NGÛGÎ 16

1Paûrû baathi taûni ya Ndabi. Bauma agu baathi Rîstira, beethîra mwîtîgîri eetagwa Timotheo. Gina aarî mwîtîgîri Mûyaundi, na îthe aarî Mûngiriki. 2Timotheo naatîîyîîtwe n'eetîgîri ba Rîstira na ba Ikoniamu. 3Paûrû neendaga Timotheo athiyania n'we. Amûtaana n'ûntû Ayaundi bonthe bara baatûîre naagu ibaiyî îthe aarî Mûngiriki. 4Rîru baathi kuuma taûni kûthi îra îngî bakîîraga eetîgîri bûra atûmwa na akûrû baatuire barî Njerusaremu. Babeera bathingate mantû mamu. 5Makanica mamu moongeerwa wîtîgio inya na eetîgîri baathi bakîongeerekaga kîra ntugû. 6Bakuuma agu baathi baagendeera nthîgûrû ya Burugia na ya Garatia, n'ûntû Kîrundu Ûmûtheru ateendaga batûmîîria kiugo nthîgûrû ya Îcia. 7Bagûkinya mwankaani wa Mîsia, baacûûgia kûthi Bethania, îndî Kîrundu wa Yiesû abaregeera. 8Baakûrûkîîra Mîsia baakinya taûni yeetagwa Tiroas. 9Ûtugû Paûrû oonua kîoneki. Oona Mûmacendonia ûmwe aaya aarûngama mbere yake. Amwîra, "Ringanîria ûûye wetû ûtûteethie!" 10Akwona kîoneki gîku, warîo twethuuranîra kûthi Macendonia. Itwarî na mma atî, i Ngai aatwîtîîte Macendonia tûthi gûtûmîîria ntheto îmbega kîrî antû ba noogo. 11Twauma Tiroas na meeri twathi tûtakwathûkîra twakinya Samothirike. Rûûni twathi twakinya Neoporis. 12Twauma agu twathi Piripi. Piripi n'yo yarî taûni îra nene gîteere kîa Macendonia na yathagwa kîîrooma. Twakarakara oogo ntugû igana ûna. 13Sabatû îgûkinya, twaumagarûka taûni înu twatamba na îkumbo rîa muuro twathi ara twathûgaanagia noogo Ayaundi beethîranaga kûromba. Twakara nthîgûrû twaria na eekûrû bara baayîîte marombaani mamu. 14Ûmwe wao eetagwa Rîndia, wa kuuma gûntû gweetagwa Thiatira. Aarî mûbiacaara wa gîtambaa kîa rangi ya ûkûyû. Na aarî mwekûrû aarombaga Ngai. Paûrû agîtûmagîîria, Mwathani aarugûra nkoro yake eetîgîra ntûmwa ya Paûrû. 15Aabaatithua amwe na antû ba mûciî wake. Atûthookia gwake. Atwîra, "Weegua ibûkwona ndî mwîtîgîri wa Mwathani, ncûûni tûthi gwakwa." Mwekûrû ûyu atûkinyîîria mwanka tweegua tûtirega. 16Kagiita kamwe tûthiîte maromba twarîîkana na kamwarî kamwe nkombo karî na kîrundu gîatûmaga karingîria antû. Ikoonagîra eene ko mbia mûno n'ûntû bwa kûringîria antû. 17Kaarî gaku gatûthingata gakiugaga na inya, "Antû baba n'aruti ngûgî ba Ngai ûra mûnene mûno. Barîbûtûmîîria bûmenya bûra bûûmba kwonoka!" 18Ntugû cionthe i bu kaarûthaga ûgu. Paûrû eegua gakîmûtanga. Aûndûkania na ko eera kîrundu gîku, "Kwa riîtwa rîa Yiesû Kîrîstû ndîkwatha uume kîrî kaarî gaka weendî!" Kîrundu gîku kîauma kîrî kaarî gaku nthûti weenu. 19Eene kaarî gaku bakwona wîrîgîîro bwao bûkûthira bwa kwona mbia na ko, beengana na Paûrû na Sairas babakururia babaira ara anene baakaraga bakîgiita magamba. 20Antû babu beera anene, "Antû baba n'Ayaundi na ibakûreeta thîîna taûni. 21Wîthîre bûra bakûrutana bûtikûgwatanîra na watho bwetû. Tiû tûrî Arooma, tûtiîtîgîra mantû mamu na tûtimarûtha!" 22Kîrîndî kîaregana na Paûrû na Sairas. Anene babu baaruta watho Paûrû na Sairas baatembûrangîrwa nguo na baaringwa ibooko. 23Paûrû na Sairas baaturwa mûno, rîru baingîrwa nceera. Mûnene wa nceera eerwa abacûûbîre bwega. 24Mûnene ûyu akwewa watho bûbu aingîra Paûrû na Sairas kanyomba kaarî ndeni mûno gûku nceera. Abathaîka magûrû mbaaûni ciîrî indito mûno bûra bataûmba kuuma oogo. 25Ûtugû gatî kanene, Paûrû na Sairas ibaarombaga na ibainagîra Ngai nyîmbo, agwate bara bangî bathikîîrîîtie. 26Nthûti îmwe, nthîgûrû yainaina na inya mûno, mûcingi wa nceera wainaina. Na warîo mîrango yonthe yarugûka na nyororo cionthe ira agwate baathaîkîîtwe na cio ciakandûkana. 27Mûnene ûyu aabakarîîtie aumbuthûka torooni. Akwona mîrango îrî mîrugûku aathûgaania agwate bagûtoorooka. Aacomoora rûyiû akîenda kwîbûraga. 28Paûrû amuugîîria na inya, amwîra, "Ûtikeebûrage! Twinthe tûrî gûkû!" 29Mûnene ûyu wa nceera eetia rûmonjo. Augia rwîro aathûngîra nceera ndeni. Eeturania nthîgûrû magûrûûni ma Paûrû na Sairas akiinainaga n'ûguaya. 30Aûkîîra auma na bo nja. Abaûria, "Ntikûbûûria aba, n'ata mbûmba kûrûtha nkoonoka?" 31Paûrû bamwîra, "Îtîgia Mwathani Yiesû, nookoonokua. Na wana antû baaku bakamwîtîgia aboonokia." 32Paûrû na Sairas beera mûnene ûyu na antû baake bonthe ntûmwa ya Mwathani. 33Amwe na gûtuga kwene, mûnene ûyu aathi na Paûrû na Sairas abathambia ironda. Paûrû bamûbaatithia amwe na antû baake bonthe. 34Aacooka na baPaûrû nyomba yake, abaa irio. Mûnene ûyu na antû baake bonthe baakeneera gwîtîgia Ngai. 35Rûûni rûkîîrî, anene ba taûni baatûma acikaarî, babeera bathi beere mûnene wa nceera bauga, "Antû bara ibarekue bathi." 36Mûnene ûyu eera Paûrû, "Anene baatûmana bauga woû na Sairas bûrekue bûthi. Kwoogu nwa bûthi. Na îthiini na ûkiri!" 37Paûrû beera acikaarî babu baareetire ntûmwa, "Gûtirî mabîtia tûreerwa itûrûthîîte îndî itûraringirwe ibooko mbere ya antû, na tûrî Arooma na tiû! Baraugire twingîrwe nceera, îndî îîndî barîenda tuuma taûni îno na witho. Arî buru! Anene babu ibaaye barî bo batwîre na batuumagarie." 38Acikaarî babu baatûmîîtwe baacooka beera anene mantû mamu. Anene bakwîgua Paûrû na Sairas baarî Arooma, baamaka. 39Baathi babaromba ûrekeri. Babaumagaria babaruta nceera babeera beenda baume taûni. 40Paûrû na Sairas bakuuma nceera baathi kwa Rîndia. Baathi beekîra eetîgîri wîru. Rîru bauma taûni baathi.

will be added

X\