NGÛGÎ 17

1Paûrû baagendeera Ambiporis na Aporonia, baakinya taûni ya Thesaronike. Ikwarî na sinagoogi ya Ayaundi taûni înu. 2Wata wîthîre Paûrû aathi sinagoogiini. Sabatû waithatû ithingateene Paûrû aaranîria na bara baayaga ku bûra Maandîko Maatheru maugîîte. 3Aboonia Mesia naagîrîtwe aûragwa na ariûka. Paûrû abeera, "Yiesû ûyû nkûbûtûmîîria n'we Mesia." 4Bamwe ba bara baathikîîrîîtie beetîgia, baagwatanîra na Paûrû na Sairas. Kîrî bo ikwarî na antû bataarî Ayaundi baarombaga Ngai, na ikwarî na aka ba îgweta baingî ba taûni înu. 5Ayaundi bara bateetîgia baatua kwîgua rûriitho. Beethîrania ntûrîka thokooni. Baûkia gîtuma taûni yonthe barî mûkondo. Baathi gûcûa Paûrû na Sairas nyomba ya muntû eetagwa Njasoni. Baabangîîte babeethîra ku babarute nja kîrî antû. 6Bakûbaaga baakuruthûra Njasoni na eetîgîri bara baarî gwake babaruta ome, babaira kîrî anene ba taûni. Baugîîria na inya beera anene, "Antû bara bakûthi bagîûkagia thîîna gûntû kunthe nthîgûrû, îîndî ibaraayire gûkû gwetû. 7Njasoni n'we abagwete ûgeni. Bonthe barîrûtha mantû marî kînyume na mawatho ma mûnene wetû, Kaisaarî. Bariuga kûrî mûnene ûngî eetagwa Yiesû." 8Kîrîndî na anene bakwîgua ûgu kwagîa na gîtuma kîînene mûno. 9Anene bauga Njasoni na babu bangî baarî na bo barute baini. Bakûruta baarekua. 10Gûgûtuga eetîgîri beera Paûrû na Sairas bathi Berea. Bagûkinya noogo baathi sinagoogiini. 11Antû ba Berea ibaarî beega nkûrûki ya ba Thesaronike. Beetîgîra kiugo na wîru mûno. Baathoomaga Maandîko Maatheru kîra ntugû bagîcûa kwona kana wabu bûra Paûrû na Sairas baabeeraga n'ûmma. 12Antû baingî ibeetîgiirie. Bamwe baao baarî aka baarî îgweta bataarî Ayaundi. Na kinya arûme baingî bataarî Ayaundi ibeetîgiirie. 13Ayaundi ba Thesaronike bakwîgua Paûrû naatûmîîrie kiugo kîa Ngai Berea, baathi noogo beengîîra antû. 14Eetîgîri bara Paûrû baarî na bo bamuumagaria na mpwî, baathi bantû rûteere rwa îria. Îndî Sairas na Timotheo bo baatigirwe Berea. 15Eetîgîri babu baakinyithia Paûrû taûni yeetagwa Athene. Bagîcooka Paûrû abatûma abeera beere Sairas na Timotheo batigaakarange ibamûthingate na mpwî bûra gûkîûmbîka. 16Paûrû arî taûni ya Athene eeteereete Sairas na Timotheo, ateegua bwega nkorooni akwona bûra antû baarombaga ngai cia ûrongo bûgana. 17Aathiyaga sinagoogiini akaaranîria na Ayaundi na bara bataarî Ayaundi, bara baarombaga Ngai. Na thokooni naathiyaga kîra ntugû akaaranîria na bara eethagîra. 18Gîkundi gîa antû baûme mûno beetagwa Epekurio na kîîngî gîetagwa Stoiki baanjîîria gûturia Paûrû mbaara. Bamwe baao baûragia, "N'ata kîthege gîkî îîndî gîgûtûringîra gîtuma aaga gîkiuga?" Bangî bauga, "Arîkara ta mantû ma ngai ingî ingeni agûtûmîîria." Babu baugire ûgu n'ûntû Paûrû aatûmagîîria mantû ma Yiesû na kûriûka gwake. 19Baira Paûrû kîamaani gîetagwa Ariopagas. Bauga, "Tûrîenda kûmenya n'ûrutani bûbi bûbû bûûgeni ûkwaragîîria. 20Mantû mamwe ma mara twîgiirue i maageni mûno kîrî tiû. Twenda mûno kûmenya i mantû mabi?" ( 21Antû bonthe ba Athene na ageni bara baatûîre ku baakaraga woogu gûtarî bu bakûrûtha. Kîra beendeete i kwaranîria mantû kana kwîrwa mara maayaga maageni.) 22Paûrû aarûngama mbere ya kîama gîku kîa Ariopagas. Auga, "Antû ba Athene, inkwona bûrî antû ba ndini mûno, 23n'ûntû ndiûngîîte taûni yenu indaroonire bira bûrombaga. Kûrî kîthînjîro kîmwe ndaroonire kîandîkîîtwe, 'Kîrî Ngai ûra ataiyîkeene.' Ûyu bûrombaga bûtaiyî n'ûû, n'we nkûbûtûmîîria bûmûmenya. 24"Ngai ûra aûmbire nthîgûrû na bionthe bira birî ku, n'we Mwathani wa îgûrû na nthîgûrû na atikaraga iromberooni bia gwakwa n'antû. 25Gûtirî gîntû muntû amweyaga arî ûbatu na kîo, n'ûntû n'we eeyaga antû bonthe mwoyo, mîruke ya gûkuuyia na bionthe. 26Aûmbire antû ba mîgongo yonthe kuuma kîrî muntû ûmwe, aatûma batûûra nthîgûrû yonthe. N'we aatuire magiita mara antû bagaatûûra na gûntû kûra bagaatûûra. 27Aûmbire muntû kaingo amûcûa akîondaondagia amwona. Îndî ûmma n'atî atirî kûraaya na woora ûmwe wacietû, 28n'ûntû ûkeegua t'we ûtiîgua tûrî mwoyo, tûtiûmba kwanganga na ûtiîgua tûrî oogo. Wata bûra aini bamwe beenu baugire, 'Wana tiû tûrî nciarwa ciake.' 29"Kwoogu n'ûntû tûrî nciarwa ciake, tûtibatîîrue tûbuanaania Ngai na yûmba rîa kûrûthwa na thaabu, fetha, kana iiga rîcaîtwe na njara cia muntû kûringana na îthûgaanio rîake. 30Kagiita kara antû bataiyî, Ngai ataabataragîra îbîtia rîru. Îndî îîndî augîîte nwa mwanka antû bonthe beerire, 31n'ûntû kûrî ntugû îra abangîîte kûgiitîra antû îgamba gûkûrûkîîra kîrî muntû ûmwe ûra aathuurire agîtûmagîra wagîru. Na noonanîîtie wabu i bu akaarûtha ûgu n'ûntû naariûkiirie muntû ûyu." 32Antû bakwîgua Paûrû aagweta mantû ma antû kûriûka, bamûthekeera. Îndî antû bamwe bamwîra, "Twenda kwîgua kaîrî ûgîtwîra mantû mama." 33Paûrû aathi aatiga akîama babu. 34Kûrî antû bamwe baagwatanîîre na Paûrû, baatuîka eetîgîri. Ûmwe aarî mûkîama, eetagwa Ndionisias. Ûngî aarî mûka eetagwa Ndamaaris na bangî.

will be added

X\