmûkuû. Îndî Abarisai ibeetîgîîtie mantû mamu monthe. 9Gîtuma gîkwongeereka, aarimû ba watho bara baarî Abarisai baarûngama bang'enteete mûno. Bauga, "Muntû ûyû gûtirî mabîtia arî na mo. Î ûkeegua i kîrundu kana mûraîka amwîrîîte mantû mamu?" 10Gîtuma kîanenea mûno. Mûnene wa acikaarî aanjîîria gûkuthûka akîonaga taka Paûrû aûmba gûtandûranua. Kwoogu aaruta watho, eera acikaarî baake bathi bamûthûkie bamûrute kîrî antû, bamûcookie kambîîni. 11Ûtugû bwa ntugû înu, Mwathani aaya aarûngama akubî na Paûrû. Amwîra, "Ûmîîria, n'ûntû nwa mwanka ûkûûyîre Rooma ta bûra wakûûyîîre aaga Njerusaremu." 12Rûûni rûkîîrî Ayaundi bamwe beethîrana amwe baabîndîra Paûrû njûri. Baathiîtia bauga batirûma kana banyua gîntû bataûragîîte Paûrû. 13Baarî nkûrûki ya antû mîrongo îna bara baarî mûbangooni ûyu. 14Baathi kîrî athînjîri bara banene ba Ngai na akûrû babeera, "Tûthiîtîtie twauga tûtirûma kana tûnyua gîntû tûtaûragîîte Paûrû. 15Kwoogu îîndî, tûrîenda woû na kîama bûtûmana kîrî mûnene wa acikaarî bûmweneeria bûmwîra Paûrû areetwe bûmûûrie bûmenye ûmma nkûrûki. Itwîthuuranîrîte kûmûûraga mbere ya akinya aaga." 16Mwana wa muntû mûrûme wa mwaragina wa Paûrû eegua mantû mamu. Kwoogu aathi kambîîni eera Paûrû. 17Paûrû eeta mûrûngamîîri ûmwe wa acikaarî. Amwîra, "Tathûkia mwana ûyû ûmwire kîrî mûnene wenu. Kûrî ûntû akwenda kûmwîra." 18Mûrûngamîîri ûyu aira mwana ûyu kîrî mûnene. Eera mûnene, "Mûgwate ûra agwîtwa Paûrû aambîta aambîîra ndeete mwana ûyû kîrî woû, n'ûntû kûrî bu akwenda gûkwîra." 19Mûnene aagwata mwana ûyu njara baathi gataaria. Amûûria, "N'ata ûkwenda kûmbîîra?" 20Mwana ûyu amwîra, "Ayaundi bagwatanîrîte bauga bagakûûria ûtûmane Paûrû airwe kîrî kîama rûû, beetuîkithîîtie i kîama gîkwenda kûmenya ûmma nkûrûki. 21Ûtikeende ûgu n'ûntû kûrî na antû nkûrûki ya mîrongo îna bathiîtîîtie bauga batirûma kana banyua gîntû mwanka boone bakûmûûraga. Na îîndî ûgu ibakwîthuuranîra beeteereete ûbeetîgîîria îromba rîao." 22Mûnene aakaania mwana ûyu amwîra atikeere antû akûmwîra mantû mamu. Amwîra athi bwega. 23Mûnene eeta arûngamîîri baîrî ba acikaarî. Abeera, "Thuuranîraani acikaarî magana maîrî mbûtûme Kaisaria. Na ndîenda buume aaga ûtugû thaa ithatû. Na îthiini na acikaarî bangî mîrongo mûgwanja ba mbaraathi, na bangî kaîrî magana maîrî bakûrûa na matumo. 24Bûthi na mbaraathi ira igaakamata Paûrû mwanka bûtige bûkwona agûkinya bwega kîrî ngabana Berîksi." 25Mûnene aandîka baarûa îkuuga ûûgû: 26Kîrî Berîksi, ngabana mûkaathe. Ûra akwandîkîrîte i niû Kirandias Rusias. Thûkia nkeethi. 27Muntû ûyu aragwatirwe n'Ayaundi na baraarî akubî bamûûraga ûkeegua ti bûra ndaramenyithiirue we i Mûrooma, ndathi na acikaarî ndamûtunyûkia. 28Indaramwirire kîamaani nkîenda kwîgua bûra ararûthîîte. 29I rîo ndaraayire kûmenya i mbaara baraarî na cio îgûrû rîa watho bwao. Gûtiraarî gîtûmi gîa kuuga aûragwe kana athaîkwe. 30Nkwîgua i kûraarî na mûbango wa kûmûûraga, i rîo ndatûmana warîo areetwa kîrî woû. Ndareerire bara bakuuga nabîtîîtie baaye bakwîre. 31Ûtugû bûbu acikaarî baarûtha ûgu beerirwe, baathûkia Paûrû bamwira mwanka taûni yeetagwa Antipatiris. 32Rûûni acikaarî ba magûrû bacooka, acikaarî ba mbaraathi baatigwa baathi mbere na rûgendo na Paûrû. 33Bagûkinya Kaisaria, acikaarî baanenkera ngabana baarûa îra beetwe bamwirîra na baanenkanîra Paûrû kîrî we. 34Ngabana Berîksi aathooma baarûa înu. Aûria Paûrû aarî wa kuuma gîteere kîrîkû. Akwîgua aarî wa kuuma gîteere gîa Sirîsia, 35eera Paûrû, "Nkaathikîîria îgamba rîaku bara bakûthitangîîte baaya." Aaruta watho auga Paûrû akarue gûku kambîîni ya mûnene Eronde.

will be added

X\