NGÛGÎ 21

1Tûgûtigana na bo twatwa meeri twathi tûtakwathûkîra mwanka twakinya gîcîgîîrioni kîa îria gîetagwa Kos. Rûûni twakinya gîcigîîrioni gîetagwa Rondes. Twathi twakinya taûni yeetagwa Patara. 2Twethîra meeri oogo îthiîte Boinîcia. Twatwa yo twathi. 3Tûgûkinya bantû amwe twanjîîria kwona gîcîgîîrio gîa Kupooro. Twakûrûka Kupooro tûkîmîonaga mbarî ya ûmotho, twathi twakinya nthîgûrû ya Sîîria. Twarûngama taûni ya Turo n'ûntû kûrî mîrigo yarutagîrwa oogo. 4Tweethîra eetîgîri oogo, twakara na bo ntugû mûgwanja. Eetîgîri babu baakaania Paûrû kwa inya ya Kîrundu bamwîra atikaathi Njerusaremu. 5Kagiita geetû ga kûthi gagûkinya, bonthe amwe na eekûrû baao na twana batuumagaria twauma taûni batûkinyia rûteere rwa îria. Twaturia maru twinthe twaromba. 6Twatiganîra na bo agu, tiû twatwa meeri na bo beenûka. 7Twathi mbere na rûgendo kuuma agu Turo, mwanka twakinya Piteromeas. Twakeethia eetîgîri ba noogo na twakara na bo ntugû îmwe. 8Rûûni twathi kaîrî mwanka twankinya Kaisaria, twakara kwa mûtûmîîria ûmwe eetagwa Piripû. Aarî ûmwe wa antû mûgwanja bara baathûrîîtwe gûteetheeria atûmwa Njerusaremu. 9Piripû naarî na aarî bana beetwe kîewa kîa ûroria. 10Tûgûkaranga ntugû igana ûna, kîroria gîetagwa Agabas kîaya kiumîîte Njundea. 11Aathûkia mûcibi wa Paûrû eeboga na uu magûrû na njara. Auga, "Kîrundu Ûmûtheru ariuga ûûgû, 'Mwene mûcibi ûyû aathi Njerusaremu i bu akoogwa ûûgû n'Ayaundi, anenkanîrwe kîrî antû batarî Ayaundi.' " 12Twinthe amwe na bara bangî baarî agu tûkwîgua ûgu twereka Paûrû twamwîra atikaathi Njerusaremu. 13Paûrû atwîra, "Ibûkûndîthia kîeba bûkîndîrîra! Indîthuuranîrîte gûkuîra Njerusaremu n'ûntû bwa Mwathani Yiesû, tatiga kûthaîkwa akî." 14Tûkwona gûtirî bu tûkîrûtha agarûra mathûgaania maake, twarekana n'we twauga, "Kwenda kwa Mwathani ikûrûthîke!" 15Tûgûkaranga agu bantû a ntugû igana ûna, twebîthîrania kûthi Njerusaremu. 16Twathiyania na bamwe ba eetîgîri ba Kaisaria, batwira kwa muntû eetagwa Mûnaaconi, wa kuuma gîcîgîîriooni gîa Kupooro, twakara agu gwake. Mûnaaconi aarî ûmwe wa eetîgîri ba mbere. 17Tûkûthi Njerusaremu, eetîgîri bara tweethîîre batûgwata ûgeni bwega mûno. 18Rûûni twathiyania na Paûrû kûriûngîra Njakubu. Twethîra kinya akûrû ba kanica bonthe oogo. 19Paûrû abakeethia. Abeera bunthe bûra Ngai aarûthîîte kîrî bara bataarî Ayaundi gûkûrûkîîra ngûgîîni yake. 20Bakwîgua mantû mamu baakumia Ngai. Beera Paûrû, "Mûruayia, ûtikwona kinya magiri mama ma Ayaundi beetîgîîtie na barî na wîru bwa kûthingata watho bwa Musa? 21Ibeegîîtue ûrutanaga Ayaundi bonthe bara batûîre nthîgûrû ingî ûkîbeeraga batige kûthingata watho bwa Musa, batige gûtaanaga aana baao na batigane na wîthîre bwetû bwa Kîîyaundi. 22N'ata tûkûrûtha n'ûntû nwa mwanka bamenye ûrî gûkû? 23Rûtha bûra tûgaakwîra. Aaga kûrî na antû bana barî na wîrane na Ngai. 24Îthiyania na bo bakîthi kûtherua ûtherue na woû na ûbarîîrîîre mbia beenjwe ntundu kîongo. Ûkarûtha ûgu antû bonthe bakaamenya mantû mara bareegagua i ma gûtuîrîîrwa, boone wabu woû wengwa nûthingataga watho bwa Musa. 25Îgûrû rîa eetîgîri bara batarî Ayaundi, itwabaandîkîîre baarûa twabeera bûra twatuire. Twabeerire batikaarîe irio bia kûrutîra ngai cia ûrongo, batikaarîe nyama irî na nthakame, batikaarîe nyama cia nyamû îrî îmbite, na batikaarute ngûgî cia ûmaramari." 26Kwoogu rûûni Paûrû aathûkia antû babu bana aathi na bo, baatherua barî amwe. Rîru Paûrû aathi nyomba ya Ngai kûmenyithia antû i kagiita kagana ata kûtherua kwao gûkaathûkia, na irî mûthînjîri wa Ngai akaarutîra woora ûmwe waciao kîgongwana. 27Ntugû mûgwanja cia kûtherua kwao irî akubî kûthira, Ayaundi bamwe ba kuuma nthîgûrû ya Îcia boona Paûrû nyomba ya Ngai. Beengîîra kîrîndî kîamûgwata 28bakîringaga gîtuma bakiugaga, "Antû beetû ba Isiraeri, tûteethieni! Muntû ûyû n'we akûthi akîrutanaga antû gûntû kunthe mantû maathûûku îgûrû rîetû, tiû Ayaundi, watho bwetû, na bantû aaga atheru." ( 29Baugire ûgu n'ûntû ibooneete Tirobimas wa kuuma Ebeeso barî na Paûrû taûni, baathûgaania Paûrû naamûthûngîîrie nyomba ya Ngai.) 30Gîtuma kîaûyûra taûni yonthe. Antû bauma nteere cionthe baugîîtie, baaya baagwata Paûrû bamûkururia bamûruta ome ya nyomba ya Ngai, mîrango yaingwa. 31Kîrîndî kîabangîîte kûûraga Paûrû. Mûnene wa acikaarî ba Rooma aamenyithua. Eerwa Njerusaremu yonthe i gîtuma kîtheri. 32Warîo mûnene ûyu aathûkia acikaarî na aniini baake baathi noogo na mpwî. Kîrîndî gîkwona mûnene aayîîte na acikaarî, baatiga kûringanga Paûrû. 33Mûnene aathi ara Paûrû aarî. Aaruta watho auga agwatwe athaîkwe na nyororo ciîrî. Rîru aûria, "Muntû ûyû n'ûû na n'ata arûthîîte?" 34Antû baanjîîria kûyoga. Bamwe bakiuga ûûgû, bangî ibakuuga bwao na bo, mwanka gwatuîka mûnene atikîûmba kûmenya n'ata gwakarîkîîte. Kwoogu aaruta watho auga Paûrû airwe kambîîni. 35Bagûkinya ngaatiini cia gwîtia kambîîni, kîrîndî gîatua gûtindîkana mûno mwanka gwatuîka acikaarî nwa bakamatire Paûrû. 36Kîrîndî kîamûthingata gîkiugaga na inya, "Naûragwe!" 37Acikaarî barî akubî gûkûrûkia Paûrû kambîîni, Paûrû aaromba mûnene rûûtha amwîra, "Waûmba kûmbîtîgîîria ngakwîra?" Mûnene ûyu amûûria, "Îka nthî nwiyî Kîîngiriki? 38I woû Mûmiisiri ûra aatongoreerie antû ngiri inya baaregana na watho baathi bwa rwanda baatua kûrûa na thirikaarî?" 39Paûrû amûcookeria amwîra, "Arî, niû ndî Mûyaundi. Nciarîrîtwe Taarisas gîteere gîa Sirîsia, taûni îrî îgweta rîînene mûno. Itû, mbîtîgîîria mbarie na antû baba." 40Mûnene eetîgîîria Paûrû. Arûngi waagu ngatiini aûkîîria njara. Antû bagûkira, aaria na bo na Kîîyaundi. Abeera,

will be added

X\